A CIG-Autonómica denunciou perante Inspección de Traballo e Sanidade a falla de material de protección nos centros de maiores da consellería de Política Social, incluído Consorcio Galego de Servizos de Igualdade e Benestar. A día de hoxe en moitos deles aínda non se tomaron as medidas de prevención necesarias nin se dotou de Equipos de Protección Individual (EPI) adecuado ao persoal e ademais non se tomaron medidas organizativas necesarias na xestión do persoal.
O esforzo que están facendo as compañeiras e compañeiros que traballan nos centros de Política Social, e especialmente nas residencias de maiores, por atender ás persoas maiores que viven alí, é máis que meritorio. Non temos dúbida en que as persoas maiores están no centro e son un grupo de risco perante a infección do COVID 19, e tamén somos conscientes de que as persoas traballadoras destes centros somos potenciais vectores de infección. Para a CIG é perverso que a Xunta non lles proporcione o material necesario (incluso o traen dende a casa) xa que temos claro que o coidado e as precaucións que se teñen que adoptar deben ser as máximas posibles, as mesmas que emprega o persoal sanitario.
A falta de medios materiais e persoais, de EPI´s e de protocolos específicos é o principal problema ao que se enfrontan estas traballadoras e traballadores á hora de atender ás persoas maiores. Para colmo, a consellería informa aos centros de que “só se actuaría con EPIS completos no caso de positivos no centro”, incumprindo así o deber legal de prevención do risco que teñen que ter cara o seu persoal e persoas usuarias. É dicir, só poñen medios unha vez que a infección estea dentro. Se é así co período de incubación e latencia que ten a enfermidade poden estar infectadas todas as persoas usuarias cando saia a luz o primeiro caso.
É difícil entender como aínda hoxe, 20 de marzo hai centros sociais da Xunta onde non temos o material de protección nin plan de actuación específico para combater a epidemia, máis cando estes centros deberan ter stock perante outros tipos de alertas sanitarias que se pode dar habitualmente. Rexeitamos a actitude de “botar balóns fora“ da Xunta de Galiza culpando ao Goberno central da súa ineficacia e pasotismo e da súa responsabilidade.
Dende a CIG temos en conta como está afectando o COVID-19 neste sector da poboación, e concretamente nas persoas usuarias das residencias en todo o Estado e que hai xa dúas residencias privadas de Galiza con infectados confirmados e dous casos na residencia da Xunta de maiores de Ferrol (asintomáticos). Polo que é evidente que hai que adoptar todas as medidas posibles para impedir que os nosos maiores das residencias estean en perigo. Sobre o numero de positivos cuestionamos os datos xa que falta coordinación e información, e sabemos que na maioría dos centros hai persoal de baixa (que non asiste a traballar) pero non coñecemos cal é a razón, se é medica ou de conciliación, e de ser médica, se ten relación co coronavirus. Tampouco se están a facer análises periódicos a todo o persoal traballador e residente.
É pola falta de medidas preventivas ante o COVID 19 polo que o día 18 presentamos denuncia ante a Inspección de Traballo na Coruña e en Ourense, así como ante a Subdelegación do Goberno e a Xefatura Territorial de Sanidade, e agora vimos de facelo en Lugo e Pontevedra. Este foi o último paso logo de solicitar de continuo medidas e medios dende o pasado 5 de marzo aos diferentes responsables da Xunta de Galiza.
Pedimos a dimisión inmediata dos responsables da consellería de Política Social por grave inacción e incompetencia e estudamos esixir responsabilidades penais. A conselleira, a secretaria xeral técnica, o subdirector xeral de persoal e o xerente do Consorcio e xerente adxunto son directamente responsables. É necesario que alguén competente tome xa o mando destes centros.