Do meso xeito que Bill Murray vivía atrapado no tempo na famosa película e espertaba constantemente no Día da Marmota, as empregadas e empregados públicos da Xunta temos unha experiencia similar que se repite periodicamente no tempo coa leria da funcionarización.

Leva rescatando regularmente este tema nos medios dende hai máis de catro anos e, lonxe de aclarar absolutamente nada, xenera expectativas e frustracións a partes iguais entre o persoal da Xunta de Galiza.

Dende a CIG queremos manifestar que Función Pública non comunicou á nosa central nada con respecto a este tema. Tampouco trasladou absolutamente nada a ningunha das mesas de negociación. Incluso negan, cando preguntamos sobre o tema, que a información dos medios saíra deles.

O que está a acontecer é que tanto Feijoo como o goberno que preside levan oito anos durmindo como unha marmota e o seu traballo leva eses mesmos anos en hibernación constante: concursos, procesos selectivos, etc.

Segundo puidemos saber, a verdadeira marmota de Pensilvania predeciu un inverno curto para este ano. Agardamos que a predición poida ser extensible a este goberno escuro e que marchen co vento fresco da poltrona na que botaron deitados estas dúas lexislaturas.