- Detalles
Á espera da xuntanza que vamos ter o martes 10 (corresponde á prevista para o mércores 4 e que foi aprazada varias veces), facemos públicos os últimos listados de prazas que temos (non serán os definitivos):
- Listado 1 (prazas para concurso). Actualizado a 05/05/2022
- Listado 2 (prazas para concurso-oposición). Actualizado a 05/05/2022
- Listado 3 (segundo FP: persoal indefinido non fixo sen RPT). Actualizado a 05/05/2022
- Consorcio (con localidades, categorías e equivalencias). Actualizado a 04/05/2022
- Entes (incluíndo os do ámbito de Medio Rural). Actualizado a 04/05/2022
Función Pública ampliou o prazo para presentar alegacións, que vai ser ata o luns día 9 de maio. Así que podes contactar coa CIG.
Estes novos listados son enviados por Función Pública ou xerados dende a súa aplicación. Advertimos que na CIG temos moitisimas alegacións (centos), e ainda estamos no proceso de verificación e mecanizado cos datos que temos e que nos son facilitados polas persoas interesadas.
- Detalles
O listado de prazas difundido por Función Pública pode non ser definitivo
Nota: ao final do día do mércores 4/5/22, recibimos un novo listado de Función Pública. Fixérono sen acompañalo de ningún comentario, explicación nin sequera resposta ás alegacións que presentamos no seu día por escrito e mecanizadas na aplicación correspondente de Función Pública.
A dirección xeral de Función Pública enviou ao DOG a Resolución que publicarán o venres 6 de maio, relativa á convocatoria de elección de destino definitivo das persoas que superaron os procesos selectivos de A1-promoción interna e libre, A2-promoción interna e libre, C1-promoción interna e C2-promoción interna e libre, da Oferta de Emprego Público de 2017.
Posteriormente enviaron un aviso dun erro na comunicación, sinalando que cómpre eliminar o parágrafo que se achega (último parágrafo do punto oitavo, páxina 3).
“As persoas aspirantes nomeadas persoal funcionario de carreira e adxudicatarias definitivas dos postos de traballo relacionados nesta resolución disporán do prazo dun mes para tomar posesión do seu destino, desde o día seguinte ao da publicación no DOG.”
Nas respectivas resolucións de nomeamento concretaranse os prazos de toma posesión.
Na xuntanza que tivemos co director xeral de Función Pública o venres 29 de abril, este informounos de:
- As tomas de posesión serán en paralelo coas do concurso.
- A partir da semana que ven sairán as resolucións para elixir destino.
- Ao longo do mes de maio enviarán o listado de postos.
- As persoas en provisional xa coñecerán cal é o seu destino na terceira semana de maio.
- Na última semana de maio, ao redor do 30/31 ou 1 de xuño comezará o prazo de toma de posesión.
En canto ás prazas, insuficientes nalgún caso, esto é o que decidiron:
- A1: deciden incluír as vacantes de nivel 20 de toda a Comunidade que non pasaron polo concurso de traslados.
- A2: non chegan as vacantes puras (aquelas non ocupadas por persoal interino) así que ofertarán vacantes cubertas temporalmente con posterioridade ao 1 de xaneiro de 2018.
- C1 e C2: só incluirán vacantes puras.
Función Pública non facilitou ningunha resposta ás alegacións que presentou a CIG, tanto por escrito como mecanizadas directamente na aplicación de postos de Función Pública. Ao día seguinte de rematado o prazo de alegacións, retiraron o listado da aplicación e non nos deron ningunha explicación.
Tras múltiples correos e chamadas, por fin, o mércores 4 conseguimos localizar a alguén que nos atendera:
- A relación de postos vai ter cambios respecto á xa anunciada (novo listado 4/5/22 pola noite)
- Os sindicatos teremos acceso ás respostas da DXFP ás nosas alegacións (esto ainda non o cumpriron)
- Detalles
O Consorcio Galego de Servizos de Igualdade e Benestar saca a licitación os servizos de atención educativa da escola infantil de A Guarda, de nova creación
O concello de A Guarda asinou un convenio de colaboración coa Consellaría de Política Social, a través do Consorcio Galego de Servizos de Igualdade e Benestar, en xuño de 2020, para a construción dunha escola infantil de 0 a 3 anos, de tres unidades (41 prazas).
A escola infantil de A Guarda ten previsto comezar a actividade en setembro, co inicio do curso 2022/2023 e, até agora, nunca se puxera en dúbida que a xestión fose a ser directa, con persoal propio.
