A ampliación do crédito actual de 540.000 € súmase aos 1.135.000 € xa aprobados en marzo.
O 14 de marzo publicouse no DOG a convocatoria da axudas económicas, en réxime de concorrencia non competitiva, destinadas a empresas xornalísticas e de radiodifusión por valor de 1.135.000 €. Nin 2 meses despois publícase no DOG unha ampliación de crédito por valor de 540.000 €, o que supón unha ampliación do 47% do crédito inicial. Isto fai un total de 1.675.000 € para este ano. Cómpre recordar que o ano pasado foron destinados 1.550.000 €.
Os gastos públicos en medios de comunicación xa son polémicos de por si. Porén, tórnanse máis polémicos no momento actual ao ser considerado como un gasto totalmente prescindible fronte ao mantemento dos servizos públicos. Iso por non falar de que esta ampliación de crédito chega en plena campaña eleitoral ao Parlamento europeo.
Meses atrás o propio Goberno galego comezou a propagar a mensaxe de recuperación auspiciada polos datos macroeconómicos que non teñen reflexo na melloría da situación da clase traballadora. Recentemente a conselleira de Facenda aumentaba as previsións de crecemento económico do noso país dun 0,8% ao 1,2%.
Porén, este optimismo non se tornou nun incremento do gasto público en materia social, dirixido precisamente ás persoas que máis están sufrindo a situación de recortes de dereitos defendida e propiciada, en parte, polo propio Goberno autonómico. Todo o contrario, vemos, como neste caso, un aumento no gasto destinado a cuestións puramente de interese partidista: comprar espazos nos medios de comunicación.
Por suposto, como traballadoras e traballadores públicos tivemos que escoitar máis de unha vez que non había cartos para recuperar as nosas extras, abolir a lei de medidas ou mesmo para devolvernos a parte roubada da extra do 2012 que os propios tribunais recoñecen. Parece ser que senón, non daba para manter os servizos públicos esenciais... xa vemos o que interpreta este Goberno como “esencial”.
Contratos e convenios
Ao marxe das axudas que se establecen a través desta resolución, hai que ter en conta a cantidade de diñeiro de difícil control e seguimento que supón a publicidade institucional que contratan as diferentes consellarías: anuncios e campañas que teñen pouco de informativas e moito de botarse flores sobre as políticas desenvoltas. Cómpre destacar neste sentido a polémica campaña de Traballo e Benestar que pretende animar “o espírito reproductor”.
Ao anterior hai que engadirlle os mal chamados "convenios de colaboración" nos que os medios cos que se realizan reciben máis cartos a cambio de máis publicidade. Só por citar un exemplo podemos falar dos convenios da Consellaría de Medio Rural do 2º cuadrimestre do ano pasado (DOG 19/03/2014) onde só esta consellaría destinaba 1.018.000 € para convenios con diferentes medios de comunicación galegos.