Ao estudar a diferente normativa referente á reincorporación e medidas de protección do persoal fronte ao risco biolóxico por covid-19 atopamos que non aparecen por ningún lado, nin recollidas nin avaliadas, as condicións e traballos dun colectivo moi importante existente en todos os centros de traballo e que se ocupan de manter os nosos postos de traballo como espazos seguros: o colectivo formado polo persoal de limpeza.
Esta invisibilidade e desprotección do persoal de limpeza da Xunta, composto na súa grande maioría por mulleres, maniféstase na súa escasa (ou nula) mención nos diferentes Protocolos e Avaliacións de riscos, establecidas polas diferentes consellerías.
Así no informe das medidas adoptadas en aplicación do protocolo polo que se establece a reincorporación dos empregados públicos ao traballo presencial e as medidas de prevención fronte ao Covid-19 (actuacións preliminares) remitido pola Consellería de Presidencia, unicamente hai mención expresa nesta frase: “Daranse indicacións ao persoal de limpeza que cando estea realizando as súas tarefas, ventile axeitadamente as instalacións.”
4. Es necesario contar con aprovisionamiento suficiente de material de protección, especialmente guantes y mascarillas, para el personal cuando así lo indique el servicio de prevención de riesgos laborales y, muy concretamente, el más expuesto (médicos y enfermería de empresa, personal de limpieza, personal de cara al público).
“Se prestará especial atención a la protección del personal trabajador que realice las tareas de limpieza”.
Ainda que de acordo con esta guía, o persoal de limpeza está catalogado como de exposición de baixo risco, afirmación que non comparte a CIG Autonómica, a propia guía determina para este tipo de persoal: “En función da avaliación específica do risco de cada caso: compoñentes de EPI de protección biolóxica”.
Pola contra, a realidade é que o persoal da Xunta que realiza funcións de limpeza de instalacións durante o período de apertura ó público non pode garantir as distancias con respecto ós usuarios, pois está en acción permanente en aseos e corredores polos que transitan as persoas visitantes.
Ao non ter feitas as avaliacións dos seus postos como expostos ao risco biolóxico nos diferentes edificios administrativos e demais centros de traballos por parte da Xunta de Galiza, non pode minimizarse o risco e por tanto as circunstancias de traballo do persoal de limpeza atribuíndolle baixa probabilidade de exposición posto que non son personal administrativo, nin dispoñen de barreira colectiva, nin son persoal de seguridade, únicos que se catalogan como tal nesa guía.
Esiximos que por parte dos servizos de prevención se proceda a realizar a correspondente avaliación de riscos biolóxicos por covid-19 dos postos de traballo do persoal de limpeza en todas as consellerías; tendo en conta que coa reapertura dos centros ao público este persoal non será capaz de manter os 2 metros de distanciamento físico e que ademais no momento actual en adición ós riscos biolóxicos desta enfermidade emerxente se lle engaden os químicos derivados do incremento da exposición a produtos de desinfección.
Solicitamos que se proceda á revisión das ratios de cada centro e se incremente o persoal de limpeza posto que as funcións de limpeza se incrementan coas de desinfección de máis zonas e maior superficie (pomos, aparos, cadeiras, etc) e do número de veces que se debe limpar.
Antecedentes: Esta reunión (a segunda do COVID-19) viña precedida por un lado pola denuncia interposta polas 4 OOSS ante a incorporación do persoal ao centros de Cultura e segundo por a reunión previa co Secretario Xeral . Nesta xa se tocaron temas como os da limpeza de centros ou a non incorporación do persoal sensible en tanto non teña resolución de prevención.
- Melloras propostas pola Administración: a raíz da denuncia a consellería de Cultura púxose ás pilas e a situación dos centros a nivel material é moito mellor que hai 15 días. A denuncia tivo unha contestación negativa de inspección de traballo pero unha influencia moi positiva no quefacer da Administración. Así xa presentaron melloras como:
Informe de riscos biolóxicos nos centros (elaborada por Cualtis). Non aporta moito pero feito está.
