- Detalles
A funcionarización do persoal laboral fixo supón un aforro de 13 millóns de euros nos orzamentos da Xunta de Galiza para o ano 2022.
O capítulo I (gastos de persoal) dos orzamentos da Xunta recolle un importe de 200 millóns de euros para pagar as nóminas e cotizacións do persoal laboral fixo susceptible de funcionarizarse (sen incluír os importes das antigüidades). Como o persoal funcionario de carreira non cotiza pola continxencia de desemprego, co cambio de vínculo xurídico de persoal laboral a funcionario a Administración aforra trece millóns de euros que saen do 5,5% das cotizacións a cargo da Administración (a maiores do 1,55% que deixa de cotizar o/a traballador/a).
Nin a Xunta, nin moito menos CCOO e UGT como sindicatos cómplices desta funcionarización chapuceira, manifestaron que destino se lle vai dar a eses 13 millóns de euros. Na CIG temos claro que eses cartos que a Xunta deixa de achegar ás arcas da Tesourería da Seguridade Social teñen que reverter ao persoal empregado público.
Cumpre lembrarlle ao “trío calavera” que a Lei 1/2012 de medidas temporais en determinadas materias de emprego público da Comunidade Autónoma de Galiza supuxo un recorte de dereitos que se manteñen a día de hoxe.
Dende entón, a Xunta nunca amosou a máis mínima intención de reverter ese brutal recorte nos dereitos sociais e económicos do persoal empregado público da Administración Autonómica de Galiza.
Por exemplo, con eses cartos poderíanse recuperar as modalidades e os importes do Fondo de Acción Social, que lembramos pasou de 9.136.392 € no 2010 a 2.000.000 € no 2020, máis de 7 millóns de euros de recorte cada ano. Ou poderíanse utilizar para recuperar os máis de 700 contratos anuais do persoal necesario para rematar definitivamente coa suspensión do artigo 19 do V Convenio e posibilitar así o dereito ao descanso en sábados, domingos ou festivos.
Son só dúas mostras do que se podería facer, mais poderían ser outras medidas en beneficio do conxunto do persoal empregado público, como un novo acordo de xubilación parcial anticipada ou o establecemento dun plan de igualdade que permita a conciliación do persoal que traballa a quendas, por exemplo.
O que non pode ser é que a consellaría de Facenda, aproveitando a primeira quenda funcionarizada a primeiros de xullo, faga uso deste aforro para incrementar níves ou reclasificar a uns poucos achegados/as, ou que pretenda adicar este orzamento ao pago do persoal que participe na xestión dos fondos de recuperación e resilencia, vía produtividade ou gratificacións extraordinarias.
Por iso, dende a CIG reclamamos con carácter urxente a apertura dunha mesa de negociación na que se procure o investimento en beneficio de todo o persoal deses 13 millóns de euros que, ben empregados, poden dar para moito.
A Xunta non pode negarse á apertura desa mesa de negociación co argumento da falta de recursos económicos. Ou que vai facer con estes trece millóns?
- Detalles
A non cobertura das vacantes, baixas e permisos, bloquear o teletraballo, non vacinar ao persoal veterinario ou agora a eliminación da cita previa provoca a desprotección das empregadas e empregados públicos e das persoas usuarias deste servizo público.
Para a CIG as críticas á atención das oficinas agrarias comarcais nada teñen que ver co traballo que realiza o seu persoal sinón ao seu desmantelamento progresivo e implacable. Primeiro foron as funcións de extensión e formación que privatizaron e centralizaron e agora a obriga aos usuarios e usuarias a relacionarse dixitalmente, un plan anterior á pandemia que incumpre a propia Lei de administración dixital ao non realizarse o inventario previo de dixitalización.
A pesar deste desastre da xestión política, o persoal empregado público segue a realizar un esforzo importantísimo na atención das persoas usuarias potenciando e favorecendo o desenvolvemento deste sector primario vital para a economía galega. Traballo que moitas veces teñen que preparar e que logo o sistema obriga ás persoas a acudir a unha xestoría a rematar (rexistrar) establecendo un novo gravame efectivo para o agro galego.
Na CIG vimos de presentar un escrito á Consellería de Medio Rural, ao presidente do Comite de Seguridade e Saude Laboral e á Dirección Xeral da Función Publica para esixir medidas de proteccion ao persoal das OACS e de seguridade cara ás persoas usuarias.
Para o persoal das OACs non hai dereitos laborais nin dereito á seguridade e saúde
Mentres, a Xunta non reforza con persoal as unidades, non atende as peticións de persoal auxiliar de rexistro previsto na LEXIDGA, non cubre vacantes, baixas e permisos, nin tan sequera as vacacións do persoal, non atende a moitas flexibilidades horarias por conciliacions...
Para mais bloquea o teletraballo (incluso o covid) e non vacinou ao persoal veterinario negándolles incluso as PCR cando fan inspeccións en granxas con positivos covid. Unha cuestión de saúde pública gravísima xa que poden ser focos de novas mutacións do virus.
