Novas por contido

Despois de que a CIG puxera enriba da mesa que non se poden negociar incrementos ridículos como os derivados dos acordos de Madrid e obviar a necesidade de establecer unha carreira profesional, Función Pública ponnos un borrador enriba da mesa. Isto, que nun principio pode parecer razoábel, deixou de selo en canto Función Pública amosou a súa intención de negociar e pechar o asunto en poucos días, en pleno mes de agosto, coa maior parte dos/as empregados/as públicos/as de vacacións. Función Pública teima en ligar o acordo de mellora do emprego público e o acordo da carreira profesional, sen negociación real e cunhas condicións inaceptábeis. Pola súa importancia e transcendencia para o conxunto de empregadas e empregados públicos, a carreira profesional precisa dunha negociación propia e exclusiva á marxe de calquera outra materia.

Varios sindicatos xa estaban dispostos a asinar hai semanas o acordo de mellora de emprego e condicións de traballo tal e como estaba redactado, mais despois de que lles afearamos a conduta tan pouco reivindicativa e de que deixaramos en evidencia á Función Pública lembrándolles que no Estado xa recuperaron o 100% do complemento no caso de IT, a Administración acepta comprometerse a restaurar o complemento do 100% asumindo así a nosa reivindicación. Pasamos así duns textos iniciais aceptados por outros sindicatos nos que a Xunta simplemente se comprometía a negociar no futuro os casos en que se pagaría o 100% por Incapacidade Temporal, a termos enriba da mesa unha proposta de compensar o 100% para todos os casos de IT.

Pero non abonda. Aínda que quedemos en solitario a CIG mantén o pulso:

  • Non estamos dispostos a aceptar incrementos retributivos que non garantan o mantemento e incremento do poder adquisitivo. Por exemplo, no ano 2018 a suba vai ser inferior ao IPC. Demandamos por tanto unha cláusula de revisión salarial.
  • Está moi ben discutir os colectivos para os que se pode establecer unha xornada inferior a 37,5 horas semanais. A CIG está conforme en estudar todos os casos, pero partindo da xornada máxima de 35 horas para todos e todas.
  • Esiximos a derrogación inmediata da lei 1/2012 de medidas temporais que supuxo a suspensión de varios artigos do V Convenio colectivo, entre os que destaca o artigo 19, que castiga especialmente ao persoal que presta servizos en centros asistenciais de Política Social.
  • Queremos recuperar o Fondo de Acción Social.

En canto á carreira profesional, non podemos aceptar propostas por debaixo das doutros colectivos, o que na práctica se traduce na existencia de empregados públicos de primeira e de segunda:

  • Os fondos consignados son insuficientes e os tramos para a percepción do complemento non son os acaídos, a parte de que todo está supeditado á dispoñibilidade orzamentaria, polo que a carreira profesional non está plenamente garantida.
  • Non estamos conformes coa calendarización proposta. O período de carencia e incremento paulatino é ridícula. Agardar ao ano 2027 para o cobro do 100% da cantidade do grao asignado é unha tomadura de cabelo.
  • O período para acadar o grao 4 vai ser imposíbel de conseguir para moitos dos traballadores/as a pesares de contar coa antigüidade necesaria.
  • O persoal laboral queda fóra da carreira profesional.
  • A súa concesión está vinculada a factores totalmente subxectivos (podería ser un informe favorábel do superior xerárquico) e fóra do control sindical.

Finalmente, diante da presión e da negativa da CIG, a negociación do acordo de mellora de emprego e condicións de traballo queda para setembro. E con elo tamén a negociación da carreira profesional. Non podía ser doutro xeito, non era aceptábel meter con calzador e ás agachadas un acordo de tanta repercusión nas condicións de traballo do persoal funcionario e laboral.

Por agora a cousa fica parada, mais Función Pública xa amosou a chantaxe á que quere someter aos sindicatos. Nunha actitude claramente mafiosa, Función Pública ameaza aos sindicatos que non asinen con quedar fóra do acceso a unha chea de información e negociacións. Pero aínda que nos implique custes como sindicato, a CIG non vai tragar con migallas. Só asinaremos se o acordo é netamente positivo. E cada quen que asuma a responsabilidade dos seus actos.

Outras novas recentes

Venres, 13 Novembro 2026

Agacal, Gain e Intecmar quedan para a seguinte OEP de funcionarización

A directora xeral de Emprego Público comunicounos na Mesa Xeral do 10 de novembro de 2026 que o persoal de AGACAL, GAIN e INTECMAR quedará para a seguinte OEP de funcionarización (para a cal non teñen data) porque aínda non está integrado. A integración é un requisito previo para que o persoal que o desexe poida funcionarizarse. Sen convocatoria á CIG para as negociacións...
Venres, 13 Novembro 2026

Promoción interna corpos xerais; funcionarización en excedencia (para CP 17/11/26)

A directora xeral de Emprego Público e Administración de Persoal convocounos a unha xuntanza da Comisión de Persoal que será o martes 17 de  novembro, coa seguinte Orde do día: Convocatoria do proceso de funcionarización para o persoal laboral fixo que está na situación de excedencia. Descargar Convocatoria de promoción interna ao corpo superior-A1. Descargar Convocatoria...
Venres, 13 Novembro 2026

RPT Emprego, Comercio e Emigración (11/11/26)

A Consellería de Emprego, Comercio e Emigración, convocou aos sindicatos a unha xuntanza para falar da súa proposta de modificación da Relación de Postos de Traballo da consellería. Descargar Contactamos coa consellería para pedir explicacións polo feito de que nos convocasen con menos de 48 horas de antelación (restando a xornada de Folga Xeral), o que imposibilita estudar...