Outras informacións e conflitos xerais

Os lumes de primavera destes últimos días na Galiza non fan mais que constatar a tendencia das últimas décadas que nos demostran que se intensifican os lumes cando as circunstancias climatolóxicas o permiten. Non estamos diante dun asunto novo, xa que os datos estatísticos dos que dispoñemos - de consulta pública-, permiten entender que o problema dos lumes se desestacionalizou xa fai ben anos.

Un factor determinante a ter en conta é que os bosques galegos dende o 2002 sofren un estrés de humidade moi elevado, case semellante aos do bosque Mediterráneo.

Se lle engadimos outro factor determinante como a elevada intencionalidade dos lumes forestais en Galiza – ronda o 70% e triplica a media de intencionalidade no resto do estado- podemos atoparnos escenarios recorrentes como o que está a acontecer no día de hoxe.

A consellería de Cultura non está a dar ultimamente boas novas, a maiores de levar varios anos coa RPT a voltas, crear unha estrutura orgánica penosa, ven agora con unha externalización escandalosa.

O caso é que a Comisión de Patrimonio histórico é o organismo encargado, entre outras, de elaborar os expedientes arqueolóxicos referidos a todas as obras que se fan nos Camiños de Santiago. Sempre houbo escaseza de persoal arqueólogo, e agora co incremento exponencial dos informes, a cousa está “que bota por fora”.

E que fai a Administración con esta carga de traballo? Contrata persoal? non ; crea prazas? tampouco. Sácase da manga en xullo do ano pasado unha encomenda de xestión coa empresa Tragsatec que volta a renovar este luns (DOG do 25 de marzo), e damos carta de natureza a unha externalización de traballo técnico cos seguintes problemas:

A semana do 25 ao 29 de marzo vai estar ben completa de asuntos a discutir cos responsábeis políticos da Administración. Vamos tratar a convocatoria das oposicións das escalas de letrado e técnica de estatística, a orde de convocatoria do sistema extraordinario de carreira profesional, os criterios xerais de funcionarización do persoal laboral fixo, e unha xuntanza co conselleiro do Medio Rural para discutir asuntos referentes ao persoal axente medioambiental e forestal. De entrada.

Para todos estes asuntos, podes contactar connosco e achegarnos o que consideres: contacta coa CIG

Acceso ao sistema extraordinario do grao I da carreira profesional. Vai á Comisión de persoal do luns 25. Contén cambios respecto da versión que foi á Mesa Xeral. Entre outros cambios, modifican os prazos, e crean unha nova "comisión de seguimento" para excluir aos sindicatos non asinantes. Podería publicarse o xoves 28. Descargar borrador da CP

Criterios xerais dos procesos de funcionarización do persoal laboral fixo. Vai á Comisión de Persoal do luns 25. Sen cambios respecto do documento que pasou pola Mesa Xeral tras ser negociado ás agachadas entre CCOO, UGT e Función Pública. Descargar borrador da CP.

Tras a polémica xurdida polos procesos selectivos para a funcionarización do persoal laboral da Xunta de Galiza, para a CIG-Autonómica compre aclarar a posición fronte deste proceso así como as consecuencias que para os servizos públicos ten dividir e confrontar ao persoal empregado público e fomentar o seu desprestixio perante a sociedade.

Os procesos selectivos da funcionarización son procesos de promoción interna, voluntarios, de categorías laborais que pasarían escalas funcionariais, limitadas exclusivamente para o persoal fixo que xa superou un proceso selectivo para o acceso á función pública.

Fai uns dias que algunhas persoas están a chamar aos locais da CIG preguntando por unha folga convocada para o xoves día 21 de marzo. A única información que tiñamos era algún papeliño que apareceu nalgún centro, ata que fai dous ou tres días comezaron a notificar servizos mínimos a algunhas persoas.

Non era moita a información que circulaba, pouco máis que unhas pistas que falaban dunha folga convocada en todas as administración públicas do estado.