A última ocurrencia da Consellería de Medio Rural: eliminar a cita previa
Na CIG defendemos a cita previa nas campañas, o que se demostrou un sistema eficaz para mellorar o servizo e para evitar aglomeracións e recordamos que a atención puntual e ordinaria sempre se deu sen problemas nestas unidades polo que non se xustifica a eliminación da cita previa. Entendemos que con ista nova medida dirixida as OACs, quérese culpabilizar de novo ao persoal da nefasta xestión da Consellería de Medio Rural nestes servizos agrarios e gandeiros.
Estará o conselleiro de Medio Rural a preparar o camiño a novas privatizacións ou responde a nova onda propagandística de remodelación das oficinas?
- Detalles
Continúan as prácticas de derivar a realización de traballos que deberían corresponder a empregadas e empregados públicos.
No DOG do 16/07/2021 publican unha encomenda de xestión a Tragsatec para apoio na xestión de diversas convocatorias de axuda da Dirección Xeral de Formación e Colocación, durante un prazo de 12 meses contados a partir do 1 de xullo. O importe do encargo é de 210.497,24 euros.
Derivan cara a empresas instrumentais o traballo que debería facer a Administración pública. A garantía de independencia e obxectividade só corresponde ao persoal empregado público. Esta actuación volve mostrar, unha vez máis, o desprezo da Xunta hacia o público e a súa intención de contratar externamente o que debería facer o seu cadro de persoal. Se son necesarios máis recursos humanos deberían cubrir os postos vacantes na administración, para dar un servizo público de calidade.
- Detalles
O concurso do persoal veterinario paralizado pola ineptitude de Sanidade. CCOO e SEPGA defendendo a retirada de postos de persoal veterinario na RPT de Sanidade con criterios corporativos.
O martes 13 asistimos a unha xuntanza sindicatos-Sanidade para tratar unha modificación da RPT de Sanidade. A primeira intervención da CIG foi para queixarnos polo bloqueo que a Consellería de Sanidade estaba a producir na negociación e convocatoria do concurso de traslados do persoal veterinario.
Foi en xaneiro do 2020 cando Función Pública nos enviou un borrador da convocatoria dese concurso. A CIG fixo os deberes de inmediato e presentamos alegacións escritas. Ano e medio despois aínda non houbo nin a primeira xuntanza para discutilo, nin recibimos un segundo borrador. As únicas explicacións que recibimos ao longo de tantos meses foi que a dilación era consecuencia de que Sanidade quería modificar a súa RPT de persoal veterinario. Sanidade é responsable, por ineptitude, pero tamén Función Pública por inactividade, xa que é esta dirección xeral a que ten as competencias en materias de persoal.
Ao longo da discusión na xuntanza do martes 13, Sanidade respondeunos que na actualidade eles xa fixeron os deberes, e pasan o balón a Función Pública ao dicirnos que todo o expediente está xa nas súas mans. Veremos cal é a película do director de Función Pública na seguinte xuntanza que teñamos con el.
Volvendo á RPT: a consellería decide abrir moitos postos de escalas sanitarias para poder ser cubertos por corpos xerais, administración especial e persoal estatutario, incluíndo outras comunidades autónomas, administración do estado e Sergas. Din que por “dificultades para cubrir prazas”, unido “ao obxectivo de enriquecer o desenvolvemento das actividades [..] e aumentar o carácter multidisciplinar dos postos”. Vamos, que abren os postos para ter máis opcións.
Pero en contradición co anterior, deciden pechar 18 postos, todos eles xefaturas de sección (15 en servizos centrais e 3 en Lugo), que ata agora poden ser ocupados por persoal veterinario, e que con esta proposta deixarían de selo.
Curiosamente a explicación non nola deu a representante da consellería, se non CCOO (a representante gabouse de que foron eles os impulsores da proposta), co apoio da representante de SEPGA.
A xustificación de CCOO-SEPGA é a seguinte: os postos de escalas sanitarias que están abertos ao persoal veterinario, nunca os ofertan no concurso de veterinarios/as, polo que están ocupados por estes sempre en comisións de servizos. Por esa razón retiran as veterinarios/as.
En primeiro lugar iso contradí as xustificacións de Sanidade para abrir outros moitos postos. En segundo lugar, que non se convoquen postos dunha escala nun concurso é unha decisión política que poden mudar cando queiran. Abondan os exemplos de postos abertos, por exemplo, a corpos xerais e a algunha escala, que son convocados tanto no concurso de corpos xerais como no da escala. Nada impide que un mesmo posto vacante aberto a varias escalas sexa ofertado nos respectivos concursos de traslados.
Na CIG temos claro que os postos deben estar abertos aos corpos/escalas que sexan necesarios para cumprir coas funcións encomendadas e dar así servizo público óptimo. Por tanto, non cuestionamos a conveniencia ou non de pechar o acceso ao persoal veterinario. O que non aceptamos son as xustificacións que, no fondo, teñen un importante compoñente corporativo.