Informe da situación de persoal no que atinxe a reincorporacións voluntarias, teletraballo e persoal reincorporado obrigatoriamente.
Informe das melloras introducidas nos centros dende a primeira reunión.
Elaboración dun Protocolo específico para o AGADIC.
Avaliación individualizada de riscos de centros e categorías profesionais. (presentarana sobre o martes)
Curso de formación para o persoal de centros nos riscos das novas tarefas a acometer segundo o protocolo específico de Cultura (a semana que ven van a comezar un cursiño online para o persoal, incluso reforzado con algún presencial para a xente que non poida conectarse ou con traballos moi específicos).
Temos que dicir que estas últimas melloras foron insistentemente solicitadas pola CIG dende as primeiras reunións.
As alegacións que a maiores fixemos, se concretaron nos seguintes eidos:
- Plan de limpeza específico centro a centro: necesitamos un documento que fixe e organice as tarefas de limpeza, as protocolize e se base no reforzo de persoal e horario e non nun mero traslado de zonas de limpeza. Recordamos a especial atención á limpeza dos medios materiais compartidos, no xa só no cambio de turno senón na mesma quenda.
- Reforzo na ventilación de centros: estamos a falar de centros situados en edificios antigos ou con poucos vanos polo que tanto na ventilación natural , como na mecánica debe terse unha especial atención fixándose na renovación de aire dende o exterior e na revisión de filtros e maquinaria.
- Extremar e garantir sempre a separación de 2 m. entre os traballadores/as: sobre todo nos centros pequenos onde agora mesmo non é un problema pero coa incorporación de persoal ao fin da II fase, vai haber moitos máis contactos.
- Existencia de dispensadores de hidroxel en todas as unidades e non só nas entradas e saídas.
- Instalación de mamparas separadoras da atención ao público en todos os centros (algúns non as teñen).
- Instalación de alfombras desinfectantes en todas as entradas (agora mesmo están en probas en 3 bibliotecas, pero debe estenderse o seu uso). Inflúe positivamente na limpeza do centro e ata evita algunha quenda de limpeza do chan.
- Solicitamos outra vez as xornadas de Formación: que foron ao final da reunión aceptadas polo Servizo de Prevención.
- Voltamos a facer fincapé nas dúbidas organizativas nos días de permiso de teletraballo, voltaron a desinformar ao persoal, dicindo que o día 1 se tiña que voltar aínda que estiveras teletraballando (dixeron que non teñen esa información, van a respectar o permiso de teletraballo da Fase II ata o 12 de Xuño e o que se diga por Función Pública para a Fase III).
- Con respecto aos cambios de quenda, flexibilizar as entradas e saídas para que non coincida moito persoal nas mesmas dependencias.
- Fixemos un alegato a prol do teletraballo e a súa necesaria ampliación (alguén xa nos recordou que non era o foro axeitado), pero nos o reclamamos en todos os foros aos que accedemos.
En fin, as cousas van indo, aínda que teñamos que turrar delas, quedamos para unha nova reunión para a implantación da Fase III.
SEGUIMOS PELEXANDO POR UNHA CONTINUIDADE NA SEGURIDADE
Despois do acontecido o mércores 27 na comisión de seguimento do Protocolo de incorporación ao traballo na Administración xeral da Xunta de Galiza, o señor director xeral de Función Pública ven de anunciar que pola súa incapacidade, obstinación e pasotismo na adopción de medidas para ampliar o teletraballo, vai inaugurar (para eso estamos en eleccións) unha GRAN GARDERIA (que non escola infantil) no hall da segunda planta da Consellería de Presidencia (si, case xusto diante do seu despacho).
Alí, como non, haberá unha gran recollida de fillos e fillas do persoal funcionario e laboral que vai ter que voltar ao seu posto de traballo, pese a que pode facer as súas funcións dende a casa, como o viñan facendo ata agora. Isto é porqué o señor Barreiro vai contratar un gran circo cheo de equilibristas, paiasos, contadores de contos, homes-bala, funambulistas, magos enganadores e todo aderezado como non podía ser doutro xeito dun grande concurso.
