Desde a Área Pública da CIG engádese que tamén lle adiantaron a Antonio Beteta que, se a única información que ían recibir na xuntanza era a xa dada polo presidente do Goberno, non tiña sentido xa a convocatoria. “Ante a confirmación de que efectivamente sería así, acordamos non chegar a sentarnos”, sinala.

A convocatoria tiña como único punto da orde do día a presentación dun novo “Real Decreto de medidas urxentes de racionalización e redución do gasto en materia de emprego público, de acordo co estabelecido no artigo 36.2 do estatuto Básico do Empregado Público”.

Foi remitida ás 18:00 horas do pasado luns día 9 de xullo para celebrar a xuntanza este mércores ás 17:00 horas, nin sequera con 48 horas de antelación e sen aportar ningún tipo de documentación.

A Área Pública da CIG reitera o seu chamamento ao resto de organizacións sindicais para elaborar un calendario de mobilizacións co obxecto de paralizar estas gravísimas medidas.