Novas por contido

A CIG-Administración Autonómica reuniuse cos grupos parlamentarios do PSOE, BNG, Común de Esquerda e Mixto para explicar o contido da Proposición non de Lei rexistrada o pasado martes, 14 de xaneiro, para a formación do persoal do servizo de extinción de incendios da Xunta de Galiza para avanzar cara unha maior profesionalización.

Desde o BNG comprometéronse a presentar unha iniciativa parlamentaria para o desenvolvemento dun plan formativo e de certificación profesional para facer un servizo profesionalizado  e versátil para o apoio en continxencias no medio natural e rural.

Pola súa banda o PSOE manifestou o seu apoio á iniciativa e a utilización de todo o servizo para apoio en continxencias, tal e como propón o informe del comité de expertos, entendendo que a clave é a formación para todas as certificacións homologadas e a versatilidade na multiemerxencia no medio rural.

No mesmo sentido, o Grupo Común de Esquerda comprometeuse tamén a presentar unha iniciativa para a formación regulada do persoal do servizo de incendios. Propuxeron ademais estudar a adaptación dos currículos formativos de enxeñería de Montes, Técnica e ciclos para incluír estas competencias.

O Grupo mixto, pola súa banda, xa presentou directamente a iniciativa da CIG de formación para o servizo de incendios.

Desde a CIG-Administración Autonómica solicitamos ademais aos grupos que interveñan no pleno e cuestionen á Xunta e ao goberno do PP por negar a compatibilidade ao persoal fixo descontinuo e non permitirlle traballar nos períodos de descontinuidade tanto nos concellos como na empresa pública SEAGA.

PNL para formación

Desde a CIG-Administración Autonómica decidimos promover esta Proposición Non de Lei porque a Xunta está a vender futuras planificacións e incluso unha nova lei de incendios mentres non cumpre os acordos acadados e non avanza na formación do seu persoal. É necesario comezar xa a preparar seriamente ao persoal de cara ás continxencias relacionadas cos incendios forestais e as emerxencias ambientais.

Continuamos a loitar pola formación como piar básico para a profesionalización e estabilización do SPIF. Por ese motivo, xa presentamos numerosas iniciativas que teñen como obxectivo conseguir que o Servizo de incendios teña a formación máis axeitada consonte ás súas peculiares características.

Módulos formativos

A Proposición Non de Lei que vén de ser rexistrada pretende que o Parlamento inste á Xunta de Galiza a implantar os módulos formativos correspondentes á cualificación profesional SEA596_3 de coordinación en operacións de incendios forestais e apoio en continxencias no medio natural e rural.

Estes módulos van dirixidos a axentes forestais, bombeiros/as forestais xefes/as de brigada, coordinadoras/es de unidades de prevención e extinción de incendios forestais, xefe/a de unidade de prevención e extinción de incendios forestais, e engadimos a todo o persoal do SPIF que teña xa o certificado de nivel 2  SEA 595_2.

Xunto a isto, reitérase a demanda, á Xunta, de que se imparta, ao persoal do SPIF a formación correspondente aos módulos das cualificacións profesionais SEA595_2 e SEA596_3.

Os obxectivos desta formación son os seguintes:

  • Mellorar o desenvolvemento das operacións de emerxencia referidas aos incendios forestais, e o apoio a continxencias no medio natural.
  • Obter a certificación correspondente superior esixida, a SEA596_3

A formación requirida non é obxecto da improvisación, xa que o SPIF ten plenamente xustificado o seu encaixe normativo coma servizo de emerxencias por varias vías, entre as que apunta o RD624/2013 do 2 de agosto e a Lei 17/2015 do 9 de xullo de Protección Civil - lexislación básica-.

Na CIG seguimos a defender que todo o persoal do SPIF teña a mellor formación posíbel para mellorar a súa seguridade, profesionalización, estabilidade e para a mellor asistencia a toda a poboación do rural galego diante da emerxencia climática.

Outras novas recentes

Xoves, 19 Novembro 2026

O sector dos coidados e a atención ás persoas en loita!

As traballadoras do sector de coidados e atención denuncian a precariedade da súa situación laboral e dos servizos que se prestan desde a Consellería de Política Social e a Consellería de Educación. Centos de manifestantes marcharon en Santiago de Compostela o sábado 14 de novembro, reclamando a creación dun Servizo Público Galego de Atención ás Persoas que garanta servizos...
Xoves, 19 Novembro 2026

RPT Emprego, Comercio e Emigración (19/11/26)

A Consellería de Emprego, Comercio e Emigracion, convocounos a outra xuntanza, que vai ser o xoves 19 de novembro, para continuar coa sú aproposta de modificación da Relación de Postos de Traballo. Para esta xuntanza, a Consellería achegounos documentación complementaria que podes consultar aquí: Descargar Se queres dicirnos algo, podes contactar coa CIG.
Mércores, 18 Novembro 2026

RPT do Mar (centros de ensino) (26/11/26)

A Secretaría Xeral do Mar convocounos a unha xuntanza para o xoves 26 de novembro, para tratar unha proposta de modificación da súa Relación de Postos de Traballo. A proposta afecta ás escolas oficiais nautico-pesqueira de Ferrol e Ribeira, ao instituto en acuicultura da Illa de Arousa e ao instituto marítimo-pesqueiro do Atlántico de Vigo. En todos eles crean postos de...