- Detalles
A Axencia Galega da Calidade Alimentaria convócanos por fin a negociar, pero a orde de puntos a tratar é insuficiente e…..interesada?
Creación dunha praza de xefatura de sección de habilitación
A creación da praza, según nos trasladan, responde a unha inaxeitada dotación de persoal na creación da axencia que agora intentan corrixir. Están a recibir axuda para a xestión das nóminas da Consellería e con esta creación perseguen acadar a autonomía plena na xestión.
As prazas a amortizar levan tempo sen ocupar, pero na CIG lamentamos que a amortización da praza de Auxiliar de Internado de Guísamo segue a consolidar a perda do servizo público que supoñía o internado da escola.
Apertura das prazas de Director/a dos Centros de Formación e Experimentación Agroforestal a docentes
Na actualidade, estas prazan poden ser ocupadas por persoal funcionario da Xunta de Galiza. Coa modificación abriríanse a ser ocupadas indistintamente por persoal funcionario da Xunta, do Estado, de outras Comunidades Autónomas e persoal docente con destino en Galiza.
Na documentación xustifican a apertura das prazas ao profesorado de Educación en base á finalidade esencialmente educativa dos CFEAs.
Porén, na intervención o argumento principal da dirección de AGACAL é que teñen dificultades para cubrir algunhas prazas, especialmente as dos centros de Lugo, e concretan que a praza de dirección do CFEA de Becerreá estivo varios meses sen cubrir habendo profesorado da Consellería de Educación interesado.
A CIG consideramos que estas prazas sempre foron cubertas con persoal propio. Non está suficientemente xustificada a necesidade de abrir as prazas a outras escalas. Se hai dificultades para cubrilas, o que habería que preguntarse é por que ninguén as quere. Preocúpanos especialmente unha apertura tan ampla por ser de Libre Designación.
En calquera caso, de abrírense as prazas a persoal de fora de Galiza, deben engadir como requisitos:
- formación específica: 640 Para persoal doutra administración, curso de perfeccionamento de galego, xa que as están abrindo a persoal doutas CCAA.
- 544 MASTER UNIVERSITARIO EN FORMACIÓN DO PROFESORADO OU EQUIVALENTE. O perfil pedagóxico e as razóns de adecuación normativa que alegan na xustificación funcional non se sosteñen sen este requisito indispensable.
Dirección do Centro de Investigacións Agrarias de Mabegondo: retirar o requisito indispensable de Doutorado en materia agraria
Tal como din na memoria funcional, insisten en que “a idoneidade para a dirección dun centro de investigación se xustifica dende a capacidade xestora e directiva de quen a exerce, non desde o nivel académico investigador”.
Que di a CIG:
- Que expliquen por que puxeron o requisito ás agachadas na RPT de 2021. Ningunha OOSS o solicitou, tampouco se xustificou en ningún documento naquel momento.
- A CIG solicitou a xustificación á Consellería do medio Rural e á Dirección Xeral de Emprego Público de que a persoa que ocupa o posto actualmente ten o requisito. Non recibimos resposta. Na reunión, a dirección da axencia confirma que non o ten e alega que “Función Pública o autorizou”.
Nós reclamamos que hai outros temas pendentes de modificación na RPT de AGACAL, que a CIG leva solicitando reiteradamente negociar catro anos, logo da negociación apresurada da RPT no ano 2021 na que incluso a representación da dirección de AGACAL dixo entón que era unha RPT mediocre “para ir arrincando”.
Solicitamos a negociación completa dos temas pendentes e a eliminación das desigualdades sen máis demora nen escusas.
Contestan que os motivos para non negociar se manteñen: teñen 11 prazas sen orzamento dende a creación da AGACAL e agardan á aplicación do Decreto de Persoal Investigador (que tiña prevista a entrada en vigor en xaneiro de 2023).
Solicitamos tamén que se nos envíe a RPT completa coas liñas orzamentarias, porque os números non cadran. (Incluíndo as prazas de INGACAL, que non están na RPT).
