Na Mesa Xeral do 18 de xuño, a CIG expuso unha serie de asuntos que afectan ao persoal das escalas sanitarias: reiteramos a exixencia de solución aos impedimentos á formación, a falta de concursos de traslados e a necesidade de abrir un debate sobre a integración forzada.
A CIG pon estes asuntos enriba de moitas Mesas Xerais de Negociación, obtendo a calada case sempre por resposta. Pero desta volta, e estando presente unha representante da consellaría de Sanidade, obtivemos o compromiso do Director Xeral da Función Pública de tratar estes asuntos con Sanidade e dar resposta antes de rematar o mes de xuño. Queremos crer na súa palabra.
Formación
Denunciamos ante a Mesa Xeral, unha vez máis, os atrancos á formación que reciben por parte da EGAP. Esquece a Escola que o persoal das escalas sanitarias son funcionarios e funcionarias de administración dunhas determinadas escalas relacionadas coa sanidade, non persoal estatutario dependente do SERGAS, independentemente de se prestan servizos en oficinas administrativas ou en centros sanitarios.
Concurso de traslados
Sabemos dalgunha clase das escalas sanitarias que levan 10 anos sen concurso de traslados, algo absolutamente inaceptábel. A CIG xa ten solicitado repetidamente unha solución a un problema que nace da situación de limbo destas escalas: actuando igual que a EGAP, Sanidade tamén esquece o réxime xurídico deste persoal funcionario pero non acaba de tratalos igual que ao persoal estatutario (no fondo saben que non o son), e Función Pública tampouco os asume como persoal propio.
Un exemplo desta situación de limbo foron algúns procesos selectivos para as escalas sanitarias: a diferenza doutros procesos impulsados por Función Pública e negociados no seu ámbito, estes foron impulsados por Sanidade e negociados na Mesa Sectorial de Negociación de Persoal Sanitario (é dicir, foron negociados entre representantes da consellería de Sanidade e delegados sindicais que non representan aos afectados).
A CIG-Autonómica exixe unha impediata negociación do concurso de traslados, dentro do ámbito da Mesa Sectorial de Negociación de Persoal Funcionario.
Integración
O Real decreto-lei 16/2012 (BOE do 24/04/2012, modificado no BOE do 14 de maio), de medidas urxentes para garantir a sustentabilidade do Sistema Nacional de Saúde e mellorar a calidade e seguridade das súas prestacións, [sic], introduce unha disposición adicional no Estatuto marco do persoal estatutario dos servizos de saúde que establece a "integración do persoal funcionario ao servizo de institucións sanitarias públicas".
Segundo esta norma, o persoal das escalas sanitarias que presta servizos en centros sanitarios ten que optar antes do 31 de decembro do 2013 entre integrarse como persoal estatutario ou permanecer como persoal funcionario pero prestando servizos en órganos administrativos fora das institucións sanitarias.
A CIG-Autonómica solicitou na Mesa Xeral unha negociación no ámbito de Función Pública para dar saída a esta situación antes da data límite