Novas por contido

En previsión das futuras sentenzas que se produzan, a CIG convida a todo o persoal funcionario e laboral (independentemente do seu actual vínculo fixo/temporal), a solicitar por vía administrativa o complemento de carreira profesional.

O sistema de carreira profesional pactado por CCOO, UGT e Xunta ven a ser unha especie de retribución de sexenios, como xa teñen os docentes. E así como o dereito a cobrar os trienios depende unicamente do tempo traballado (non da relación contractual), o dereito á carreira (ou sexenio), non llo quixeron recoñecer ao persoal funcionario interino, laboral temporal ou indefinido. Tampouco ao persoal laboral fixo que non quera funcionarizarse.

En marzo do 2019 o Tribunal Superior de Xustiza de Galiza admitiu a trámite o recurso contencioso-administrativo presentado pola CIG contra a Orde do 15/01/2019 do Acordo de Concertación do Emprego Público de Galiza pactado pola Consellería de Facenda e os sindicatos CCOO e UGT. Ademais están en trámite os recursos contra a Orde do 28/03/2019 do acceso ao grao I do sistema de carreira profesional e a Orde do 08/04/2019 de confección de nóminas.

A CIG busca cos seus recursos unha declaración de anulabilidade ou nulidade parcial das ordes, que permita a extensión do dereito a todo o persoal.

Dado que non é posíbel solicitar o complemento de carreira por vía do aplicativo de xestión establecido pola Xunta de Galiza, reservado só ao persoal funcionario de carreira e ao laboral fixo que se comprometa a funcionarizar, o resto dos colectivos só poderían solicitalo persentando unha instancia no rexistro da Xunta, con copia selada para o interesado/a. A data límite para solicitalo é o 29/07/2019.

Para que solicitalo? Trátase dunha cuestión de oportunidade, no sentido de que, de dar a razón á CIG, e si a sentenza non establece retrotraer as actuacións ao momento previo á aprobación da orde, as persoas que tivesen feito a solicitude puidesen reclamar atrasos dende o 1 de xaneiro de 2019. E dicir, no caso de que a sentenza non obrigue a Administración a garantir o dereito ao sistema extraordinario de carreira profesional dende o 1 de xaneiro de 2019, e si o faga con efectos dende a data da sentenza, se poida reclamar o importe con efecto retroactivo.

Pero temos que xogar cos prazos xa que a sentenza que dite o TSXG pode demorarse moito, así que a solicitude individual presentariase o mais próximo posíbel ao día 29 de xullo.

A Xunta podería non responder á solicitude (pasados tres meses); entón ábrense diferentes opcións e teriamos que xogar cos prazos (poderíamos chegar a ter antes as sentenzas contra as ordes da carreira). Se a Xunta denega expresamente a solicitude, a vía a seguir sería diferente, xa en mans da asesoría xurídica do sindicato.

A previsión da CIG é que gañemos o noso recurso ante o TSXG, do mesmo xeito que xa ocorreu noutras comunidades autónomas. Pero a xustiza é birolla, e en función da sentenza podería darse o caso de que o hipotético dereito a cobrar a carreira teña unha data de efectos diferente en función de ter solicitado ou non a carreira. Podería ser que quen non solicitara a carreira tivese dereito a solicitala, máis probablemente non aos atrasos.

Poñemos a túa disposición un modelo de solicitude. Podes adaptalo ás túas circunstancias. Descargar modelo.

Por clarificar as cousas: un asunto diferente son as dúbidas da legalidade que o goberno do Estado expresa sobre o Acordo de concertación, e que afectan directamente á carreira profesional, que se concreta na constitución da comisión bilateral Estado-Xunta para discutir o asunto, é a cuestión de inconstitucionalidade aberta polo Goberno do Estado. Esperamos que estas dúbidas queden solucionadas. Dende a CIG xa solicitamos a sua aclaración e consideramos que é resultado do proceder chapuceiro e as presas da dirección xeral da Funcion Pública.

Outras novas recentes

Venres, 13 Novembro 2026

Promoción interna de corpos xerais; funcionarización en excedencia; finanzas-veterinarios/as-agacal-gain-intecmar (MSF e MX 10/11/26)

O martes 10, véspera da Folga Xeral, asistimos á Mesa Xeral e Mesa Sectorial de Persoal Funcionario, nas que se trataron as convocatorias de promoción interna a corpos xerais e dos procesos de funcionarización de persoal laboral fixo que está en excedencia. Na rolda aberta de intervencións a DXEP deu información da escala de finanzas, da repesca de funcionarización de...
Luns, 09 Novembro 2026

A CIG convoca 17 mobilizacións por todo o país na xornada de folga xeral do 11N

A central nacionalista empraza a clase traballadora galega a visibilizar a parálise da actividade económica e laboral da xornada de 24 horas asistindo masivamente ás marchas A CIG anunciou a convocatoria dun total de 17 mobilizacións por todo o país durante a xornada de folga xeral prevista para o vindeiro 11 de novembro baixo o lema 'Galiza en loita por unha vida digna'...
Venres, 13 Novembro 2026

Agacal, Gain e Intecmar quedan para a seguinte OEP de funcionarización

A directora xeral de Emprego Público comunicounos na Mesa Xeral do 10 de novembro de 2026 que o persoal de AGACAL, GAIN e INTECMAR quedará para a seguinte OEP de funcionarización (para a cal non teñen data) porque aínda non está integrado. A integración é un requisito previo para que o persoal que o desexe poida funcionarizarse. Sen convocatoria á CIG para as negociacións...