- Detalles
Publícase o Real Decreto-lei que regula as cotizacións adicionais do persoal bombeiro forestal e axentes ambientais e que desbloquea a xubilación anticipada do persoal axente ambiental
A CIG-Autonómica valora positivamente a publicación no BOE do Real Decreto-lei 16/2025, do 23 de decembro, que regula as cotizacións adicionais para axentes forestais, ambientais e persoal bombeiro forestal, e que permite facer efectivo o dereito á xubilación anticipada dos e das axentes ambientais.
Este dereito, que aínda que fora recoñecido pola Lei 4/2024, do 8 de novembro, básica de axentes forestais e ambientais, non se podía exercer na práctica, xa que o Real Decreto 919/2025, do 15 de outubro, polo que se establecía o coeficiente redutor da idade de xubilación para este colectivo, pospuña a súa vixencia e aplicación á aprobación da Lei de Orzamentos Xerais do Estado ou a unha norma posterior que regulase a cotización adicional. Esa norma é precisamente o Real Decreto-lei aprobado, que fai efectivo o dereito.
Redución da idade de xubilación e requisitos
Coa entrada en vigor desta regulación, os e as axentes ambientais poderán reducir a súa idade ordinaria de xubilación, ao igual que o persoal bombeiro forestal, aplicando un coeficiente redutor do 0,20 por cada ano traballado, sempre que se cumpra o requisito dun mínimo de 15 anos de actividade en postos con coeficientes redutores.
A CIG destaca especialmente que, grazas ás achegas realizadas durante o proceso de participación dos reais decretos, recolleuse a posibilidade de sumar e compatibilizar os períodos traballados como axente ambiental e como bombeiro/a forestal. Esta cuestión é fundamental na Galiza, onde é habitual que moitas persoas alternen ambas funcións ao longo da súa vida laboral, e permite que estes tempos computen conxuntamente para cumprir os requisitos e calcular a redución da idade de xubilación.
Cotización adicional e aplicación en Galiza para bombeiras forestais e axentes ambientais
O Real Decreto-lei fixa unha cotización adicional total do 10,60 %, da que o 8,84 % corre a cargo da Xunta e o 1,76 % a cargo da persoa traballadora. No caso de Galiza esta cotización xa está prevista nos orzamentos da Xunta para o ano 2026, polo que a aplicación comezará a facerse efectiva a partir dese exercicio.
A evolución: de textos ocos a leis básicas que afianzan dereitos
Para a CIG-Autonómica, este avance é o resultado dun traballo sindical sostido desde o ano 2018, tanto na tramitación das leis básicas como no desenvolvemento regulamentario posterior. Inicialmente ningún dos textos das leis básicas contiña os coeficientes redutores e que, mesmo, se intentou limitar o dereito á xubilación anticipada nos primeiros reais decretos de regulación aplicando porcentaxes máximas anuais producindo unha discriminación intolerable.
Cos bombeiros e bombeiras forestais conseguimos o recoñecemento expreso da categoría: era ou SI ou SI
Logo de mais de 10 anos de loita e dende que no 2015 no gañamos xudicialmente a denominación de bombeira/o forestal, e xa estabamos a pelexar o dereito de xubilación en base a regulación de bombeiros. Coa lei traballamos arreo nos grupos de traballo e participamos nas achegas aos documentos normativos, pero aínda que o pretenderon, non íamos permitir nin un paso atrás nin rebaixas na aplicación dos coeficientes.
Axentes ambientais: unha lei impulsada tras o asasinato de dous compañeiros en Cataluña
A necesidade desta lei básica naceu tras a forte presión social provocada polo asasinato de dous axentes forestais en Cataluña, coa intención de avanzar na seguridade do colectivo. Porén, o texto inicial era pouco máis ca unha declaración de intencións, sen obrigas nin dereitos reais. Mesmo despois das reunións mantidas cos grupos do Congreso e das achegas realizadas no MITECO no que se incluíron bastantes melloras, a lei básica de axentes forestais e ambientais chegou ao Congreso en 2024 sen incluír o dereito á xubilación anticipada, que só se incorporou tras a presión sindical da CIG exercida ata o último momento, xunto co papel decisivo do BNG no Congreso dos Deputados.