Así animamos a todo o persoal que a finais de xuño cando remate a terceira fase, xusto ás 8.00 da mañá acudan a San Caetano que se encherá de nenas e nenos que farán un ambiente festivo e infantil en todas as instalacións e todo gracias ao señor Barreiro e tamén ao señor Feijoo (que pode pasarse por alí a repartir algunha papeleta).
Tamén non nos esquecemos dos nosos maiores que como non van poder quedar sós nas casas, van ter un centro de día diante do despacho da conselleira Fabiola.
Ou sexa que non falte ninguén!!!!!
E agora rematamos a brincadeira e poñémonos serios: a CIG apostou por darlle unha marxe de confianza a este home (Barreiro dixit) pero ese marxe rematou e agora só ten dúas saídas: ou recua e aposta polo teletraballo como fixo o Estado ou mesmo o ensino, ou teremos que rachar o Acordo e mobilizar ao persoal que terá que escoller entre fillos ou traballo e isto é inasumible que o faga unha administración pública.
Instaremos as acción xudiciais, de mobilización, de denuncia pública de queixa institucionais en todas as mesas, pero isto non pode quedar na situación que está. O persoal da Administración xeral non é persoal de segunda; as nosas nenas e maiores valen o mesmo que os do resto do persoal público.
Só avisamos unha vez, como algún maior teña un contaxio por ter que quedar cos cativos dalgún persoal público o señor Barreiro irá á fiscalía como promotor dun atentado contra a saúde pública.
O xoves 28 de maio de 2020, fixéronse realidade os peores temores do persoal veterinario que realiza as campañas de saneamento gandeiro, e que viñan denunciando desde hai moito tempo. As condicións de seguridade e saúde na que o persoal veterinario, que realiza as campañas de saneamento gandeiro, que a consellaría do Medio Rural encomenda ano tras ano á empresa pública TRAGSA son absolutamente deficientes. Xornadas maratonianas, lotes semanais de número de reses a sanear imposíbeis de sacar adiante en condicións seguras, sen nin sequera dispoñer de mangas para a suxeición dos animais, e a obriga de ter que realizar o traballo unha persoa soa.
O saneamento gandeiro era realizado hai tempo por dúas persoas, pero os dirixentes políticos da Xunta de Galicia, en conivencia cos xestores da empresa pública TRAGSA e da súa filial TRAGSATEC, que tamén son nomeados polos dirixentes políticos da Administración, xa que é unha empresa pública, decidiron que ían aforrar custos a conta da seguridade das traballadoras e traballadores, ou incluso da súa vida como nesta ocasión, e obrigaron ao persoal a realizar en solitario as labores que antes facían en equipos de 2 persoas.
Estas condicións laborais, xunto coa presión que se exerce dende a empresa para que se execute unha carga de traballo allea ao razoábel, trae como consecuencia que unha persoa como este compañeiro que onte perdeu a vida, despois de levar un golpe na cabeza propinado polo animal que estaba saneando, no lugar de tomar consciencia da gravidade do golpe recibido, pecha primeiro os datos do lote que estaba realizando. Só despois lle foi posible atender ás súas lesións. Isto exemplifica claramente a presión á que están sometidas estas persoas veterinarias que realizan o saneamento gandeiro da Xunta de Galicia.
Estas son as consecuencias criminais de forzar unhas condicións laborais extremas nun ámbito laboral cunha exposición tan elevada aos riscos laborais.
Non sabemos cales son os motivos de explotar ás traballadoras e traballadores desde a Administración, sendo a Consellaría do Medio Rural e a Xunta de Galiza plenas coñecedoras das intolerables situacións de risco que padecen diariamente no desenvolvemento destes traballos e mirando para outro lado, pasando por riba das obrigas derivadas da necesaria coordinación de actividades que como administración tamén teñen que cumprir.
