Novas por contido

O pasado 27 de xullo tivo lugar unha xuntanza da Mesa Xeral na que se trataron os seguintes asuntos: 1) I Plan de igualdade da Xunta de Galiza; 2) Acordo de integración e carreira profesional do persoal de GAIN. En rogos e preguntas falouse dos concursos de traslados, a integración do Consorcio, dos procesos selectivos en execución e o RD Lei 5/2023.

REMATE DA NEGOCIAICÓN DO I PLAN DE IGUALDADE

O director xeral de Función Pública (DXFP) comezou expoñendo as alegacións que admitiron na derradeira negociación dos documentos do Plan de Igualdade. 

Tratáronse os tres documentos que forman parte do Plan de Igualdade e, o martes día 1 de agosto irán a Comisión de Persoal. Os documentos son os  seguintes: Diagnose do Plan, Protocolo de acoso e outras violencias no traballo e Medidas do Plan de Igualdade para a súa posible aprobación.

Despois da Comisión de Persoal informaremos ampliamente das nosas consideracións e postura respecto do Plan de Igualdade.

ACORDO DE INTEGRACIÓN DO PERSOAL DO GAIN

Ao respecto do GAIN, a CIG rexeita o modo de proceder da Administración con negociación encuberta cun sindicato e excluíndo aos demais (o DXFP di que era meramente informativa), e a entrega da proposta de Acordo tan só 26 horas antes da súa discusión en Mesa. Levaremos este proceder á nosa asesoría xurídica para a súa valoración.

A DXFP explica que vai iniciar a negociación da integración como persoal laboral da Xunta do persoal laboral que estabilice. Esta negociación será antes de rematar a estabilización (segundo semestre do 2023). Rematada a integración, comezará a funcionarización, que finalizaría no primeiro trimestre do 2024. Incluirían as prazas na OEP-2023.

Abrirán a carreira profesional extraordinario en dous meses para quen acepten integrarse e funcionarizarse. Con efectos económicos a 1/1/2023. A CIG rexeitamos que recoñezan o complemento de carreira só para quen acepte a integración e se funcionarice.

No segundo semestre do 2023 negociarase a RPT do persoal de Gain.

ROGOS E PREGUNTAS

Concursos de traslados

Están estudando as alegacións ás bases do concurso de administración especial (rematarían a semana que ven). As bases estarán en setembro e inmediatamente sairán os buzóns de postos. Están traballando no concurso de enxeñarías e, se é posible, algunha escala máis de especial de Politica Social. Negociarémolo en setembro e publicarano en outubro.

A CIG insistiu en demandar a negociación dos concursos de traslados de todos os corpos e escalas, tanto de administración xeral como especial, co obxectivo de que poida estar resolto antes do 31/12/2024. O DXFP tira balóns fora e négase a poñer datas concretas. 

Integración do Consorcio

Preguntamos pola Integración do persoal do Consorcio, ao que o DXFP resposta que "estamos en ello". Di que en setembro traballarán na RPT, e que a funcionarización será posterior.

Procesos selectivos en execución

O 3 outubro tomarán posesión educación social e auxiliares de enfermaría. Tamén publicarán do resto de procesoss (que será en setembro). 

Estabilización: publicarán as listaxes definitivas nas vindeiras semanas. O exame de galego será na primeira quincena de setembro (publicarano no DOG nuns días).

Real Decreto Lei 5/2023

Novos permisos: afirma que dende Función Pública enviaron instrucións internas ás consellerías. Algúns permisos son de aplicación directa. Outros necesitan desenvolvemento regulamentario. Di que o permiso de 8 semanas non é retribuido e que precisa desenvolvemento.

Interpretación do artigo 217 (estabilización): di que eles xa foron previsores e deixaron a OEP aberta para incorporar as prazas que ian quedando vacantes dos procesos que se estan a celebrar.

