102 deles en servizos públicos claves como centros de ensino e oficinas de emprego.
A Dirección Xeral de Función Pública ven de enviar ás OOSS o listado de postos a ofertar no próximo concurso de traslados de Corpos Xerais da Xunta de Galiza.
Neste concurso ofértanse 1563 prazas, 35 menos que no anterior. Pero ademais destes postos, 433 teñen a observación “Eliminarase por proposta de amortización”, e no caso de non ofertarse estaríamos ante unha redución dun 30% con respecto ao anterior concurso de traslados.
O director xeral de Función Pública fixo declaracións ambiguas en relación a si estes postos van a entrar no concurso ou non. En declaracións aos medios dixo "Si [o funcionario de carreira] gaña unha praza das que se ten previsto amortizar poderá ocupala porque será cambiada por outra". Pero o certo é que no listado aparecen como que se retiran do concurso.
Dun modo ou outro a intención declarada é a amortización o cal tería consecuencias graves tanto si se retiran do concurso como si permanecen.
A proposta de amortización é grave por moitos motivos:
- Redúcese o número de postos na Administración Pública galega coas consecuencias que ten para a prestación dos servizos públicos.
- Impídese a mobilidade xeográfica e a promoción vertical e horizontal dos funcionarios ao haber un 30% menos de postos aos que concursar.
- Lévase a termo a operación negada pola Consellería de Facenda de que non se vai reducir emprego público nin despedir interinos, pois todo o movemento que se faga no concurso vai implicar o despido de interinos.
- Amortízanse 88 prazas en centros de ensino público, e 14 en oficinas de emprego.
Xa antes de que se aproben os Orzamentos que van recoller a amortización dos postos se pon en marcha a destrución do sistema de emprego público, que comezou co acto de elección de destino do grupo A1, tal e como salientamos a pasada semana, e continúa agora co concurso de traslados de corpos xerais. Das 1153 prazas de persoal funcionario menos que se recollen nos Orzamentos, en apenas un mes a Xunta xa puxo en marcha o mecanismo para destruír 451 postos de funcionarios.
Despois de que dende a CIG pedísemos durante o ano 2012 en innumerábeis ocasións a convocatoria dun concurso de traslados, xa que o anterior foi convocado o 6 de maio de 2010 cando existe a obriga legal de convocalos anualmente, agora Función Pública decide convocalo sen apenas prazo para alegar e negocialo, para dar satisfacción ás demandas da DX de Orzamentos de poder amortizar canto antes os 1153 postos de traballo previstos.
Dende a CIG esiximos que non se amorticen eses postos de traballo e que se inclúan no concurso e denunciamos que este é un paso máis na destrución sistemática do emprego público e no deterioro da Administración Pública que pretende o Partido Popular.
