Novas por contido

Pasou xa máis dun mes desde que rematou o prazo para presentar alegacións ao borrador de instrucións da flexibilidade e teletraballo, que na práctica xa están aplicando as diferentes consellarías.

En todo este tempo só tivemos como novidades oficiais os datos de denegación da flexibilidade (a principios de abril) e máis a organización dun congreso internacional de conciliación da vida persoal, familiar e laboral onde a Xunta sacou peito en temas de conciliación.

Resulta especialmente gravoso, e así llo comentamos ao director de Función Pública, que a Administración estea incumprindo a lei: por un lado a de igualdade no tema da conciliación familiar e por outro a de procedemento administrativo, ao non resolver e comunicar as denegacións ou ao cambiar o sentido do silencio cunha resolución a posteriori. Teñen a obriga de resolver e teñen que executar o sentido do silencio positivo no caso da flexibilidade familiar e teletraballo e demandámoslle que non deixen ás persoas en situación de indefensión.

A realidade é que xa estamos vendo unha aplicación de feito das instrucións de flexibilidade e teletraballo desde o momento que nos achegaran o borrador e a Administración tiña claro por onde ía tirar. Foi entón cando comezaron a desatascar moitas solicitudes de flexibilidade familiar e as de teletraballo.

Os exiguos datos e ocultación das denegacións

Nos últimos datos achegados por Función Pública (de comezos de mes de abril) denegan con carácter xeral as flexibilidades automáticas de todo horario especial, de quendas e máis cando a xente se nega a coller as chaves, ademais duns 4 casos nos que a xefatura territorial esixe presenza antes das 9:00h. Achegan unha listaxe de 26 denegacións de solicitude de flexibilidade automática, todas servizos periféricos (9 Ourense, 8 A Coruña, 5 Pontevedra, 3 Ferrol, 1 Vigo). Insistimos nas alegacións presentadas ás instrucións con relación a estes temas: 1)hai que mirar cada horario especial, non se pode denegar con carácter xeral e 2) non se pode cargar exclusivamente a responsabilidade de abrir ou pechar o centro sobre cada persoal traballador que queira flexibilizar o seu horario.

Non hai máis: nin denegacións de solicitudes de flexibilidade familiar, nin denegación de teletraballo, a pesar de que nos consta que as está habendo. Pola contra, da nota de prensa da Xunta podemos sacar 2 datos novos: aprobáronse 5.539 peticións de flexibilidade horaria, ben sexa na súa modalidade automática ou por conciliación e 28 solicitudes de teletraballo.

E este é todo o apoio á familia que tanto cacarexa o partido que goberna a Xunta e así é como o aplica de portas para adentro: nin sequera é capaz de respectar a lei de igualdade na conciliación familiar e está denegando o teletraballo en casos nos que podería ser aplicable, deixando a súa aplicación nalgo realmente residual sobre os 2000 potenciais postos de traballo.

Outras novas recentes

Venres, 13 Novembro 2026

Promoción interna corpos xerais; funcionarización en excedencia (para CP 17/11/26)

A directora xeral de Emprego Público e Administración de Persoal convocounos a unha xuntanza da Comisión de Persoal que será o martes 17 de  novembro, coa seguinte Orde do día: Convocatoria do proceso de funcionarización para o persoal laboral fixo que está na situación de excedencia. Descargar Convocatoria de promoción interna ao corpo superior-A1. Descargar Convocatoria...
Venres, 13 Novembro 2026

RPT Emprego, Comercio e Emigración (11/11/26)

A Consellería de Emprego, Comercio e Emigración, convocou aos sindicatos a unha xuntanza para falar da súa proposta de modificación da Relación de Postos de Traballo da consellería. Descargar Contactamos coa consellería para pedir explicacións polo feito de que nos convocasen con menos de 48 horas de antelación (restando a xornada de Folga Xeral), o que imposibilita estudar...
Venres, 13 Novembro 2026

Promoción interna de corpos xerais; funcionarización en excedencia; finanzas-veterinarios/as-agacal-gain-intecmar (MSF e MX 10/11/26)

O martes 10, véspera da Folga Xeral, asistimos á Mesa Xeral e Mesa Sectorial de Persoal Funcionario, nas que se trataron as convocatorias de promoción interna a corpos xerais e dos procesos de funcionarización de persoal laboral fixo que está en excedencia. Na rolda aberta de intervencións a DXEP deu información da escala de finanzas, da repesca de funcionarización de...