Novas por contido

Residencia do Maior do CarballiñoNo Carballiño hai unha residencia de maiores que estaba a dar servizo a 48 residentes. Xa hai tres anos a Xunta de Galiza comezou a construción dun novo edificio, anexo á antiga residencia, e que ten capacidade para atender a 88 novos dependentes.

Dende a CIG-Autonómica levamos máis dun ano demandando información á Consellaría de Traballo e Benestar sobre os prazos de apertura e o orzamento para a dotación de persoal da Residencia e denunciando que no antigo edificio se reduciron as prazas das 48 existentes ás 24 actuais sen que, a día de hoxe, non se abrira nin haxa visos de abrir o novo edificio debido a que os plans que teñen para ela non son os que queren transmitir nestas datas tan próximas ás eleccións municipais.

Nestes tempos de crise a mensaxe continua das institucións é de austeridade e contención do gasto. O goberno do PP non escatima esforzos en predicar austeridade e contención pero, como din os sabios, unha cousa e predicar e outra dar trigo. A sorpresa que esconde a residencia do Carballiño é a duplicidade servizos é dicir: hai dúas cociñas, dous comedores, dúas lavandarías, dúas enfermerías, etc. Non fai falta explicar que en dous edificios separados 10 metros e unidos mediante corredores é un derroche inexplicábel duplicar os gastos e os servizos. A pregunta que se suscita é doada: Por que se fai entón así?

Está claro, os servizos se lle darán a algunha empresa da cor política do goberno popular, introducindo así a unha empresa que se levará un lucro pola mera intermediación na contratación do persoal e, obviando, que a residencia xa conta con eses servizos que habería que adaptar ao novo número de residentes. Pero os orzamentos da Xunta non contemplan a creación de prazas e as preguntas sobre isto que lle formulamos tanto a CIG como o Comité de Empresa da Área de Benestar sempre tiveron a calada por resposta evidenciando o destino privado da residencia.

A ansia privatizadora do goberno do Partido Popular chega aos extremos máis básicos da sociedade, eliminando residencias de maiores públicas, é dicir, destrozando o único sistema que garante a atención universal aos nosos maiores e non soamente ás persoas que poidan pagar un alto prezo por uns servizos sociais privatizados. Isto non é novo. Xa nos toca vivilo coa sanidade. Agora van polos servizos sociais. Entendemos tamén que o Carballiño vai a ser o sinistro laboratorio de probas que o PP vai utilizar para extender este modelo privatizado as residencias públicas da Xunta de Galiza.

Dende a CIG-Autonómica instamos a que o Partido Popular do Carballiño se pronuncie sobre este aspecto e lle exixa á Consellaría de Traballo a dotación orzamentaria necesaria para a apertura inmediata do novo edificio da Residencia do Maior do Carballiño coa dotación de persoal público necesaria.

Unha vez máis se discrimina a provincia de Ourense, en concreto á comarca do Carballiño, xa que no pacto de persoal do ano 2008 estaba asinada a creación de 15 novos postos de traballo na antiga residencia do Maior e, reiteradamente se nos confirmou que o edificio anexo ía ser unha soa residencia dotada de persoal da Xunta de Galiza. Estaríamos a falar da creación dun mínimo de 60 novos postos de traballo aos que habería que sumarlle os 15 postos anteriores.

Foto: Martiño Pinal, publicada no diario La Región: http://www.laregion.es/noticia/138437/residencia/asistidos/abrira/ultimo/trimestre/


Outras novas recentes

Mércores, 27 Marzo 2024

Concursos de traslados de consumo, axentes ambientais e gardacostas: admitidos/as-excluidos/as provisional

Dende a Dirección Xeral de Función Pública comunítanos que o vindeiro día 5 de abril publicarán en DOG as resolucións polas que se aproban as relacións provisionais de persoas admitidas e excluídas dos concursos para a provisión de postos de traballo vacantes de: Escala de axentes de inspección, especialidade de consumo. Escala de axentes facultativos ambientais e axentes...
Mércores, 20 Marzo 2024

Prazas para elección de destino Minas-Bibliotecas-Arqueologos-Museos-Obras Publicas-Arquivos (19/03/24)

A Dirección Xeral de Función Pública achega os listados de prazas que ofertará para a elección de destino dos seguintes procesos selectivos: A1 Minas A1 Bibliotecas A2 Bibliotecas A1 Arqueólogos A1 Museos A2 Museos A2 Obras Públicas A2 Arquivos Neste lote botamos en falta A1 de Arquivos.
Venres, 22 Marzo 2024

Prazas para elección de destino Agrupación profesional-Subalterno (22/03/24)

A Dirección Xeral de Función Pública achega un listado de prazas que ofertará para a elección de destino do proceso selectivo da agrupación profesional - subalterno. A localidade dos postos pode verse no código que vai nas posicións 11 a 15 do código (XX.XXX.XX.XXX.XXXXX.XXX) No mesmo arquivo que poñemos a túa disposición para descargar, vai tamén a RPT íntegra con todos os...