O director xeral de Función Pública (DXFP) convocounos a unha xuntanza da Mesa Sectorial de Persoal Funcionario que será venres 28/97/23, coa seguinte Orde do día: RPT de Sanidade (consecuencia do Acordo do persoal Farmacéutico Inspector). Descargar.

Na documentación non observamos cambios respecto da proposta que xa discutimos coa consellería na xuntanza previa do 18 de xullo

A documentación inclúe o Acordo de condicións de traballo do persoal FISP, sen cambios respecto da versión anterior.

O DXFP anunciou que o martes 1 de agosto habería unha Comisión de Persoal, pero non o seu contido. Podería ser que ese día quedase aprobada definitivamente a RPT e o Acordo.

A historia repítese

Tal e como informamos en xuño, segundo Función Pública, por "problemas de xestión" os trienios do persoal laboral do SPIF funcionarizado en xuño se aboarían na nómina de xullo.

Desta volta é Medio Rural quen nos informa de que:

Por problemas que xurdiron na tramitación administrativa , non se poden aboar na nómina do mes de xullo os trienios ao persoal laboral do servizo de incendios funcionarizado no mes de xuño.

Porén, unha vez solucionados os problemas detectados, informámoslles que o pagamento dos trienios dende a data de funcionarización farase efectivo na nómina do mes de agosto.

Dende a Conselleria de Medio Rural pregamos transmitan as nosas desculpas a todas as persoas afectadas.

O que en xuño foron "problemas de xestión", agora en xullo son "problemas que xurdiron na tramitación administrativa".

Agardamos que os problemas realmente se resolvan e que na nómina de agosto se faga efectivo o pagamento dos trienios adebedados.

Asistimos a unha xuntanza coa Dirección Xeral de Función Pública, a Consellería de Política Social e Orzamentos o xoves 20 de xullo, para negociar un Acordo de condicións de traballo do persoal que presta servizos nos centros de Política Social. 

Informa o director xeral que enviarán unha nova proposta nuns días que conterá unha serie de cambios respeito á anterior que dende a CIG considerabamos inaceptábel. A semana que ven teremos xuntanzas para tratar de chegar a un acordo antes do día 8 de agosto. Desa proposta podemos destacar as seguintes novidades a falta de que nos remitan o texto:

  • Incluirá expresemente no ámbito de aplicación ao persoal do Consorcio.

  • Suprime o parágrafo que permitía reducir o descanso entre xornadas até as 7 horas.

  • A xornada de traballo será de 7, 7 e 10 horas respectivamente.

  • Establecerase un descanso dun domingo de cada dous e non mais de 5 días seguidos de traballo.

  • Reducirase a xornada máxima anual, pero sen que sexa inferior a 1400 horas.

  • Convertirán 144 contratos con xornada inferior á ordinaria en xornada completa.

  • Aumento duns 100 postos de traballo na RPT.

  • Iso sí, parece que parte das cuestións que se recollen van carecer de concreción, xa que poden estar supeditadas ás "necesidades do servizo” ou “posibles limitacións”.

Dende á CIG, e á espera de recibir o novo borrador, manifestamos o seguinte:

  • Instamos a que se definan no documento unhas ratios axeitadas por centros.

  • A uniformidade non está na proposta (si estaba recollida no V Convenio).

  • Non se recolle expresamente á compensación por traballo nocturno.

  • Non inclúe unha definición do que se considera o traballo a quendas.

  • Non se contempla a compensación do 24 e 31 de decembro para o persoal que traballa de luns a venres.

  • Instamos a que conste no acordo que se librarán a metade dos fins de semana (sábado e domingo) e a metade dos festivos. No caso dos festivos existen centros onde isto dista moito de cumprirse.

  • Non se contempla un proxecto de segunda actividade.

  • Solicítase a recuperación do dereito a comedor.

  • Realizar un acordo para cubrir as reduccións de xornada e dun reforzo para as adaptacións de tempo de traballo por motivos de saúde.

  • Analizar a tipoloxía de usuarios que están a entrar nos centros de Política Social por emerxencia social, e como se vai afrontar dun xeito correcto a súa atención.