Unha administración, a Xunta de Galiza, que a través da consellaría do Medio Rural encomendou á empresa pública TRAGSATEC a realización dos programas de sanidade e produción animal para o ano 2020 por 7.225.038,39 € . Pero hoxe, por desgraza, si sabemos cales son as consecuencias. https://www.xunta.gal/dog/Publicados/2020/20200316/AnuncioG0426-060320-0003_gl.html (punto 4)
Dende a CIG estamos a recompilar toda a información para presentar denuncia ante a inspección de traballo porque este fatal accidente laboral ten responsábeis e deben responder polos seus actos e pola omisión das súas responsabilidades.
A CIG aposta por aumentar a presión para conquerir a recuperación dos dereitos recortados no V Convenio Colectivo Único dende o ano 2012
Ás dez horas do venres 29 de maio, a menos de 24 horas das masivas concentracións convocadas pola CIG, CCOO, CSIF e UGT para reclamar a retirada da proposta de Instrucións para as vacacións de 2020 para o persoal das residencias de Política Social, centros de menores, residencias de maiores e de atención a diversidade, o Subdirector Xeral de Persoal da Consellería comunica ás organizacións sindicais a retirada das devanditas Instrucións, e a apertura do prazo para facer as solicitudes, aplicando o establecido no V Convenio Colectivo Único para o persoal da Xunta de Galiza .
Na CIG valoramos positivamente o éxito das concentracións de onte, pola unidade e alta participación en todos os centros e provincias e, chamamos a seguir nas mobilizacións, para conquerir a recuperación de dereitos que se manteñen recortados dende o 2012, con moito máis ánimo, logo desta primeira vitoria.
Defendemos e reivindicamos publicamente a necesidade de que Galiza conte cuns servizos sociais públicos, de calidade e ben dotados de medios humanos e materiais, como o instrumento máis eficaz que vertebre e asegure a debida atención aos colectivos máis vulnerables da poboación e como elemento primordial na loita contra o COVID-19, rexeitando modelos mercantilistas baseados unicamente no beneficio empresarial que deixan ao marxe o benestar do individuo e a sociedade. Por iso, seguimos a ESIXIR
A defensa duns servizos sociais públicos, dignos e de calidade.
O incremento de prazas públicas e de xestión directa.
A posta en valor do traballo e o esforzo realizado durante a situación de emerxencia sanitaria coa recuperación dos condicións laborais do convenio.
A recuperación dos dereitos laborais que se manteñen recortados como a compensación por festivos e domingos traballados o que aumentaría o cadro persoal e rebaixaría a excesiva carga coa redución da xornada máxima anual.
A transformación de tódolos contratos de fin de semana ou inferiores, a xornada completa reducindo a precariedade.
En definitiva que a Consellería de Política Social proceda á recuperación dos dereitos económicos e laborais arrebatados desde a entrada en vigor da Lei 1/2012, de 29 de febreiro de medidas temporais en determinadas materias do emprego público da Comunidade Autónoma de Galiza, mediante a apertura inmediata dunha mesa de negociación.
Queremos avaliacións de riscos de cada posto e constitución do novo Comité de Seguridade e Saúde Laboral (CSSL) que represente a todo o persoal.
- Constitución do novo CSSL: Solicitamos constitución do novo comité XA e continuidade nas xuntanzas, xa que que o persoal do Consorcio está en terra de ninguén, e non se lles está dando resposta aos problemas de seguridade e saúde esenciais en todo momento, pero moito máis na situación que estamos a vivir, o que consideramos inadmisible. Acordaron mirar se era posible facelo sen máis demora e convocalo o antes posible. Ao non asistir representación por parte do Consorcio Galego non quixeron tratar temas específicos, pediuse avaliacións de riscos e protocolos de actuación para todos os centros, porque non era certo que estiveran pendurados en ningunha páxina, solo para o prazo de admisión das Escolas Infantís, que se este comité non se vai facer cargo destas cuestións que sexa o Consorcio quen convoque aos anteriores CSSL, xa que por falta de petición de convocatorias non é.
