Novas por contido

Os martes 8 e 15 de maio, o persoal do centro de valoración da Discapacidade da Xunta en Pontevedra e os seus representantes sindicais, entre os que estamos as compañeiras da CIG quixemos mostrar o noso malestar pola situación laboral que está a padecer este servizo ao non poder levar un ritmo aceptable de recoñecementos e orixinar perxuicios as persoas que están a espera dunha valoración do seu grado de discapacidade.

A unidade de valoración da discapacidade de Pontevedra presenta unha acumulación  de arredor dos 10.000 expedientes para o recoñecemento da discapacidade. Esta acumulación provoca que as resolucións de recoñecemento cheguen aos tres anos dende a súa presentación a trámite.

Consideramos que a única solución viábel a dita situación é o incremento de persoal estable que traballe de xeito continuado e non por contratos temporais dunha duración de 6/9 meses, e tamén cubrir as vacantes por xubilacións pois senón as equipas están cada vez máis minguadas.

Ata o de agora as medidas tomadas pola Consellería demostraron non ser eficaces ao basearse na temporalidade do persoal contratado, intentando paliar con parches que ao final non resultan:

Primeiro, o convenio co SERGAS para que médicos do dito organismo valoren por informes e sen consulta presencial aos solicitantes, e que xa leva 6 meses en marcha, amosouse como unha medida ineficaz e custosa.

Despois, mediante o anuncio por parte do conselleiro de dotar con 6 equipas mediante un contrato temporal de máximo 9 meses e que entendemos que tampouco vai funcionar pois serán persoal sen experiencia nestes postos polo que precisaran formación e supervisión e cando estén en condicións de exercer autonomamente remataralles o contrato. Ademais isto só serviría para diminuír moi pouco os anos de espera pero sin atallar a cuestión de fondo que é que ordinariamente se xera o atraso por non haber máis equipas permanentes. Xa noutros anos executouse a mesma actuación e os resultados non foron para nada paliativos na diminución da lista de espera. Houbo que formalos na xornada de traballo e cando alcanzaban un óptimo desenvolvemento do traballo, remataba o seu contrato.

Por iso dende a CIG, ademais de esas equipas temporais, esiximos QUE SE DOTE A UNIDADE DE VALORACIÓN DA DISCAPACIDADE DE PONTEVEDRA DE DÚAS EQUIPAS MÁIS FIXAS E NON TEMPORAIS, QUE SE CUBRAN AS XUBILACIÓNS DO PERSOAL, QUE SE DOTE DE PERSOAL DE ADMINISTRACIÓN XERAL e todo isto para así realizar o traballo de xeito eficaz, reducir o atraso e impedir que se volva a producir tendo medios suficientes.

Estas demandas foron trasladadas á Consellaría de Política Social, como alegación á modificación da RPT.

Outras novas recentes

Mércores, 18 Novembro 2026

Comisión de Persoal: promoción interna corpos xerais, eleccions destino veterinarios, gardacostas, PSX, funcionarización de categorías en...

Na Comisión de Persoal do 17 de novembro votáronse as convocatorias de procesos selectivos de promoción interna para o corpo superior A1, corpo de xestión A2, e corpo auxiliar C2 . O noso voto foi en contra das bases desas convocatorias xa que non estamos conformes coas restricións do número de prazas, de escalas nin de recualificación dos postos ou dalgún sistema que...
Venres, 13 Novembro 2026

Promoción interna corpos xerais; funcionarización en excedencia (para CP 17/11/26)

A directora xeral de Emprego Público e Administración de Persoal convocounos a unha xuntanza da Comisión de Persoal que será o martes 17 de  novembro, coa seguinte Orde do día: Convocatoria do proceso de funcionarización para o persoal laboral fixo que está na situación de excedencia. Descargar Convocatoria de promoción interna ao corpo superior-A1. Descargar Convocatoria...
Luns, 09 Novembro 2026

A CIG convoca 17 mobilizacións por todo o país na xornada de folga xeral do 11N

A central nacionalista empraza a clase traballadora galega a visibilizar a parálise da actividade económica e laboral da xornada de 24 horas asistindo masivamente ás marchas A CIG anunciou a convocatoria dun total de 17 mobilizacións por todo o país durante a xornada de folga xeral prevista para o vindeiro 11 de novembro baixo o lema 'Galiza en loita por unha vida digna'...