  • Pedimos que se incrementen os niveis retributivos mínimos do persoal.

Nota: o luns 24 de xullo enviaron unha nova versión, con prazo para presentarmos alegacións ata o mércores 26. Descargar

Asistimos á xuntanza da Mesa de negociación de funcionarios/a e á Comisión de Persoal, do martes 18. O asunto da orde do día foi a creación dunha unidade de matadoiro móbil. En rogos e preguntas falamos de: concursos de traslados, gastos por locomoción, GAIN, Consorcio e Augas.

Unidade de Matadoiro móbil

A Consellaría de Sanidade vai crear unha unidade de matadoiro móbil constituída por dous inspectores/as veterinarios/as (itinerantes) e persoal da empresa Tragsatec. O proxecto é "piloto", e ven financiado con orzamento de Sanidade e de Medio Rural.

Aseguran as persoas responsábeis políticas da Administración, que as condicións do persoal veterinario serán as mesmas que as do resto do persoal veterinario de matadoiros, segundo o Acordo de ordenación e mellora das prestacións de servizos veterinarios oficiais do 31/10/2008. Pois ben, con ese acordo non se poden regular cuestións tales como a itinerancia ou a especificidade horaria que poidan ter.

A CIG valora positivamente a creación de emprego público, pero non compartimos a externalización de servizos, e neste caso, agás os dous postos de persoal veterinario, o resto vai ser persoal contratado a través da empresa Tragsatec.

A maiores do anterior, a CIG valorará a impugnación do asunto polo feito de que no proceso de negociación non se respectaron as formas, xa que a xuntanza previa coa consellería foi convocada sen a antelación debida.

Por estas cuestións a CIG votou en contra, o mesmo que UGT e CSIF. Pola súa parte, CCOO abstívose.

Rogos e preguntas

Concurso de traslados de administración especial: afirma o DXFP que terán prioridade á hora de convocarse, aquelas escalas que leven máis tempo sen convocarse, e menciona as da consellería de Política Social e os das escalas compartidas.

Indemnizacións por gastos de locomoción: para poder aplicar a suba do importe dos gastos de locomoción de 0,19 a 0,26, están a falar coa Dirección Xeral de Orzamentos. Entenden que non é directamente aplicable, e que terían que facer cambios na normativa galega.

Carreira profesional do persoal do GAIN: van tentar incluír o acordo na convocatoria da Mesa Xeral da semana que ven.

Integración do Consorcio e Augas de Galiza: informa que os procesos de integración seguen tramitándose.

Atraso na contratación do persoal do servizo de incendios: o persoal foi chamado fai máis dun mes, e asegura que os atrasos debéronse a un problema coa fiscalización dos contratos.

Agacal convocounos a unha xuntanza para o día 26 de xullo, para tratar unha proposta de modificación da súa relación de postos de traballo (RPT). Se é do teu interese, aquí tes a súa proposta: descargar.

Para achegarnos o que consideres, podes contactar coa CIG.

A oferta de emprego público libre de SEAGA ten características “peculiares” tales coma recoñecer na fase de méritos os servizos prestados en empresas privadas ou no libre exercicio da profesión, temarios súper reducidos ou a realización dunha entrevista persoal.

A empresa pública SEAGA (Servizos Agrarios Galegos, S.A.) vai realizar a convocatoria dunha oferta pública de emprego de 58 prazas:
- 11 técnicos/as superiores
- 11 técnicos/as medios/as
- 5 oficiais 2ª administrativo/a
- 31 capataces

Unha empresa pública, cuxo capital é 100% da Xunta de Galiza, que está completamente controlada pola consellería do Medio Rural e que se rexe no sistema de selección de persoal pola Lei do emprego público de Galicia vai adxudicar, na condición de persoal laboral fixo, 11 prazas de técnico/superior e 11 de técnico/a medio/a cun salario anual que vai dos 28.000 aos 40.000 € mediante un sistema selectivo que non garante nin de lonxe os principios de igualdade, mérito e capacidade.