Ás agachadas, o Consorcio publicou o día 26 de abril no seu web a licitación do servizo de atención educativa, que non é nin máis nin menos que a xestión privada deste centro, construído con fondos públicos no espazo publico municipal que son as antigas instalacións do comedor e vivenda do profesorado dun colexio público.
Á empresa que se lle adxudique a xestión non terá que investir capital nin infraestrutura. Se lle garante unha cifra de negocio e de beneficio sen ningunha exposición ao risco empresarial. Será chegar e encher, beneficios a costa dun servizo publico subvencionado.
O Consorcio ten unha estrutura organizativa que, ademais de xestionar os chamamentos para a selección do persoal, tamén centraliza as compras de material, elaboran os criterios educativos, control dos menús máis saudábeis..
Para a CIG a única garantía de calidade de servizo e de emprego digno é a xestión directa dos servizos, integramente públicos, dende a atención educativa ata a limpeza e os comedores. Esiximos a suspensión desta licitación e que se dote de inmediato esta escola infantil con persoal propio.
O publico é servizo, o privado beneficio!
- Detalles
A nosa patronal ven de enviarnos un borrador de anteproxecto de decreto no que quere regular a flexibilidade horaria por conciliación familiar no ámbito do sector público.
A norma virá a substituír a normativa anterior e estabelece novidades e marcos normativos transitorio. Regulará o relativo á flexibilidade horaria por razón de conciliación e as condicións de concesión e, por tanto, o marco horario de referencia e a compensación horaria dentro do horario flexíbel así como os supostos e requisitos necesarios para acollerse a esta normativa e tamén estabelecerá a solicitude e procedemento para facelo.
Como novidade estabelecerá unha bolsa de horas de ata un 5% da xornada anual que terá carácter recuperábel.
Función Pública indicou que ten intención de levalo á próxima comisión de persoal e, ata entón, pódense facer alegacións. Se queres que levemos a túa voz á mesa de negociación podes poñerte en contacto coa CIG a través deste formulario.
O texto completo do borrador de anteproxecto de decreto no que quere regular a flexibilidade horaria por conciliación familiar no ámbito do sector público podes descargalo premendo nesta ligazón.
- Detalles
A Consellería de Medio Rural convocounos a unha xuntanza que será o martes 3 de maio para discutir a súa proposta de Relación de Postos de Traballo, tanto da consellería como de FOGGA.
Podes descargar a documentación. E podes utlizar o seguinte formulario para contactar coa CIG.
- Detalles
O xoves 28 de abril, a última hora enviaron unha serie de correos con algúns ficheiros para a oferta e a apertura de listados de prazas para consulta e que son:
- Listado 1 (prazas para concurso). Actualizado a 01/05/22
- Listado 2 (prazas para concurso-oposición). Actualizado a 01/05/22
- Listado 3 (segundo FP: persoal indefinido non fixo sen RPT). Actualizado a 01/05/22
- Folla de Entes (prazas de concurso e concurso oposición). Actualizado a 27/04/22
- Excel de prazas que convocadas pero que están afectadas pola lei 20/2021. Actualizado a 27/04/22
- Consorcio. Actualizado a 28/04/22
Eses ficheiros estaban cheos de erros, había grandes ausencias e tiñamos aviso de que eran provisionais. Incluso enviaron o do Consorcio o día seguinte. Hoxe venres 29 din que xa están consolidados e advertiámoslle á Xunta de que isto é un sinsentido: primeiro deberamos discutir os criterios da identificación de prazas e logo elaborar os listados.
Ao final, o mércores 4 ás 9:30 horas haberá unha reunión de negociación das alegacións aos criterios da oferta e aos listados de prazas. Con isto o lío esta servido e pode que modifiquen varias veces os listados: unha estratexia patronal clara que quere confundir ao persoal e xogar cos postos de traballo.
O DIRECTOR XERAL “INFORMA”
• Entes do art. 45.1 da LOFAXGA (organismos autónomos, axencias, consorcios e entidades públicas empresariais): si non teñen RPT van entregarnos listados cos datos necesarios para comprobar as prazas.
• Sobre os entes da LOFAXGA que faltan din que “intentaran introducir a maioría”.
• Van a incluír as prazas da RPT de Educación recén publicada.
• Estudarán meter nos listados as prazas de SEAGA que se incorporaron á Xunta (fixos-descontinuos de 6 meses).
• Solicitarán ao Consorcio que completen os datos de centro de traballo.
• Sobre os erros na data de antigüidade di que o que importa agora é que estean no listado correcto non si é da sentenza.
• Establecen 3 meses a partir dos que xa non se considera ininterrompido e non conta o tempo de suspensión do contrato non fixos-descontinuos.