Como ven sendo habitual para non dar tempo a recursos xudiciais, a Xunta ditou os servizos mínimos a véspera da folga (curioso, que xa fai días houbo quen recibiu notificación de servizos mínimos cando ainda non existía Orde).

Para completar o alucine, o mesmo día que publican os servizos mínimos, tamén na véspera, aparece unha información do suposto sindicato convocante desmentindo que eles convocaran folga algunha.

Pois a ver como acaba isto. Se non hai folga legal convocada, quen decidiu publicar unha Orde de servizos mínimos? E se efectivamente foi convocada, e posto que a negociación deses servizos é obrigatoria, con quen se sentaron a discutilo? 

Haberá algún iluminado ou iluminada que dea explicacións? E se alguén meteu a pata, aparecerá a súa cabeza nunha bandexa?

Outra sentenza do Tribunal Supremo, agora contra un acordo de carreira profesional do Institut Català de la Salut que excluía ao persoal interino.

Hai unha semana informamos aquí que o Tribunal Supremo fallou en contra dun acordo de carreira profesional que excluía a interinos e temporais nas Illes Balears. Pois ben, nunha sentenza de data 21/02/2019, o Tribunal Supremo volve sobre os mesmos argumentos, esta vez para declarar discriminatorio o acordo de carreira do Institut Català de la Salut.

No Fundamento de Dereito Sexto da citada sentenza, o Supremo establece:

1º) "que a carreira profesional, como a establecida no Acordo da Mesa Sectorial de 19 de xullo de 2006 (DOGC de 28 de decembro de 2006, coa modificación publicada no DOGC de 29 de marzo de 2007), está incluída no concepto “condicións de traballo” da cláusula 4ª do Acordo Marco incorporado á Directiva 1999/70/CE referida ao principio de non discriminación, e aos efectos de valorar as diferenzas de réxime xurídico aplicable aos funcionarios interinos e ao persoal laboral temporal, ao que ven referida a actuación impugnada."

Chegou á CIG un ruxe-ruxe que fala dunhas reunións da Xunta con certos sectores da alimentación relacionados directamente con provedores das cociñas que atenden ós comedores de xestión directa dos CEIPs pertencentes á Consellería de Educación, os cales son atendidos por persoal laboral da Xunta de Galiza.

As reunións terían sido en Compostela, con membros da Asociación de Carniceiros e nesa reunión os representantes da Xunta aseguraron que as cociñas que atenderan os comedores escolares de menos de 250 comensais serían substituídas por servizos de catering.

De ser así, a maior parte das cociñas destes comedores escolares botarían o peche para ser substituídas por un servizo de catering que todos aqueles que o coñecemos sabemos que é de dubidosa calidade. Amáis habería un importante número de traballadoras e traballadores afectados que, como pouco, deberían cambiar de destino de traballo si é que non hai perdas de emprego.

A Xunta debería dar explicacións a cerca de si este ruxe-ruxe ten algún fundamento, ou si é que pretende que no medio de todo esta morea de procesos nos que os empregados públicos nos vemos mergullados neste momento, pretende facer pasar desapercibida a eliminación dun persoal e dun servizo público máis, en prol dunhas empresas privadas que están servindo unha comida de dubidosa calidade nas escolas públicas.

O Tribunal Supremo ven de fallar a favor de incluír ao persoal interino e temporal na carreira profesional das Illes Balears

Un mes e pico despois de que CCOO e UGT decidiran coa Xunta que o persoal interino e temporal non ten que cobrar a carreira profesional, o Tribunal Supremo, nun caso similar ao noso ven de fallar:

  • "que a carreira profesional establecida nos acordos ratificados polo acordo do Consello de Goberno das Illes Balears de 8 de maio de 2015 está incluída no concepto “condicións de traballo” da cláusula 4ª do Acordo Marco incorporado á Directiva 1999/70/CE referida ao principio de non discriminación, e aos efectos de valorar as diferenzas de réxime xurídico aplicable aos funcionarios interinos e ao persoal laboral temporal, ao que ven referida a actuación impugnada."
  • "que existe discriminación deste persoal por condicionarse a súa participación na carreira profesional deseñada no acordo recorrido á circunstancia de ter superado un proceso de ingreso..."
  • "que supón, do mesmo xeito, a estimación do recurso contencioso administrativo coa consecuencia de declarar contraria a Dereito a actuación impugnada na medida en que exclúe aos funcionarios interinos e ao persoal laboral temporal do réxime de carreira profesional e o recoñecemento do dereito das recorrentes a esa carreira profesional ..."