Non son aceptables normas básicas baleiras que afecten ao persoal autonómico ou que rebaixen dereitos que estabamos a conseguir pola vía xudicial ou incluso que introduzan fórmulas de sometemento aos corpos e forzas de seguridade como na de axentes. Resultaba imprescindible que ás leis recollesen dereitos que deben ser regulados polo estado español, como a xubilación anticipada ou o recoñecemento das enfermidades profesionais, nun colectivo sometido a condicións de especial penosidade, perigo e risco.
Todos os compañeiros e compañeiras estamos de parabéns, e definitivamente, a publicación deste Real Decreto-lei culmina un proceso longo de reivindicación e fai xustiza. Xa estamos a loitar porque queda pendente o estudo e recoñecemento das enfermidades profesionais. E tamén a aplicación efectiva das leis pola Xunta de Galiza, que máis dun ano despois da súa entrada en vigor, ten a maior parte dos deberes sen facer.
OS DEREITOS CONQUÍSTANSE LOITANDO
- Detalles
No DOG do 29/12/2025 publican a RESOLUCIÓN do 16 de decembro de 2025, da Dirección Xeral de Recursos Humanos, pola que se convoca concurso-oposición para o ingreso en diversas clases de persoal funcionario sanitario da escala de saúde pública e administración sanitaria (Lei 17/1989, do 23 de outubro).
Convócase concurso-oposición para o ingreso nas clases de persoal funcionario sanitario da escala de saúde pública e administración sanitaria (Lei 17/1989, do 23 de outubro), que se especifican no anexo I desta resolución.
As persoas que desexen tomar parte no proceso selectivo deberán cubrir unha única solicitude de participación, en modelo normalizado, a través da Oficina Virtual do Profesional (Fides/expedient-e/Sección de Procesos/OPE), á cal se accederá seguindo as instrucións que se establecen no anexo VI, e que, logo de formalizada electronicamente, deberán imprimir, asinar e presentar nos lugares e prazo indicados nos puntos 5.2 e 5.3, respectivamente.
5.2. Lugar de presentación. As solicitudes de participación no concurso-oposición dirixiranse a unha unidade de validación das relacionadas no propio formulario electrónico de inscrición e poderán presentarse por rexistro electrónico, de forma presencial no Rexistro Xeral dos servizos centrais e periféricos da Consellería de Sanidade e do Servizo Galego de Saúde, ou a través de calquera dos procedementos do artigo 16.4 da Lei 39/2015, do 1 de outubro, do procedemento administrativo común das administracións públicas.
5.3. Prazo de presentación. O prazo para a presentación das solicitudes de participación será dun mes contado desde o día seguinte ao da publicación desta convocatoria no Diario Oficial de Galiza.
ANEXO I Prazas e titulación
- Detalles
O luns 22 de decembro tivemos a sorpresa de Nadal. Segundo CSIF a CIG frea a suba salarial acordada por eles, entre outros, para os seguintes catro anos.
En primeiro lugar, a CIG impugna un acordo, non o Real Decreto-lei que mantén as ridículas subas, co cal esas subas están garantidas. Como explicamos aquí, isto non implicaría en ningún caso o decaemento do RD-lei que establece a suba.
O que si vai implicar a demanda é que teñan que volver a constituír unha mesa de negociación ONDE A CIG é parte, e que en todo caso só pode significar que se acorden subas por riba do xa pactado e/ou unha cláusula de garantía salarial.
En segundo lugar, a CIG non anulou a carreira profesional. A CIG conseguiu que na carreira entrase todo o persoal que os outros sindicatos deixaron fora contra a xurisprudencia e o criterio dos tribunais.
Tampouco a CIG paralizou a carreira, senón que foron CCOO, UGT, e a Xunta as que o fixeron, xa que a sentenza da CIG que segundo CSIF paralizou a carreira, é posterior (17/03/2021) á data na que tiñan que ter posto en marcha o grao II (31/12/2020).
O que non din é que eles SÍ PEDIRON A NULIDADE DA CARREIRA PROFESIONAL, como ben vos contamos en varias novas.
E o que xa é de broma é acusarnos de "desobedecer" ao BNG. A CIG é unha organización soberana, unha organización que conflúe con outras en moitos aspectos e noutros non, e que mantén a súa independencia e criterios propios á hora de decidir a súa política sindical.
Parece que antes de comezar as festas xa temos aos cuñaos sentados á mesa.