O conselleiro de Medio Rural, en colaboración co director xeral da Función Pública, pretende convocar este proceso selectivo en SEAGA coas seguintes características:

1- Descompoñer a oferta mediante tres sistemas.
- Primeiro, convocando prazas “continuas” (de todo o ano) e prazas descontinuas (de 6, 7 e 9 meses).
- Segundo, asignando as prazas de técnico/a superior e medio/a a 4 áreas diferentes e facendo a convocatoria separada por cada área.
- Terceiro, solicitando até 6 titulacións diferentes para técnico/a superior e 3 para técnico/a medio
A consecuencia deste sistema é que as prazas de técnico/a superior e medio son convocadas practicamente dunha en unha.

2- Establecer un temario para as prazas de técnico/a superior de 10 temas e para as de técnico/a medio de 8 temas.
Hai que ter en conta que esta é unha convocatoria libre. Non se trata dun proceso de estabilización, nin de promoción interna. A modo de comparación... a última convocatoria de prazas da Xunta de Galicia establece 101 temas para o grupo A1 e 70 para o A2, na estabilización extraordinaria da Xunta de Galicia 91 temas para o A1 e 70 temas para o A2 e na última convocatoria de promoción interna do A1 55 temas.

3- Na fase de méritos recoñecer os servizos prestados en empresas privadas ou no exercicio libre da profesión.

4- Introducir como parte do proceso selectivo unha entrevista persoal.

O director xeral de Función Pública convocounos a unha xuntanza da Mesa Xeral de Empregados Públicos (MX) para o xoves 27/07/23.

Nesta Mesa Xeral vaise tratar o contido do I Plan de Igualdade da Xunta de Galiza que se estivo negociando nas xuntanzas previas da comisión negociadora creada ad hoc para este asunto e que naceu froito da insistencia amosada pola CIG.

Na orde do día tamén vai unha Proposta de Acordo entre a Consellería de Facenda e Administración Pública e as organizacións sindicais para a integración do persoal do GAIN nas estruturas da administración da Xunta de Galiza, mais temos que salientar que sobre este asunto non nos enviaron documentación.

Esta é a documentación da que dispoñemos a falta de que nos envíen a que está pendente:

Diagnose da situación de igualdade no seo da Administración da Xunta de Galiza I

Diagnose da situación de igualdade no seo da Administración da Xunta de Galiza II

Diagnose da situación de igualdade no seo da Administración da Xunta de Galiza III

Protocolo de actuación fronte ao acoso e as violencias sexuais e psicolóxicas no traballo

Medidas/obxectivos do I Plan de Igualdade da Xunta de Galiza

 

O director xeral de Defensa do Monte vólveo a facer: iluminado pola gracia divina, escolle a un grupo de funcionarias/os públicos que van ser parte dunhas unidades segredas chamadas UDEX

As UDEX ou Unidades de Directores de Extinción aparecen no PLADIGA (Plan de prevención e defensa contra os incendios forestais de Galiza) como por arte de maxia. Trátase dunha unidade de directores de “elite” para dirixir grandes incendios forestais. Supoñemos que terán formación avanzada e medios que non terá o resto do persoal, pero non sabemos nada máis.  Iso si, os compañeiros elixidos “a dedo” polo director xeral terán “nivel 22 ou 25” e “consolidarán ese grao persoal” e estarán ás ordes directas do director xeral de Defensa do Monte

No PLADIGA 2023 a UDEX é definida como un equipo de traballo formado por persoal especialmente cualificado e especializado nas labores de Dirección de Extinción que, en lumes con elevado potencial de converterse en gran incendio forestal de nivel (operativo) B ou C, poderán ser mobilizados polo Centro de Control Central (CCC) para a súa intervención, coa intención de facilitar e favorecer o correcto desenvolvemento do operativo asumindo a Dirección Técnica de extinción á súa chegada ao lume.