Adviñas quen asinou este acordo discriminatorio nas Illes Balears? Acertaches: CCOO e UGT, entre outros, ademais de CSIF.

A pesares de todos os antecedentes que hai, a xurisprudencia, as directivas europeas, especialmente a 1999/70/CE, CCOO, UGT e a Xunta decidiron discriminar ao persoal interino e temporal, polo que o recurso da CIG vai ser o único xeito de incluílo dentro do sistema extraordinario de carreira profesional. A non ser que atendan a petición de renegociar o acordo para facelo universal.

Para situarnos.

Funcionarizacións e reclasificacións, deixando de lado a gran parte do persoal laboral e a todo o persoal funcionario.

CCOO, UGT e Xunta acaban de negociar un documento no que se regulan os criterios do proceso de funcionarización do persoal laboral. E sabémolo porque eles mesmos fan resumos onde afirman que na comisión de seguimento do acordo de concertación tratáronse eses e outros temas, como as ofertas de emprego, o decreto de provisión, etc, ..

Este documento de funcionarización que nos envía a Xunta o luns 11, xa cociñado, para unha mesa xeral o próximo mércores 13, xa circulaba polas redes a semana pasada, porque delegados de CCOO e UGT compartírono en varios grupos de whatsapp, polo que moita xente puido velos.

A maiores, están a traballar cun documento onde aparece unha relación de categorías funcionarizables, das cales a moitas delas as reclasifican de grupo, coa súa correspondente equivalencia como persoal funcionario. Este documento si que tiveron a decencia de enviárnolo a nós.

Asuntos tratados: 

  • Proceso selectivo persoal subalterno.
  • Proceso selectivo persoal ordenanza.
  • Decreto de mobilidade do persoal funcionario (decreto de provisión)
  • Outros asuntos: carreira profesional, novas de procesos selectivos, decreto de funcionarización, aplicación do V Convenio ao persoal da Fundación Cidade da Cultura.

PROCESO SELECTIVO SUBALTERNOS

Cambios respecto do borrador da Mesa Xeral:

  • No primeiro exercicio reducen as preguntas de 70 a 60 (20 da parte común e 40 da específica). Cada pregunta contará con tres respostas alternativas.
  • Na fase de concurso, o epígrafe de experiencia profesional contempla:
    • Servizos prestados como persoal funcionario de carreira na agrupación profesional de persoal funcionario subalterno da Administración xeral da Comunidade Autónoma de Galicia, a razón de 0,1 puntos por mes completo de servizos.
    • Servizos prestados como persoal laboral na categoría 003 (ordenanza e outras) do grupo V de persoal laboral fixo da Xunta de Galicia, a razón de 0,1 puntos por mes completo de servizos.
    • Servizos prestados baixo a dependencia de institucións sanitarias do sistema sanitario público dun país da Unión Europea/Espazo Económico Europeo/Suiza valoraranse a razón de 0,05 puntos por mes completo de servizos.
    • O cociente enteiro pasa de 0,06 a 0,1 ou 0,05 segundo corresponda. A puntuación máxima deste epígrafe pasa de 16 a 17 puntos e a puntuación máxima da formación pasa de 4 a 3 puntos.
  • No temario común, redución nos temas 1 e 3, quedando así:
    • Tema 1. A Constitución española de 1978. Títulos Preliminar, I, II e Capítulo 1 do título III.
    • Tema 3. Lei 39/2015, do 1 de outubro, do procedemento administrativo común das Administracións Públicas: Título Preliminar, I, II e III.