• Establece dous requisitos restritivos a maiores para determinar as prazas: que estean ocupadas a 30/12/2021 e que non están convocadas. Ao único que cede é a deixar nos listados as prazas de procesos convocados que quedaron desertas (iso o di a lei).
• Nas prazas que van a concurso (listado 1) pola DA8, está aberto a negociar para aplicar os criterios de que a interrupción da relación de servizo de quen a ocupe (interrupcións de 3 meses ou algo similar).
• Para a valoración dos servizos prestados están abertos a establecer unha puntuación diferente entre Xunta e outras administracións, pero non a excluír a puntuación noutras administracións.
O QUE FALTA OU NON QUERE DISCUTIR (ou di que pospón para o mércores 4)
Insistimos que non retiren dos listados da oferta as prazas do excel de “prazas convocadas”, xa que cumpren os requisitos da lei, polo que teñen que saír na oferta. Para máis non se sostén o argumento de Función Pública xa que as prazas non foron identificadas en ningunha convocatoria. A CIG xa advertira que podían non chegarlle as prazas si seguían a convocar ás bravas, e agora si non teñen prazas suficientes é o seu problema: que as busquen ou que as creen, e que dimitan.
Solicitamos aclarar o método e momento de difusión dos listados (non podemos ir enviando listados diferentes cada día, é un caos para todas e todos) e que abran a posibilidade de que o persoal remita as achegas directamente.
GRANDES AUSENCIAS E FALLOS NOS LISTADOS (hai moitos máis)
• No do Consorcio sen centro e mal as datas de antigüidade, e faltan DA8.
• Queren excluír as prazas convocadas (exemplo centos prazas convocatorias decembro)
• Faltan todas as da Lei 17.
• Grandes fallos nas titulacións requiridas (e moitas ausencias).
• Numerosos erros nas tomas de posesión/antigüidade temporalidade praza.
• Faltan case trescentas prazas de Educación (porque a RPT non se actualizou dende o ano 2015).
• Faltan prazas de colectivos como Agader, profesores CELGA, Illas Atlánticas, etc.
INFORMACIÓN DOUTRAS CUESTIÓNS
• RPT DO CONSORCIO: remitirán borrador para ir avanzando.
• A OEP ordinaria non a van meter agora (ata que se vexa o que queda).
• Concurso de traslados e listado de postos para a elección de destino informámosche aquí.
Se queres, podes conectar coa CIG.
- Detalles
O venres 29 de abril tivemos unha reunión informativa co director xeral de Función Pública. O que nos conta ao respecto do concurso de corpos xerais e a toma de posesión definitiva das persoas de corpos xerais que están en provisional é o seguinte:
SOBRE A ELECCIÓN DE DESTINO DEFINITIVO DE CORPOS XERAIS
- A1: deciden incluír as vacantes de nivel 20 de toda a Comunidade que non pasaron polo concurso de traslados.
- A2: non chegan as vacantes puras (aquelas non ocupadas por persoal interino) así que ofertarán vacantes cubertas temporalmente con posterioridade ao 1 de xaneiro de 2018.
- C1 e C2: só incluirán vacantes puras.
- As tomas de posesión serán en paralelo coas do concurso.
- A partir da semana que ven sairán as resolucións para elixir destino.
- Ao longo do mes de maio enviarán o listado de postos.
- As persoas en provisional xa coñecerán cal é o seu destino na terceira semana de maio.
- Na última semana de maio, ao redor do 30/31 ou 1 de xuño comezará o prazo de toma de posesión.
CONCURSO DE TRASLADOS
Arredor do 20 de maio publicarán a resolución co prazo da toma de posesión do concurso, coa idea de que o 30-31 de maio ou 1 de xuño comece o prazo para a toma de posesión.
- Detalles
No DOG do 29/04/2022 publican a RESOLUCIÓN do 25 de abril de 2022, da Dirección Xeral da Función Pública, pola que se ordena a publicación do Acordo do Consello da Xunta de Galiza polo que se autorizan os criterios de repartición e convocatoria do fondo de acción social para o exercicio económico do ano 2021 relativos á axuda para a atención de persoas con discapacidade.
O importe da axuda será de 2.160,00 € por causante, con rateo da dita cantidade para o caso de que o recoñecemento ou cualificación da discapacidade se producise con posterioridade ao 1 de xaneiro de 2021 ou a convivencia non se mantivese durante todo o exercicio. A axuda aboarase na conta consignada para o ingreso da nómina.
- Detalles
Función Pública quere que sexamos os sindicatos quen decidamos quen vai quedar damnificado pola súa incompetencia. E mentres tanto, o concurso para cando?
