Máis que CIG-Autonómica

Na histórica xornada do 8 de marzo do pasado ano, miles de galegas ateigamos as prazas e vilas do País participando no Paro internacional de mulleres, conseguindo pór no foco do debate social a problemática dos coidados e a discriminación que sufrimos as mulleres tanto nos lugares de traballo como fóra destes. Un ano despois, cómpre impulsarmos na Galiza un novo día de loita, para que dunha vez por todas o poder entenda que as mulleres estamos fartas da desigualdade e das agresións que sufrimos e porque non imos permitir que nos fagan retroceder nos nosos dereitos, cando aínda nos quedan moitos por conquistar.

O obxectivo da folga de 24 horas para este 8 de marzo, no dia internacional da muller, é mostrar a repulsa á desigualdade e invisibilidade histórica que soportamos as mulleres, á discriminación laboral e social, que se incrementou debido á situación de crise económica que atravesamos, pero aínda máis, por mor das medidas que supostamente foron deseñadas para paliala. Así os recortes no gasto público supuxeron un grande impacto nas mulleres dada a nosa presenza no sector público, que fai que sexamos as principais afectadas na Galiza pola redución de salarios e a eliminación de emprego.

A Xunta de Galiza incumpre coas súas traballadoras

A Xunta deseña propagandísticos plans estratéxicos de igualdade para Galiza e abre ridículas liñas de axuda para fomentar a realización de plans de responsabilidade social e igualdade en empresas e pymes mentres nin sequera ten feito o seu propio plan de igualdade.

A Lei orgánica 3/2007 do 22 de marzo para a igualdade efectiva entre homes e mulleres, nos seus artigos 45 e 46, deixa clara a obriga das empresas de máis de 250 persoas traballadoras de realizar un plan de igualdade. A Xunta de Galiza, con mais de 20.000 no caso da Administración Xeral, 12 anos despois ten os deberes sen facer: o Plan de Igualdade da Xunta nin existe nin se lle espera.

O plan de igualdade urxe, acumúlanse as demandas por incumprimentos á lei ao non permitir a conciliación laboral e familiar, por non establecer medidas organizativas que axuden a conciliación no persoal a quendas, protexer a saúde ou incluso chega a complicar a suspensión por risco no embarazo e lactación.

Os salarios mais baixos nas mulleres empregadas da Xunta

A maioría das mulleres (máis do 80%) traballadoras na Xunta están situadas nos grupos máis baixos. A diferencia salarial entre os grupos altos e baixos é enorme e, se tes en conta o recente complemento da carreira profesional que afonda nesta diferencia, temos como resultado que as mulleres na Xunta cobramos moito menos que os homes.

A CIG demanda o plan de igualdade para o persoal da Xunta de Galicia

Porén a identificación destes problemas é o primeiro paso para a realización dun plan que estableza medidas correctoras, e por iso dende a CIG pedimos estes datos e nestes anos vimos esixindo en numerosas ocasións a elaboración do plan de Igualdade.

No 2019, a Xunta de Galiza segue a ocultar datos en materia de persoal, acidentabilidade e salarios por xénero. En definitiva non fai nada pola igualdade entre homes e mulleres nin planifica facelo: só traballa para a propaganda.

As mulleres temos motivos de sobra para ir á FOLGA este 8 DE MARZO, baleirar os edificios administrativos e saír a rúa para participar nas mobilizacións.

A FOLGA O 8 DE MARZO

A folga dará comezo ás 00:00 horas e rematará ás 24:00 horas agás aquelas que teñan traballo a quendas, nese caso o comezo da folga efectuarase na primeira quenda, aínda que comece antes das 00:00 horas do día 8 de Marzo, e a súa finalización terá lugar unha vez rematada a última quenda, aínda que se prolongue despois das 24:00 horas.

Por todas as mulleres, por todos os dereitos: revolta feminista!!

Folga xeral de mulleres, as mulleres empregadas públicas da administracion da Xunta de Galiza iremos a folga este 8 de Marzo

As delegadas da CIG iniciamos unha campaña baixo o lema “Fartas do Acoso e da violencia machista” donde aproveitaremos as visitas aos centros de traballo para concienciar da importancia de levar a cabo esta folga, denunciando así as as discriminacións e violencias ás que teñen que facer frente as mulleres dentro e fóra do ámbito laboral polo mero feito de ser muller.

Exixen medidas para que se garanta un sistema público de pensións

Pensionistas e xubilados/as da CIG anuncian a convocatoria de mobilizacións para o vindeiro xoves día 27 de setembro en diversas cidades e vilas. Lembran que as pensións galegas son as segundas máis baixas do Estado -máis da metade non chegan aos 677,70€- e denuncian que, porén, a suba que recollen os orzamentos aprobados en xullo supón un incremento de tan só 20€ ao mes.

Polo momento xa teñen confirmadas as convocatorias de:

  • Lugo: 20h, Praza Maior
  • Burela: 20h, Praza da Mariña
  • Monforte: 20h, Praza de España
  • Vigo: 19:30h, Farola de Urzaiz
  • Pontevedra: 20h, Praza da Peregrina
  • Santiago: 20h, Praza do Toural
  • Boiro: 19:30h, Praza do Concello
  • A Coruña: 20h, Subdelegación do Goberno
  • Ferrol: 20h, Praza Amada García (Edificio Xunta)
  • Ourense: 11:30h, Subdelegación do Goberno

Unha data de celebración e reivindicación dos nosos dereitos como clase e como nación

A CIG chama a clase traballadora galega a participar nos actos que o nacionalismo convoca en Compostela o 25 de xullo, Día da Patria Galega. Unha xornada de celebración e reivindicación do dereito dos galegos e galegas a decidir por nós mesmas o noso futuro como nación e a autogobernarnos para poder vivir e traballar dignamente na nosa terra.