- Avaliacións de riscos: Pedimos avaliacións de riscos e protocolos de actuación para todos os centros de traballo pertencentes á consellería que están pendentes de apertura, e non esperar ao último día para facer todo as carreiras e mal. Contestan que están traballando no tema, e que de momento non hai previsión de que se vaian abrir. Así como de todos aqueles postos que polas súas características específicas necesitan protocolos especiais, como poden ser as unidades de menores, valoración de dependencia,... que deben facer desprazamentos a domicilios.
- Dotación de EPIs: Pídese que haxa unha reserva de material en todos os centros, xa que o subministro non está sendo áxil, e en caso de aparecer novos casos o material existente en algún centro non chegaría nin para un par de días. Pídese tamén que teñan en consideración que a medida que se acerca o verán as temperaturas son cada vez máis elevadas, polo que unha única máscara por quenda non vai ser abondo.
- Reforzos persoal: Os contratos de reforzo de persoal débense manter como ata agora, porque aínda que os casos positivos de Covid-19 estean diminuíndo, as medidas de precaución débense manter, e o traballo é similar, séguense a facer illamentos preventivos, a limpeza e desinfección debe seguir sendo exhaustiva, comezan as visitas de familiares nos centros... A previsión segundo a presidencia do comité é que se manteñan, polo menos “de momento”.
- Réxime de visitas: Solicítaselles instrucións claras no réxime de visitas aos centros para que todo o persoal o teña claro, xa que hai centros nos que non está sendo así. Hai instrucións contraditorias, xa que os familiares non poden saír do recinto co residente, pero os residentes autónomos si que poden saír ata a 1Km da residencia. Quedaron en aclarar a forma de actuar nesta situación, as xefaturas territoriais deberan ter expostos os protocolos de réxime de visitas, para que todo o persoal teña coñecemento. En canto aos plans de continxencia, aclaran que se dan unhas instrucións básicas, pero despois cada centro debe facer un específico dependendo das súas características que debe ser aprobado por sanidade.
- Formación: É evidente que a formación non foi a axeitada durante esta pandemia, sendo o cadro de casos positivos entre os traballadores un reflexo disto, polo que reclamamos unha vez máis que se forme a todo o persoal, tanto na colocación de EPIs, como no manexo de produtos de limpeza, como en todo aquelo que teña que ver cos riscos biolóxicos ocasionados polo Covid-19. Segundo o técnico de prevención a partir da próxima semana comezarase con cursos presenciais nos centros de Política Social.
- Protocolo persoal vulnerable: Está a ser moi lenta a tramitación no caso de persoal vulnerable, aseguran que a partir de agora vai ser moito máis áxil, porque eran moitas as solicitudes que tiñan; pregúntaselles que vai pasar coa xente que ten criterios de persoa sensible, pero como non hai casos positivos no centro de traballo considerase que non está en risco, no momento en que haxa un illamento por sospeita ou un caso positivo novo, ao que respostan que no caso de illamento procurarase que este persoal non traballe con eles, e no caso de un novo positivo volvera tramitar a solicitude e tratarase de forma preferente para resolver con axilidade.
- Cadro información de contaxios: Seguiran a pasar aos responsables sindicais, coa periodicidade que o viñan facendo, a información sobre os casos positivos entre o persoal, pero non son coñecedores dos datos de residentes, aínda que procuraran facerse cos eles.
- Riscos psicosociais: Os cambios de quendas deben facerse de forma puntual e xustificada e non como un hábito, asunto que terán en conta, así como os desprazamentos de persoal público a residencias privadas, sen que os representantes dos traballadores saiban a situación e as súas condicións de traballo, poñendo en risco a súa saúde, ao que respostan que era sanidade a que manexaba todo isto.
SEGUIMOS PELEXANDO POR UNHA CONTINUIDADE NA SEGURIDADE
A Dirección Xeral de Función Pública emite unha nota informativa sobre os procesos selectivos que teñen prazos pendentes.