Recibimos un correo de Función Pública (mércores 27) cos números de prazas que queren ofertar para destino definitivo ao persoal de corpos xerais que está actualmente en destino provisional (tanto de promoción interna como de acceso libre). E as contas non dan para A1, así que bótanse a un lado e piden aos sindicatos que decidamos quen vai resultar prexudicado.
O problema de falta de prazas de A1
Son 43 as prazas que necesitan para o destino definitivo de A1 (7 de promoción interna e 36 de acceso libre). E din dispoñer de 12 vacantes puras (non ocupadas por persoal interino) máis outras 48 ocupadas.
O problema está en que das 48 ocupadas, 38 o están con persoas anteriores ao 1/1/2016, dúas anteriores ao 1/1/2018, e 8 posteriores. É dicir, que a maioría das prazas estarían afectadas pola Lei 20/2021 (do abuso da temporalidade nas administracións).
Por tanto, que necesitando 43 prazas, fagan o que fagan para ofertar un número abondo, haberá persoas prexudicadas. E o que se lles ocorreu foi darnos aos sindicatos 24 horas para decidir, con consecuencias negativas digamos o que digamos.
Opción 1: pospoñer a elección de destino do A1-libre
Co conseguinte cabreo das persoas directamente afectadas, que verían adiado o seu posíbel interese en desprazarse de localidade.
Opción 2: incluír na elección de destino todas as prazas vacantes do concurso, incluíndo todas as afectadas pola Lei 20/21, co que ofertarían 60 prazas para 43 persoas.
Poderían ofertalas interpretando que a Lei 20/21 computa prazas e regula a súa cobertura, pero que non fixa dereitos sobre cada praza. A maiores de que estariamos despedindo a persoas que nuns meses poderían recuperar o traballo, é moi probable que esta opción acabara xudicializada.
Opción 3: incluír prazas en Compostela que non pasaron polo concurso. Serían 9 prazas de nivel 20, e 27 de nivel 25. En total disporíamos de 56 prazas para as 43 persoas.
Para a CIG é inaceptábel que se poidan ofertar xefaturas de sección a persoas recén chegadas ao corpo superior sen ofrecerllas primeiro ás persoas que levan anos neste e noutros corpos.
Opción 4: incluír prazas de nivel 20 vacantes en todas as localidades. Teríamos 47 prazas para 43 persoas
Ás compañeiras e compañeiros que leven anos querendo moverse a outra localidade, non lles faría moita graza ver como persoas recen chegadas ao corpo obteñen prazas en localidades do seu interese que non lles foron ofertadas previamente. Afectaría sobre todo a localidades de alta demanda de postos, como poden ser Vigo ou Ourense.
As responsabilidades
O escenario que defendeu a CIG estes anos é ben diferente do que temos:
- Ofertas de emprego sen taxa de reposición limitativa, que permitise cubrir todas as necesidades de persoal que fose necesaria. Co seu modelo restritivo, as limitacións impediron mesmo cubrir as vacantes con persoal de carreira, e por tanto incrementaron a temporalidade.
- Procesos selectivos áxiles, nos que entre a publicación da Oferta e a toma de posesión non mediara máis dun ano. O que temos é que ese tempo pode chegar a 5-6 anos con facilidade.
- Concursos anuais, en todos os corpos/escalas/categorías. A realidade é que os máis afortunados son os corpos xerais, para os que van 6 anos dende que os anteriores tomaron posesión.
- Que a toma de posesión dos procesos selectivos fose definitiva se hai concurso de traslados recente. De non ser o caso tería que ser provisional. Cando é definitiva se oferten todos os postos vacantes que pasaron polo concurso..
A CIG fai responsábel do panorama que temos aos gobernos galego e do estado polas súas políticas de recortes que impuxeron durante anos que dificultaron as ofertas de emprego, que forzaron á temporalidade e que destruíron emprego público.
E facemos tamén responsábel da situación á Dirección Xeral da Función Pública e en xeral ao goberno galego, pola falta de dilixencia na resolución dos concursos de traslados e procesos selectivos que remataron por cruzarse coa nova Lei 20/2021.
Así que a CIG non vai optar por ningunha das malas opcións ás que nos queren forzar. Terán que ser os/as responsábeis, as persoas que dirixen as políticas de persoal da Administración, as que procuren as solucións que teñen que poñer enriba da mesa, e no seu defecto decidiren e responsabilizarse de dano que van provocar. Busquen prazas, e se non existen terán que crealas.