Bo Nadal
- Detalles
Na Comisión de Persoal (CP) do xoves 18 de decembro, quedaron aprobadas: 1) modificación da RPT da APLU, 2) Oferta de Emprego Público do ano 2025 das escalas sanitarias, 3) convocatoria de proceso selectivo de escalas sanitarias.
RPT DA APLU
CIG rexeita o incremento do complemento específico dos postos das asesorías xurídicas aprobado no Parlamento de Galiza, por non ter sido negociado coas organizacións sindicais, e por non ser unha medida xenérica de efectos sobre o conxunto do persoal. Tampouco compartimos a amortización dun posto de subinspección en Pontevedra para centralizalo en Servizos Centrais, nin a apertura de varias xefaturas de servizo á administración local mentres non haxa un acordo de reciprocidade.
CIG vota en contra, CCOO abstención, CSIF en contra, UGT a favor.
OEP-2025 DE ESCALAS SANITARIAS-LEI 17/89
Unha oferta cunha promoción interna insuficiente, que vai permitir superar o proceso obtendo unha nota de cero en galego, sen esixencias de axilidade, que permite que se incrementen prazas por previsión de xubilacións pero persoas aprobadas poidan quedar fora se non se efectivizou a xubilación en dous anos.
CIG vota en contra, CCOO abstención, CSIF a favor, UGT abstención.
PROCESO SELECTIVO DE ESCALAS SANITARIAS-LEI 17/89
Correspóndese coa convocatoria da totalidade das ofertas de emprego dos anos 2022 a 2024. Non aceptaron incorporar tamén a OEP do 2025 que tamén ese día quedou aprobada. Non moveron unha soa letra nas tres xuntanzas que tivemos. Nen sequera respostaron a se era necesario ou non revisar o programa da parte específica, que é do ano 2021. Non estamos conformes en como puntúan a experiencia. Rexeitamos a puntuación por permanencia. Non queremos a formación impartidas mentres non haxa criterios obxectivos e transparentes para a selección das persoas formadoras. Rexeitamos que poida superar o proceso obtendo unha nota de “0” en galego.
CIG vota en contra, CCOO abstención, CSIF a favor, UGT en contra.
PAGO DE ATRASOS E CARREIRA
Informa a directora xeral de Emprego Público e Administración de Persoal de que o pago do 2,5% pendente do 2025 realizarase nas dúas primeiras semanas do mes de xaneiro. Irá na nómina do mes de decembro, que se xerará despois da nómina que se ingresará aproximadamente o 22/12/2025. Será igual para todo o persoal da Xunta, incluídos docentes e persoal estatuario do Sergas. Tamén se ingresará o importe do grao extraordinario a todas as persoas incluídas no primeiro lote de carreira.
- Detalles
A CIG-Administración Autonómica denuncia que o 9 de decembro o Consello da Xunta de Galiza aprobou unha partida orzamentaria de 1.012.958,53 euros destinada ao pagamento de gratificacións extraordinarias e horas extra a parte do persoal do dispositivo de extinción de incendios forestais —persoal técnico, axentes ambientais e bombeiras forestais—, sen negociación coa representación do persoal e cunha absoluta falta de transparencia nos criterios de concesión.
Esta partida desagrégase en 670.897,03 euros correspondentes ao persoal funcionario e 342.061,50 euros destinados ao persoal laboral, cuxos pagamentos anunciaron que van incluír na nómina do mes de decembro. Como exemplo do dilapidamento e da falla de xustificación dos motivos causantes determinadas xefaturas provinciais van percibir arredor de 14.000 euros, cando xa contan cun complemento de dispoñibilidade.
A Xunta afirmou publicamente que estas gratificacións foron negociadas cos sindicatos, unha afirmación rotundamente falsa. A CIG, forza sindical maioritaria, non foi convocada a ningunha mesa de negociación. Isto evidencia unha grave falta de respecto polos dereitos de representación do persoal empregado público e pon de manifesto, unha vez máis, a actitude chulesca da Consellaría do Medio Rural, que entendemos que se reúne con “persoas delegadas de sindicatos afíns” e acordan o reparto de cartos para tentar aplacar a súa ineptitude na xestión dos lumes.