Chegamos a este 25 de xullo logo dun ano de mobilizacións sociais nas que a clase traballadora galega foi referente de novo contra as políticas de recortes de dereitos laborais, sociais e civís impostas desde o goberno de Madrid polo Partido Popular. Políticas que afondaron no capitalismo neoliberal, que xa se iniciaran hai 10 anos co PSOE de Zapatero, e que agora, coa volta do PSOE ao poder, tal e como xa anunciaron, se manterán.

Dez anos de crise capitalista que provocaron máis desigualdade, desemprego, salarios de miseria, recortes de dereitos, precariedade, temporalidade, empobrecemento e sobreexplotación a consecuencia das reformas laborais, da negociación colectiva ou das pensións.

As centrais convocan unha nova mobilización de apoio a Carlos e Serafín

A CIG, CCOO e UGT fan un chamamento a participar na concentración convocada este xoves 21 diante do Marco de Vigo ás 20:00 horas para reclamarlle o Goberno español a concesión do indulto a Carlos Rivas e Serafín Rodríguez, condenados a tres anos de prisión por participar na folga do transporte en 2008.

As centrais entenden que a decisión que evite a entrada na cadea destes dous traballadores non se pode demorar máis xa que levan catro anos agardando, polo que esixen o indulto inmediato. A CIG anunciou recentemente que intensificará as mobilizacións no caso de que o Consello de Ministros/as non tome unha decisión ao respecto nas vindeiras semanas.

Convoca unha xornada nacional de mobilizacións en todas as comarcas para o 19 de xuño “Pola recuperación dos dereitos XA”

A CIG acordou este luns, día 4 de xuño, tras reunir os seus organismos de dirección, suspender a folga convocada para o 19 de xuño e substituíla por unha xornada nacional de mobilización con manifestacións en todas as comarcas baixo o lema de “Pola recuperación dos dereitos XA”. A central sindical retomará a convocatoria de folga nos próximos meses se o novo goberno do PSOE -e a correlación de forzas que o fixo posíbel- non derroga e anula todas as reformas que rouban, saquean, explotan e empobrecen á clase traballadora e ao conxunto do pobo galego.

Cando a CIG convocou a folga xeral do 19 de xuño, concibiuna como a moción de censura -que outros non facían- da clase traballadora galega fronte á situación de emerxencia nacional, social, política e institucional, para conseguir a recuperación dos dereitos laborais e sociais roubados so pretexto da crise e demandar a fin dun goberno do PP que, en minoría parlamentar e cheo de corrupción actuaba con total impunidade.

Convoca protestas en todo o país este xoves para reclamar unhas prestacións dignas

A CIG decidiu intensificar a campaña que está a desenvolver en defensa das pensións ante o grave perigo que corre o sistema público como consecuencia da ofensiva do Goberno español do PP e da gran banca para promover os plans de pensións privados. O colectivo de Xubilados/as e Pensionistas convoca unha ducia de mobilizacións nas sete cidades e en varias vilas do país este xoves día 15 de marzo.

A central, que promove estas protestas no marco da campaña para reclamar emprego, salarios e pensións dignas, decidiu convocar manifestacións e concentracións nas sete cidades galegas e nas localidades de Lalín, As Pontes, Boiro, Cee e Burela en horarios que van dende as 11:00 até as 19:30 horas. No centro das reivindicacións, evitar o “roubo” das pensións públicas, garantir o nivel adquisitivo das prestacións e derrogar as últimas reformas aprobadas por PSOE e PP.

A CIG convoca manifestacións en Ferrol e Vigo co gallo do Día da Clase Obreira Galega

O próximo 10 de Marzo, Día da Clase Obreira Galega, a CIG mobilizarase pola recuperación dos nosos dereitos laborais e sociais e contra a precariedade e a pobreza. Nesta data reivindicativa, a central sindical chama a participar nas manifestacións que ten convocadas en Ferrol e Vigo para combater e derrotar todas as contrarreformas que nos impuxeron e para esixir emprego, salarios e unhas pensións dignas.

Mobilizacións do 10 de Marzo, Día da Clase Obreira Galega

- Ferrol, ás 12:00 horas manifestación dende o local do sindicato (Avenida do Esteiro) até o monumento ao 10 de Marzo, onde se realizará a tradicional ofrenda floral.

- Vigo, ás 12:00 horas manifestación dende o cruce da Dobrada.

Medra a precariedade e a pobreza laboral

"As galegas estamos situando Galiza no mapa mundial do Paro Internacional de Mulleres"

Mulleres traballadoras da administración, da sanidade, do ensino, do comercio, da industria, dos centros de chamadas, do téxtil, do mar, das conserveiras,... mais tamén as xubiladas, as estudantes, as desempregadas, as mulleres que traballan arreo pero non teñen unha remuneración; miles de galegas están a secundar os paros laborais e as mobilizacións convocadas pola CIG neste 8 de Marzo ao longo de todo o país, demostrando que se as mulleres paran, o mundo para.

Mobilizacións da provincia de Pontevedra

"As galegas estamos demostrando a nosa capacidade de mobilización, a través da que somos quen de situar Galiza no mapa mundial do Paro Internacional de Mulleres e participar activamente nunha xornada histórica, revolucionaria, que marca un punto de inflexión na conmemoración do 8 de Marzo e en como temos que concibir a celebración desta data".