A partir do 1 de xuño reanúdanse os prazos administrativos dos procesos selectivos que se relacionan, así como dos días hábiles pendentes para o seu termo:
O xoves 28 de maio celebrouse unha xuntanza telemática do Comité de Seguridade e Saúde Laboral de Medio Rural
Despois de ter solicitado antes do inicio do estado de alarma a celebración de comité extraordinarios para implementar protocolos ante o COVID-19, e con máis de dous meses de retraso convocouse o luns 25 o comité coa intención de tratar unicamente dous puntos: protocolos de incorporación do persoal das Oficinas Agrarias Comarcais e para a realización de Traballos de Campo do persoal da Consellería de Medio Rural.
A CIG entendendo que existían moitos centros de medio rural que non quedaban incluídos nesta orde do día, solicitou a ampliación da orde do día cos seguintes puntos e que finalmente foron incluídos na xuntanza:
• Actuacións preliminares das medidas adoptadas en aplicación do protocolo de reincorporación dos empregados públicos ao traballo presencial e as medidas de prevención fronte ao Covid-19.
• Medidas e protocolos a desenvolver nos centros do CIAM, Lafiga, Evega e Lourizán.
• Análise de riscos do laboratorio de sanidade animal con respecto ás actividade de análises PCR de coronavirus (que se estiveron a facer e que aínda que estean parados na actualidade, poden desenvolverse en calquera momento) e medidas preventivas a desenvolver.
• Situación das medidas preventivas e organizativas fronte ao coronavirus nos centros de formación da consellería do Medio Rural en función do traballo e tarefas que vaian a desenvolver nos vindeiros meses.
• Medidas preventivas e organizativas fronte ao coronavirus fronte as actividades de formación e transferencia tecnolóxica que ser desenvolvan nos vindeiros meses.
A presión da CIG fixo que se pasara dunha xuntanza de trámite a tratar temas de fondo que preocupan a todo o persoal e que inciden na mellora das medidas preventivas en todos os centros de traballo de Medio Rural. Os principais acordos e decisións tomadas polo comité foron:
1. Aprobación do protocolo de medidas preventivas fronte ao coronavirus na atención ao público nas oficinas agrarias comarcais, no que se incorporaron as seguintes melloras a proposta da CIG: aplicación de forma subsidiaria do protocolo xeral e o protocolo de medidas preventivas fronte ao coronavirus nos servizos de rexistro e atención á cidadanía, colocar carteis informativos, intensificar as actuacións e desinfeccións de todas as dependencias especialmente os espazos comúns, colocación de alfombras hixienizantes nas entradas, establecer medidas preventivas de carácter colectivo en cada unhas das OAC´s antes da reincorporación do persoal (neste caso indicouse por parte da administración que conta con ter feitas todas as medidas preventivas necesarias antes do 1 de xuño e no caso de non telas implementadas, non se incorporarán as persoas traballadoras)
2. Aprobación do protocolo de medidas preventivas fronte ao coronavirus nas tarefas de campo do persoal da consellería do Medio Rural, no que se incorporan as seguintes melloras a proposta da CIG: subministración dun dispensador individual con solución hixienizante (con capacidade mínima de 100 ml), substitución do uso de peróxido de hidróxeno na vez de hipoclorito sódico na desinfección, incorporar protocolo de disolucións para desinfeccións da consellería de Medio Rural, realizar formación para a desinfección dos vehículos, uso de mascarilla nos vehículos compartidos.
3. Avaliación do protocolo para a extracción de ácidos nucleicos de mostras sospechosas de SARS CoV-2: indícase que é un laboratorio preparado para este tipo de risco biolóxico e que se estivo facendo análises PCR do coronavirus por unha encomenda de Sanidade. Neste punto a CIG solicita a incorporación deste novo risco biolóxico na avaliación de riscos do centro e que aproveitando a posibilidade material que ten este centro de facer probas PCR, se fagan para todo o persoal de Medio Rural neste laboratorio seguindo os protocolos de sanidade.