Así están as prazas en A2, C1 e C2
Para A2 necesitan 40 prazas (13 de promoción interna e 27 de libre). Din dispoñer de 42 prazas sumando vacantes puras (non ocupadas) e 10 prazas ocupadas por persoas interinas posteriores ao 1/1/2018 (non afectadas pola Lei 20/21). Serían 42 prazas para 40 persoas. Non valoran outros escenarios. Moi xusto, o que levará a algúns compañeiros e compañeiras de promoción interna a pediren excedencia tirando pola borda o seu esforzo na promoción.
Para C1 necesitan 22 prazas (todas de promoción interna), e para C2 107 prazas (57 de P.I. + 50 libre). Tanto para C1 como C2 din que contan con vacantes puras abondo. Tampouco valoran outros escenarios polo que tamén producirán excedencias.
O concurso de traslados de corpos xerais
Teoricamente a toma de posesión do concurso de traslados sería coincidente coa elección de destino definitivo de quen están agora en destino provisional, pois habería postos coincidentes. Xa que logo, calquera atraso na elección de destino tería efectos no concurso de traslados.
A última información do concurso, persoal e directa de altos cargos de Función Pública, é que a elección de destino do concurso de traslados sería en maio-xuño, un novo atraso. Desmentirían así a información que fala de setembro. Pero con estes .. quen aposta?
- Detalles
De entrada percibimos erros e faltas, como os postos do Consorcio, Illas Atlánticas, Educación, etc. Aos listados provisionais engaden outros que poden excluír prazas dos primeiros.
A Xunta convocounos para este venres co fin de explicar este galimatías. Agardamos ter canto antes uns listados en condicións para presentar achegas.
Función Pública non autoriza a difusión e advirte que: “trátase de documentos de traballo que conteñen información de detalle sobre os servizos públicos autonómicos e os empregados públicos que prestan servicio neles, por esta razón, prégase destinar esta información exclusivamente aos fins de consulta e alegacións solicitados e evitar a súa difusión fóra dos canais que a Xunta de Galicia pon a disposición das organizacións sindicais para exercicio das súas funcións”.
ISTO É TAL CUAL O QUE ENVÍAN DENDE FUNCIÓN PÚBLICA
Buzón 1
- Inclúe os postos ocupados ininterrompidamente (*) e con toma de posesión con anterioridade ao 01/01/2016 (<01/01/2016).
Figuran tanto os postos adxudicados no concurso F0219 por estaren pendentes de toma de posesión dos seu titulares, así como aqueloutros ofertados e convocados en procesos selectivos e pendentes da súa resolución definitiva.
Total 4098 postos
Buzón 2
- Inclúe os postos ocupados ininterrompidamente (*) e con toma de posesión entre os anos 2016 e 2017: (>=01/01/2016<01/01/2018).
Figuran tanto os postos adxudicados no concurso F0219 por estaren pendentes de toma de posesión dos seu titulares, así como aqueloutros ofertados e convocados en procesos selectivos e pendentes da súa resolución definitiva.
Total 206 postos
Buzón 3
- Inclúe aqueles postos ocupados por persoal indefinido non fixo que polas súas características especiais non están incluídos nos buzóns 1 e 2.
Total 50 postos
Nota (*). Ininterrompidamente: A estes efectos de documentos de traballo entenderáse ata un máximo de 3 meses sen ocupación.
Entes instrumentais:
Achéganse dous arquivos excel:
- Un arquivo relativo ao Consorcio Galego de Servizos de Igualdade e Benestar (inexistente)
- Outro arquivo relativo aos restantes entes instrumentaisfundamentalmente sociedades e fundacións. Non se inclúen postos de Expoourense, Fundación Semana Verde de Galicia, Fundación Pública Artesanía de Galicia e Xesgalicia por comunicar que non teñen postos que incluír.
E a efectos informativos achégase outro arquivo excel que recolle as prazas convocadas e que polo tanto non poden formar parte desta oferta extraordinaria (986 prazas)
Criterios comúns empregados na elaboración dos distintos buzóns de postos:
- Teñen que estar ocupados: a data do 30/12/2021
- Son postos con forma de provisión: Concurso e Concurso específico.
- Postos das relacións de postos de traballo (RPT)
- Postos vacantes, ocupados por persoal interino, temporal ou indefinido (SAI01.- SERVICIO ACTIVO DE INTERINOS, SAI02.- SERVICIO ACTIVO LABORAL TEMPORAL, SAI03, SAI04, SAI05, SADI1, SADI2.- SERV.ACTIVO LABORAL INDEFINIDO NON FIXO).
- Recolle os postos da disposición transitoria décima 1ª e 2ª parte do V Convenio Colectivo