Esta, como outras novidades do PLADIGA, que afectan a funcións e traballo do persoal, son materia obrigada de negociación colectiva e a día de hoxe aínda NON FORON NEGOCIADAS e non existen nin na estrutura nin na RPT da consellería. 

Os postos da UDEX non existen, nin na RPT nin fóra

Nin localidade de adscrición, nin se sabe como van cobrar ese nivel 22-25, nin que funcións van ter, nin en que demarcación, nin cales van ser as súas condicións laborais e salariais… Os ruxe ruxe din que estarán as ordes directas do director xeral e que traballarán as 24 horas .. O que está claro con todo isto é que este director pensa que a Administración pública é Transportes Manuel Rodríguez SL. 

Porén, aínda que as prazas non existen, sabemos que se escolleu en segredo ao persoal para formar parte destas unidades, e que xa se lles fixo entrevista na propia Dirección Xeral. Un escándalo maiúsculo na Administración pública.

Xa denunciamos este proceder ante o novo Secretario Xeral Técnico da Consellería de Medio Rural, que estrea cargo cun bo grupo de secuaces; máis polo de agora non respondeu.

O funcionamento das UDEX contradí o propio PLADIGA

A pesar de que as funcións UDEX veñen recollidas no PLADIGA, as últimas noticias que chegaron aos distritos apuntan a que estes UDEX van participar unicamente como apoio aos directores e directoras de extinción dos lumes forestais. Incluso hai quen di que van funcionar de espías do director.. (deixamolo aí). O que temos claro é que os/as compañeiros/as da UDEX desaparecen das cartelerais de traballo dos distritos a partir do 19 de xullo, e NON OS SUBSTITÚE NINGUÉN. 

O que si está claro é que o director xeral de Defensa do Monte é un seductor que se alimenta da ilusión das persoas. Máis o fin non xustifica os medios, señor secretario xeral técnico da CMR, ou o paras ti ou parámolo nós

ASI NON!

A CIG-Autonómica presentou unha queixa na Valedora do Pobo para que paralice as actuacións contrarias a dereito da Consellaría do Medio Rural nesta materia

Responsábeis do sector de Autonómica da CIG-Administración presentamos hoxe xunto a delegados/as e traballadores/as do Servizo de Prevención de Incendios Forestais (SPIF) da Xunta de Galiza unha queixa diante da Valedora do Pobo en Santiago para reclamarlle que inste a negociación urxente dun acordo marco regulador das condicións de traballo do persoal e paralice todas as actuacións contrarias a dereito da Consellaría do Medio Rural.

A situación afecta directamente a uns 500 traballadores/as e indirectamente a outros/as 2200

A secretaria nacional da CIG-Autonómica, Zeltia Burgos, advertiu do “caos” existente no operativo de extinción de incendios da Xunta como consecuencia de ter funcionarizado arredor de 500 traballadores/as sen regular antes as súas condicións laborais e denunciou que a Dirección Xeral de Defensa do Monte está a mudar fórmulas de traballo, protocolos e funcións do persoal mediante o envío de circulares. Isto fai que a situación sexa insostíbel, polo que vimos de demandarlle á Valedora que inste a que haxa unha negociación e se paralice este ‘ordeno e mando’ da Consellaría.

Denunciamos que este recente proceso de funcionarización deixou os traballadores/as afectados/as fóra do V Convenio Colectivo Único e o seu anexo de aplicación para o persoal do SPIF. Esta falta de regulación de case a metade do servizo afecta por extensión ao resto dos 2200 bombeiros/as forestais cos que comparten brigada, medios e traballo na extinción de incendios forestais o que por en risco de forma directa o servizo público e a saúde e seguridade do persoal.

Esixencia normativa

Nal CIG censuramos que tanto a Consellería do Medio Rural como a de Facenda e Administración Pública ignorasen a nosa solicitude, como organización sindical maioritaria, para negociar as condicións laborais con carácter previo á funcionarización, proceso que ademais tivo lugar o pasado 3 de xullo, xusto ao comezo da campaña de incendios forestais e sen prever as consecuencias que para o desenvolvemento do servizo ía ter a falta de regulación de funcións e dereitos laborais de case unha terceira parte do persoal.