Esta opacidade no reparto das cantidades está a xerar importantes agravios comparativos e un maior deterioro do clima laboral, xa seriamente danado pola nefasta xestión de persoal que realiza a Consellaría e que cada ano vén sendo denunciada pola CIG.
A utilización de máis de 1 millón de euros sen criterios públicos, sen documentar e sen informar sequera ás xuntas de persoal nin ao Comité Intercentros, está a xerar un profundo malestar no conxunto do persoal da Administración. Por exemplo, o persoal administrativo dos corpos xerais de diferentes consellarías, que asumiron cargas extraordinarias de traballo durante o pasado verán, non recibiron un recoñecemento equivalente.
Na vez de asumir responsabilidades após a vaga de lumes do pasado verán, o presidente da Xunta opta por recuperar políticas retributivas obsoletas (as retribucións variables elimináronse no SPIF entre finais dos 90 e o 2004) introducindo, ademais, un incentivo perverso nun servizo tan sensible como a loita contra os incendios forestais, ao vincular maiores retribucións con resultados tan dramáticos como a superficie queimada. Esta deriva resulta absolutamente inaceptable: no ano 2022 repartíronse máis de 200.000 euros, no 2025 supérase o millón, e a pregunta é inevitable: na próxima vaga de lumes, canto máis pensa repartir a Xunta?
Ante a gravidade dos feitos a CIG está a valorar a situación cos seus servizos xurídicos, presentará unha denuncia perante o Consello de Contas e dirixirase formalmente á presidencia da Xunta e á Consellaría do Medio Rural para esixir transparencia, acceso á documentación e respecto aos dereitos de representación do persoal empregado público.
Ante as vagas de lume, a solución pasa por prever, fortalecer o sistema de extinción —mellorando as condicións laborais e achegando medios— e restaurar o medio natural queimado, non por incentivar economicamente o fracaso.
- Detalles
No DOG do 18/12/2025 publican a RESOLUCIÓN do 10 de decembro de 2025, da Dirección Xeral de Emprego Público e Administración de Persoal, pola que se fan públicas as listas definitivas para o desempeño transitorio de prazas reservadas a persoal funcionario e a contratación temporal de persoal laboral da Xunta de Galiza, nas cales se incorporan as solicitudes presentadas no prazo extraordinario aberto para as persoas incluídas nas listas do Consorcio Galego de Servizos de Igualdade e Benestar e no prazo ordinario establecido no artigo 6 do Decreto 37/2006, do 2 de marzo.
Fan públicas as listas definitivas para o desempeño transitorio de prazas reservadas a persoal funcionario dos corpos, escalas e especialidades que se relacionan no anexo I desta resolución, así como para o desempeño transitorio de postos reservados a persoal laboral dos grupos e categorías que se relacionan no anexo II.
Estas listas incorporan as solicitudes presentadas no prazo extraordinario comprendido entre o 1 de marzo e o 30 de abril para as persoas incluídas nas listas do Consorcio Galego de Servizos de Igualdade e Benestar e no prazo ordinario comprendido entre o 1 de marzo e o 30 de abril, establecido no artigo 6 do Decreto 37/2006, do 2 de marzo.
As listas poderán consultarse no portal web corporativo da Xunta de Galiza https://funcionpublica.xunta.gal, epígrafe de listas de contratación e no Servizo de Atención e Información á Cidadanía a través do teléfono 012.
As listas entrarán en vigor a partir do día seguinte ao da publicación desta resolución no Diario Oficial de Galiza.
As listas reguladas polo Decreto 37/2006, do 2 de marzo (DOG núm. 48, do 9 de marzo), substituirán as listas propias do Consorcio Galego de Servizos de Igualdade e Benestar na data que expresamente se determine na resolución da Dirección Xeral de Emprego Público e Administración de Persoal, que se publicará tan pronto como se elaboren as listas correspondentes ás escalas análogas ás categorías existentes no consorcio e quede garantida a viabilidade técnica do sistema de citacións.
Esta resolución pola que se establecerá a substitución dunha determinada lista propia do Consorcio Galego de Servizos de Igualdade e Benestar por unha lista regulada polo Decreto 37/2006, do 2 de marzo (DOG núm. 48, do 9 de marzo), será publicada no Diario Oficial de Galiza.