4. Avaliación do plan de desescalada dos sectores vinculados a AGACAL. Este documento pasouse cun día de antelación polo que non foi posible presentar as achegas correspondentes. Desde a CIG facemos constar que é un documento moi xenérico e que non entra na avaliación específica das medidas preventivas e organizativas dos 14 centros moi específicos que dependen de AGACAL: centros de formación e centros de investigación. Desde AGACAL quedaron en elaborar un informe detallado para cada centro de traballo.
5. Presentouse documento actuacións preliminares das medidas adoptadas en aplicación do protocolo de reincorporación dos empregados públicos ao traballo presencial e as medidas de prevención fronte ao Covid-19 da consellería do Medio Rural, que se levou ao comité intercentros de seguridade e saúde. Desde a CIG solicitamos que se amplíe e revise este documento e se inclúa entre outros aspectos os protocolos de conciliación e de persoal sensible.
6. Na rolda libre de intervencións a CIG solicita que: se apliquen medidas preventivas en servizos esenciais de gandería, se axilice a tramitación das solicitudes do persoal sensible, se impulse o teletraballo e medios telemáticos, se establezan medidas de conciliación máis alo do 15 de xuño, reforzar os servizos de limpeza, seguimento da posta en práctica dos protocolos aprobados, protocolo ante aparición de positivos por coronavirus en centros de medio rural, seguimento da aplicación das medidas preventivas no seguinte comité.
A CIG solicitou a avaliación individualizada de cada centro de traballo así como as medidas preventivas e organizativas antes da reincorporación do persoal e que de forma cautelar non se incorpore ninguén ata que non estes implementadas as medidas. Na CIG defendemos que a incorporación do persoal tense que facer con tódalas garantías e seguridade.
O prazo de 20 días hábiles para a presentación de solicitudes de participación nos procesos de funcionarización convocados no DOG do 17/02/2020 quedara no seu momento suspendido pola declaración do estado de alarma.
Unha vez que os prazos administrativos se reanudan ou reinician con efectos do 1 de xuño de 2020, toda persoa interesada poderá matricularse nos procesos de funcionarización correspondentes á súa categoría. O prazo de presentación de solicitudes comeza o día 1 de xuño e remata o día 2 de xuño de 2020.
Segundo o establecido no artigo 9 do Real Decreto 537/2020, de 22 de maio, polo que se prorroga o estado de alarma declarado polo Real Decreto 463/2020, de 14 de marzo, polo que se declara o estado de alarma para a xestión da situación de crise sanitaria ocasionada polo COVID-19 (BOE número 145 do 23 de maio de 2020 ) con efectos do 1 de xuño, o cómputo dos prazos administrativos que fosen suspendidos reanudarase, ou reiniciarase, se así se prevese nunha norma con rango de lei aprobada durante a vixencia do estado de alarma e as súas prórrogas.
No DOG do 15/05/2024 publican a Resolución do 13 de maio de 2024, da Dirección Xeral de Emprego Público e Administración de Persoal (DXEPAP, antiga D.X. de Función Pública), pola que se convoca concurso ordinario para a provisión de postos de traballo vacantes da Administración xeral da Comunidade Autónoma de Galiza. Observación 1: neste momento NON se solicitan as prazas...
O goberno de Alfonso Rueda volve a ofertar a mans privadas a xestión do centro ocupacional Souto de Leixa, que atende a persoas adultas discapacitadas, e que xa leva varios lustros dunha desastrosa xestión privada. Nesta ocasión queren concederlle unha concesión por 12,7 millóns en 4 anos. Alá polo ano 2010 as nais e pais de alumnado do centro “Souto de Leixa” agardaban...
Rueda dá un paso máis na vergoñenta desgaleguización da Xunta de Galiza da man de Sonia Rodríguez-Campos González, directora da Escola A Xunta de Galiza creou polo Decreto 163/1982, do 1 de decembro, a E.G.A.P., co carácter de órgano administrativo sen personalidade xurídica propia. Posteriormente, mediante a Lei 4/1987 pasou a ser unha entidade autónoma dependente da...