Xunto á solicitude de negociación dende a CIG Autonómica enviamos tamén unha proposta de acordo marco regulador na que contemplaba a conexión do servizo e a convivencia do persoal funcionarizado e laboral para garantir a viabilidade do servizo e que fora negociada mediante os procesos de negociación colectiva do persoal empregado público no marco da Mesa Xeral de Empregados/as Públicos/as.

De feito, a propia Lei de Emprego Público de Galiza recolle como materias obxecto de negociación para o persoal funcionario as que afecten a retribucións e condicións de traballo do persoal funcionario, e especificamente as relativas a calendario laboral, horarios, xornadas, vacacións, funcións, etc. No caso do persoal do SPIF, estas condicións son específicas, polo que na CIG Autonómica entendemos que teñen que ser obxecto dun proceso de negociación colectiva que derive nun acordo de condicións de traballo no que se regule o servizo, as funcións e os dereitos laborais derivados desta prestación especial.

Risco para o persoal

A Consellería do Medio Rural está a ignorar a norma e a necesidade de negociar este acordo, e mediante circulares internas está a mudar directamente o protocolo de funcionamento habitual para asignar funcións e responsabilidades que até o de agora non eran propias deste persoal. Circulares que non son nin negociadas nin tan sequera comunicadas ás organizacións sindicais, aos comités de empresa ou ás xuntas de persoal. O mesmo proceder aconteceu coa falta de negociación do Plan de Prevención e Defensa contra os Incendios Forestais de Galiza (PLADIGA), a pesar de que introduce novas funcións, tarefas e organización territorial.

Dende a CIG Autonómica manifestamos que este proceder habitual da Consellaría de regular condicións de traballo e funcións sen negociación colectiva non se pode volver a repetir, tendo en conta o grave risco que supón para o persoal empregado público que desenvolve tarefas de extinción de lumes. Ante esta situación non nos queda outra que acudirmos á Valedora do Pobo con carácter previo a outras vías pola dificultade e lentitude legal que supón o amparo xudicial cando hai implicado persoal funcionario e a urxencia de ter iniciado a campaña de incendios de 2023 nestas condicións.

Outras novas recentes

Venres, 22 Marzo 2024

Prazas para elección de destino Agrupación profesional-Subalterno (22/03/24)

A Dirección Xeral de Función Pública achega un listado de prazas que ofertará para a elección de destino do proceso selectivo da agrupación profesional - subalterno. A localidade dos postos pode verse no código que vai nas posicións 11 a 15 do código (XX.XXX.XX.XXX.XXXXX.XXX) No mesmo arquivo que poñemos a túa disposición para descargar, vai tamén a RPT íntegra con todos os...
Mércores, 27 Marzo 2024

Concursos de traslados de consumo, axentes ambientais e gardacostas: admitidos/as-excluidos/as provisional

Dende a Dirección Xeral de Función Pública comunítanos que o vindeiro día 5 de abril publicarán en DOG as resolucións polas que se aproban as relacións provisionais de persoas admitidas e excluídas dos concursos para a provisión de postos de traballo vacantes de: Escala de axentes de inspección, especialidade de consumo. Escala de axentes facultativos ambientais e axentes...
Mércores, 20 Marzo 2024

Procedemento de acreditación dos méritos do concurso-oposición de estabilización dos subgrupos A1, A2, C1 e C2 e grupos I, III e IV

No DOG do 20/03/2024 publican: - RESOLUCIÓN do 13 de marzo de 2024, da Dirección Xeral da Función Pública, pola que se fai público o procedemento para a acreditación dos méritos de determinados procesos selectivos extraordinarios de estabilización derivados da Lei 20/2021, do 28 de decembro, para o ingreso, pola quenda de acceso libre e mediante o sistema de...