Novas por contido

Mentres o PP se gaba do seu apoio á familia, de portas para adentro da Xunta non é capaz sequera de garantir o cumprimento da lexislación de igualdade.

Comezouse a escoitar falar de flexibilidade na Xunta a raíz da negociación da Orde de xornada laboral, flexibilidade e teletraballo. Porén, xa existía flexibilidade na Xunta, na súa modalidade familiar desde que, no 2007, se aprobara a lei galega de traballo en igualdade.

Esta lei modificaba o artigo 44 da primeira lei galega de igualdade do ano 2004 e recoñecía o dereito á flexibilidade laboral por motivos familiares a persoas con fill@s menores de 12 anos ou con familiares convivintes que por razón de idade ou enfermidade precisaran de asistencia. A lei fala de establecer un horario de referencia “o máis amplo posible” que permita o propio centro e nese horario cumprir a xornada en cómputo mensual con “absoluta liberdade”.

Coa aprobación da nova Orde de flexibilidade houbo un repunte de solicitudes e en 2 meses escasos, desde a súa aprobación, 268 persoas solicitaron este dereito. Iso a pesar de que as condicións recollidas pola orde resultaban máis limitantes que a propia lei e ata certo punto contrarias a ela.

A orde establece con carácter xeral un horario máximo de referencia para todos os centros da Xunta, independentemente da súa apertura; de feito establece con carácter xeral a imposibilidade de poder flexibilizar o traballo os venres pola tarde en todos os centros da Xunta, aínda que estean abertos. Por este motivo a CIG presentou xa un recurso contencioso administrativo a finais do pasado mes de febreiro.

Pero a cousa non queda aí. A través desta orde tentou tamén a Xunta de establecer un “horario de presenza obrigada” e mesmo a necesidade de entrar en xustificacións familiares persoais, máis aló das únicas que establece a lei, para valorar a súa concesión. A CIG advertiulle a Administración que isto era diametralmente contrario á Dereito e finalmente, trala fase de informe da Asesoría Xurídica, este intento de vulnerar a lei a través dunha orde decaeu.

Porén, despareceu do papel pero algo na tramitación destas solicitudes non marchaba: comezou a ralentizarse a súa resolución e había consellarías que as tiñan paralizadas porque as traballadoras e traballadores que querían exercer o seu dereito á flexibilidade familiar non se autoimpuñan un horario de presenza obrigada. A finais de febreiro (nos únicos datos facilitados pola Administración) 1 de cada 3 destas solicitudes ficaba paralizada.

Porén, agora a Xunta volve a carga, a través do borrador de instrucións que nos remitiu ás centrais sindicais rescata de novo o intento de limitar un dereito regulamentado na lei de igualdade cunha norma de carácter administrativo (ver páx. 5,6 e 7 das instrucións).

A única ferramenta que recoñece a lei para conxugar as necesidades do centro e o dereito á flexibilidade familiar é modificarlle á traballadora ou traballador o seu horario de referencia. Pero non está previsto na Lei a imposición dunha franxa diaria na que o horario de traballo sexa fixo e tampouco se condiciona a autorización do horario de referencia máis amplo posible á concorrencia de máis circunstancias persoais ou familiares que as contempladas na propia lei.

Entón, porque fai isto a Xunta? Temos coñecementos que foron moitos os receos da Consellaría de Facenda fronte a consellaría de Presidencia, gran impulsora desta Orde polo seu claro impacto político positivo. Precisamente foi a Consellaría de Facenda a que máis paralizou as flexibilidades familiares e presionou ao seu persoal. Ao non haber intencións de publicar este texto, non podemos desde a CIG presentar un recurso e, xa que logo, a traballadora ou traballador queda só na defensa dos seus intereses e ten que valorar se lle compensa (mesmo economicamente) meterse nun recurso xudicial individual.

Desde a CIG rexeitamos en primeiro lugar o atraso na tramitación das flexibilidades familiares que tentan forzar un horario de presenza obrigada e rexeitamos este novo intento da Xunta de modificar unha lei a través dunhas instrucións. Por outra banda, non nos parece propio do partido que Goberna a Xunta, un partido que se gaba do seu apoio á familia de cara ao público pero que de portas para dentro nin sequera é capaz de garantir o cumprimento da lexislación. 

Outras novas recentes

Mércores, 20 Marzo 2024

Prazas para elección de destino Minas-Bibliotecas-Arqueologos-Museos-Obras Publicas-Arquivos (19/03/24)

A Dirección Xeral de Función Pública achega os listados de prazas que ofertará para a elección de destino dos seguintes procesos selectivos: A1 Minas A1 Bibliotecas A2 Bibliotecas A1 Arqueólogos A1 Museos A2 Museos A2 Obras Públicas A2 Arquivos Neste lote botamos en falta A1 de Arquivos.
Luns, 18 Marzo 2024

A CIG solicita que se volva a abrir o buzón de postos do concurso de corpos especiais

Despois dun breve prazo para formular alegacións, Función Pública pechou o buzón sen responder a máis da metade das alegacións sobre os postos. De todas as alegacións formuladas pola CiG en relación aos postos do concurso de traslados de corpos especiais (inclusións, exclusións, etc) de máis da metade non temos resposta. Hai que facer constar que cando nós alegamos por ter...
Mércores, 20 Marzo 2024

Procedemento de acreditación dos méritos do concurso-oposición de estabilización dos subgrupos A1, A2, C1 e C2 e grupos I, III e IV

No DOG do 20/03/2024 publican: - RESOLUCIÓN do 13 de marzo de 2024, da Dirección Xeral da Función Pública, pola que se fai público o procedemento para a acreditación dos méritos de determinados procesos selectivos extraordinarios de estabilización derivados da Lei 20/2021, do 28 de decembro, para o ingreso, pola quenda de acceso libre e mediante o sistema de...