A CIG obten un total de 51 delegados/as entre as cinco Xuntas de Persoal
O xoves 16 de abril celebráronse as eleccións ás Xuntas de Persoal Funcionario da Xunta de Galiza nas catro provincias e en Servizos Centrais. A CIG obtén un total de 51 representantes no total da Galiza o que supón un incremento de 9 delegados/as. Estes son os datos desglosados co formato "resultado 2015 (resultado 2011)":
| CIG | CSIF | CCOO | UGT | Outros | Total | |
| Pontevedra | 16 (10) | 3 (6) | 3 (4) | 3 (3) | 0 (2) | 25 (25) |
| Servizos centrais | 11 (10) | 5 (7) | 5 (6) | 4 (4) | 25 (27) | |
| Lugo | 10 (8) | 6 (7) | 3 (4) | 4 (4) | 23 (23) | |
| A Coruña | 10 (8) | 5 (7) | 6 (5) | 4 (3) | 0 (2) | 25 (25) |
| Ourense | 4 (6) | 12 (8) | 5 (7) | 2 (2) | 23 (23) | |
| Total | 51 (42) | 31 (35) | 22 (26) | 17 (16) |
121 (123) |
Estes resultados son mostra da confianza do persoal funcionario da Xunta de Galiza na xestión e traxectoria da CIG e supoñen un voto de castigo ás políticas do Partido Popular en relación á Administración Pública.
Foron estes catro anos duros onde os empregados/as públicos/as se levantaron contra a maior agresión das últimas décadas ao noso colectivo. Catro anos de recortes no emprego, nas retribucións, e nos nosos dereitos, onde se levaron adiante privatizacións e se recortaron os servizos públicos que se prestan aos cidadáns.
A CIG foi a forza sindical que estivo ao lado dos/as funcionarios/as públicos na loita destes catro anos polo que o voto á CIG foi un voto contra os recortes, as privatizacións e contra a xestión en materia de persoal da Xunta de Galiza.
Queremos agradecer a confianza depositada en nós polos funcionarios e funcionarias que optaron por un voto en defensa do Público e da nosa dignidade e dereitos, e que veñen traballando día a día por unha Administración Pública mellor.
A CIG, con este aval renovado, vai seguir no camiño da defensa dos intereses dos empregados/as públicos/as e dunha Administración Pública galega e de calidade.
Tanto se nos votaches como se non, estamos á túa disposición. Tentaremos non defraudarche.