- Detalles
Nunha nota informativa que nos veñen de enviar dende a DXEP e que tamén colgan na súa páxina, as eleccións de destino definitivo dos procesos pendentes do SPIF adíanse ata o día 22 de decembro.
Reproducimos aquí o contido íntegro da nota:
Eleccións de destino definitivo dos procesos selectivos vinculados ao Servizo de Prevención e Defensa contra Incendios Forestais da Administración xeral da Comunidade Autónoma de Galicia. (SPIF)
No DOG do 12 de decembro publicáronse as Resolucións do 11 de decembro de 2025 polas que se convocan ao acto de elección de destino ás persoas aspirantes que superaron os procesos selectivos para o ingreso nas escalas, especialidades ou categorías laborais vinculadas ao Servizo de Prevención e Defensa contra Incendios Forestais da Administración xeral da Comunidade Autónoma de Galicia.
En relación co dito acto, infórmase ás persoas aspirantes que o prazo de cinco (5) días hábiles para a selección telemática, a través do sistema electrónico, dos postos ofertados segundo á súa orde de prelación, que estaba previsto que se iniciara o 17 de decembro de 2025, comezará o vindeiro 22 de decembro de 2025.
- Detalles
A Consellería do Medio Ambiente e Cambio Climático convocounos a unha xuntanza para o xoves 18 de decembro, para tratar a súa proposta de modificación da Relación de Postos de Traballo. En grandes liñas, a proposta ten por obxecto:
- Asumir os postos ocupados transferidos do Estado polo traspaso de funcións e servizos da Administración do Estado á Comunidade Autónoma de Galiza en materia de ordenación e xestión do litoral.
- Crear 3 postos novos necesarios para a carga de traballo existente.
Se é do teu interese, podes descargar a documentación e contactar coa CIG.
- Detalles
O sábado 13 de decembro, a CIG convocou xunto con outras organización sindicais, unha manifestación en Compostela para denunciar o incumprimento do Acordo que a Consellería de Política Social asinou no ano 2023 con CIG, CCOO, CSIF e UGT.
A piques de rematar a vixencia do Acordo, a Administración aínda non activou as subcomisións necesarias para desenvolvelo. Está a Consellería a agardar pola caducidade do Acordo para comezar a cumprilo?
Un dos exemplos máis graves é a falta do protocolo fronte ás agresións físicas e verbais, imprescindible nos centros de atención directa. Hoxe en día están a ingresar persoas con patoloxías psiquiátricas ou adiccións, e o persoal enfróntase a situacións de risco sen as ferramentas nin os recursos mínimos. Isto non é unha opinión, é o día a día de quen sostén estes servizos.
A realidade é que os rateos de persoal están obsoletos desde 2006, e isto tradúcese en situacións límite: centros onde unha soa persoa traballa de noite atendendo a todos os residentes mesmo en varios andares diferentes. A Administración está a facer que o persoal asuma responsabilidades imposibles, poñendo en risco tanto ao persoal como ás persoas usuarias. Durante a pandemia e nos meses posteriores reforzouse o persoal e quedou demostrado que era necesario para dar un servizo axeitado. Pero a resposta da Consellería foi despedilo en canto puido e volver a deixar os centros en situación de mínimos permanentes.
E isto non afecta só aos centros de maiores ou menores. Dependencia, os EVO e os Equipos de Menores, escolas infantís... son servizos que a día de hoxe están igualmente saturados. No caso dos Equipos de Menores falamos de persoal técnico con ata 140 expedientes, cando o rateo recomendado é de 20. É evidente que así non se pode garantir a protección da infancia nin un seguimento digno dos casos. Ademais, en demasiados lugares trabállase en instalacións indignas, sen privacidade e incumprindo mínimos básicos para respectar a integridade das persoas usuarias.
Por iso dicimos alto e claro: a Consellería de Política Social ten abandonados os servizos sociais públicos e ao persoal que os sostén!. Esiximos o reforzo inmediato dos cadros de persoal, a creación das prazas necesarias e a apertura dunha mesa de negociación seria, con vontade real de resolver problemas, non de adialos.
Os servizos públicos non se sosteñen con discursos, senón con recursos e con respecto ao seu persoal e as persoas usuarias. E ese respecto comeza por cumprir os acordos asinados!