Novas por contido

Suba do IVE, recorte salarial e despedimentos de empregados públicos como recortes máis probables e suba da idade da xubilación ou diminución das prestacións por desemprego, entre outras.

Xa é oficial: 100.000 millóns de euros da UE e do FMI para recapitalizar á banca española a través do FROB. O sábado, 9 de xuño, pola tarde o ministro de Economía, Luis de Guindos, aceptaba o "préstamo en condicións moi ventaxosas" para a banca española. A pesar de que o ministro asegura que non terá contraprestacións para a cidadanía, o comunicado do Eurogrupo deixa claro que existen recortes pendentes. É dicir, se non se cumpre pronto co déficit, se pecharía tamén a billa  para a banca.

Desde Alemaña recetan desde fai tempo a España 4 novos recortes para cadrar as contas públicas. Na axenda reformista do Goberno ocuparían os primeiros lugares a suba do IVE e o recorte sobre as traballadoras e traballadores públicos; tenta resitirse aos outros dous dado o maior desgaste eleitoral: pensións/idade de xubilación e prestación por desemprego.

Medidas sobre as traballadoras e traballadores públicos

Con case seguridade, conxelaranse as novas prazas e tamén se recortarán os salarios, probablemente a través de reducións nas pagas extras e nos complementos. A liña vermella está nos despedimentos: reducir o número total de traballadores públicos; non só eliminando persoal interino. Non sería novidade nun país intervido: xa pasou en Irlanda, en Grecia e en Portugal.

Suba do IVE

Non se trata só de subir dous ou tres puntos o tipo máximo, do 18% ao 20-21%. Tamén pasa por cambiar determinados produtos e servizos do IVE reducido ao IVE normal. Por exemplo, os hoteis e restaurantes en gran parte de Europa pagan o IVE normal; aquí, polo de agora, é IVE reducido.

Pensións

É un dos recortes que o Goberno intenta evitar, consciente da súa tremenda impopularidade. Hai tres posibilidades: elevar aínda máis a idade de xubilación -en Irlanda, por exemplo, xa están nos 68 anos-, acelerar a entrada en vigor da xubilación aos 67 e, como última opción, recortes as pensións que agora mesmo se pagan.

Prestacións por desemprego.

En dúas vías: endurecendo as condicións para acceder ao seguro de desemprego e tamén reducindo a súa contía e a súa duración.

Ademais destes catro duros recortes que se barallan, están a suba de taxas, copagamentos, peaxes, privatizacións... A indignación é evidente: a cidadanía acabará pagando os excesos e a gula do sistema bancario español nos mercados financeiros. E polo lado que nos toca, as traballadoras e traballadores públicos atopámonos na primeira liña de batalla contra os novos recortes.

Cando a lei de medidas Nuñez Feijoo falaba de manter os servizos públicos, logo descubirmos que non se refería á sanidade, educación ou servizos sociais. O tempo demostrou que se refería a servizos esenciais non para a cidadanía, senón para o PP, como por exemplo: as subvencións aos medios, os convenios de xestión privada, os mausoleos ou calquera dos outros que levamos denunciando baixo a etiqueta de falsa austeridade.






Outras novas recentes

Mércores, 27 Marzo 2024

Concursos de traslados de consumo, axentes ambientais e gardacostas: admitidos/as-excluidos/as provisional

Dende a Dirección Xeral de Función Pública comunítanos que o vindeiro día 5 de abril publicarán en DOG as resolucións polas que se aproban as relacións provisionais de persoas admitidas e excluídas dos concursos para a provisión de postos de traballo vacantes de: Escala de axentes de inspección, especialidade de consumo. Escala de axentes facultativos ambientais e axentes...
Mércores, 20 Marzo 2024

Prazas para elección de destino Minas-Bibliotecas-Arqueologos-Museos-Obras Publicas-Arquivos (19/03/24)

A Dirección Xeral de Función Pública achega os listados de prazas que ofertará para a elección de destino dos seguintes procesos selectivos: A1 Minas A1 Bibliotecas A2 Bibliotecas A1 Arqueólogos A1 Museos A2 Museos A2 Obras Públicas A2 Arquivos Neste lote botamos en falta A1 de Arquivos.
Venres, 22 Marzo 2024

Prazas para elección de destino Agrupación profesional-Subalterno (22/03/24)

A Dirección Xeral de Función Pública achega un listado de prazas que ofertará para a elección de destino do proceso selectivo da agrupación profesional - subalterno. A localidade dos postos pode verse no código que vai nas posicións 11 a 15 do código (XX.XXX.XX.XXX.XXXXX.XXX) No mesmo arquivo que poñemos a túa disposición para descargar, vai tamén a RPT íntegra con todos os...