Pero este non é o único caso, pois unha constante por parte das consellerías do Medio Rural e da CMAOT é o abandono do seu persoal, e así a ausencia de seguridade e saúde dos traballadores tanto na non renovación do parque de vehículos coma non proporcionando roupa de traballo, sobre todo a de abrigo -a última entrega foi no ano 2008-, 10 anos sen prendas que garantan que estes traballadores que están expostos a condicións climatolóxicas adversas conten coa debida protección, e de igual xeito que mercan o seu propio material vense obrigados a mercar roupa.

Desde as OOSS reclamamos a inminente renovación e dotación de medios materiais que son precisos para poder actuar con celeridade e seguridade contra o lume, con vehículos adaptados ás tarefas que se realizan e cos debidos Equipos de Protección Individual. Dita escaseza de medios quedou patente na Comisión de incendios no Parlamento de Galicia onde se retratou coma se teñen que mercar cos seus cartos ata cámaras de fototrampeo para poder realizar un traballo tan importante coma é o da investigación dos incendios forestais, traballo que a Xunta de Galicia debe considerar innecesario, posto que non dota nin de material nin de persoal ás BIIF (Brigadas de Investigación de Incendios Forestais).

Seguimos sen contestación por parte da Dirección Xeral de Función Pública, que ten bloqueadas as negociacións dun acordo de condicións de traballo –o actual está caduco e obsoleto- que na actualidade obriga a estes traballadores a realizar quendas de traballo de máis de 12 horas de presenza física e en solitario, e a única maneira de atopar solucións ante a Xunta de Galicia está baseada nas denuncias en Inspección de Traballo e nos xulgados.