- Detalles
Asistimos a unha xuntanza con Sanidade, na que a maiores de discutir coa consellería, tocounos tirar das orellas a CCOO e SEPGA pola súa postura corporativista.
Os sindicatos fomos convocados a unha xuntanza o martes 13 con responsábeis da consellería. Puro trámite que comezou ás 9:30 e, pouco máis dunha hora despois, a vicesecretaria xeral marchou deixándonos coa palabra na boca. En fin, bo comezo para ilustrar a vontade negociadora que teñen.
Sanidade propón amortizar un posto de subalterno en servizos centrais. Preguntamos sobre a súa situación de ocupación e a resposta foi que está vacante porque no ano 2019 xa a amortizaran. É dicir, Sanidade parece querer xogar ao mesmo que Educación: executar modificacións na RPT cando lles veña ben, e xa despois facer o trámite. A maiores, sobre este posto, engadir que a amortización é para financiar a estrutura. Outro exemplo de cortar por abaixo para crear por arriba.
A un monte de postos (seccións, servizos e subdireccións) modifícanlles o corpo/escala e ábrenos a outras administracións. Supostamente para facilitar a súa cobertura. Así que reclamamos os datos de cantas desas prazas están con problemas de cobertura. Responderon que facilitarían esa información (veremos).
Entre os postos que modifican, hai algúns que están abertos exclusivamente á escala de saúde pública e administración sanitaria, esquecendo que teñen outra escala, a de atención primaria e especializada, que non son máis que 17 postos en todo o País e que a consellería quere forzalos a que pasen a persoal estatutario. Se non os queren, que lles abran postos para facilitarlles o cambio de posto voluntario.
A Consellería ten en pouca estima ao seu persoal, razón pola que non teñen problema algún en abrir postos e máis postos a outras administracións. A maiores de reducir así as opcións de promoción do seu propio persoal, crean un sistema no que para vir á Administración autonómica necesitas un carné ou un padriño/madriña. Que abran os postos que realmente teñan dificultades para cubrir, e o resto que o fagan con persoal propio.
A Consellería continúa sen cumprir a obriga de montar o seu propio arquivo documental, dotado co persoal necesario. Incumpren así as leis ditadas polo Parlamento de Galiza (impulsada polo mesmo partido que dirixe a consellería).
CCOO e SEPGA defenderon que as xefaturas de servizo deberían ser exclusivamente para o subgrupo A1, pois abrilas a A2 é “degradar” os servizos. Para a CIG, os postos deben estar abertos ao que sexa adecuado para prestar un servizo público adecuado, e non vamos a entrar en pelexas corporativas. Con ese razoamento de CCOO e SEPGA, e posto que as subdireccións xerais son A1, os servizos deberían ser A2, as seccións C1, e os negociados C2. A proposta que lanzaron eses sindicatos na negociación con Sanidade sería para aplicar só aos postos que lles interesa? (nunha postura corporativa), ou farían extensiva a exclusión do persoal funcionario de A2 á totalidade de xefaturas de servizo de toda a Administración autonómica? Estas son as consecuencias de ir a negociar “lo mio”.
Antes de fuxir, a representante da consellería informou de que están a traballar nunha modificación da RPT máis importante. A CIG aproveitou para reclamar unha discusión a fondo da estrutura xeral dos postos: distribución de efectivos entre grupos, niveis, distribución territorial, etc.
- Detalles
No DOG do venres 16 de xullo publicouse a Resolución pola que se fan públicas as puntuacións provisionais do concurso de traslados de corpos xerais. Esta publicación abre o prazo de renuncia ao concurso e produciu unha sorpresa en moita xente: aparecen con cero puntos de méritos.
Comezamos lembrando que as persoas interesadas poden formular reclamación contra as publicacións provisionais no prazo de 10 días hábiles contados dende o seguinte ao da publicación desa Resolución no DOG. No web de Función Pública tes o formulario de reclamación (debe presentarse electrónicamente).
Renunciar a participar no concurso
As bases da convocatoria do concurso (DOG 27/11/2019) indican (base III.6) que as solicitudes de participación vinculan ás persoas solicitantes, pero permite renunciar ata os dez días seguintes ao da publicación das puntuacións provisionais no DOG. Por tanto, se polas razóns que sexa, estás interesado/a a renunciar a participar no concurso, estás en prazo.
Admitido/a con cero puntos de méritos
Son moitísimas as compañeiras e compañeiros que nos explican que están admitidos/as pero con “0” puntos de méritos e por tanto están fora do concurso, e queren reclamar.
A causa desa situación está nun incumprimento do procedemento marcado polas bases:
- Quen estivese conforme cos méritos propostos por Función Pública, tiña que validalos e presentar un impreso.
- Quen non estivese conforme cos referidos méritos, tiña que emendalos, xerar un impreso, e presentar por rexistro unha certificación que xeraban nos departamentos de persoal.
Non ter cumprido ese trámite non é un erro subsanable, senon que é o incumprimento das bases. Este punto xa o consultamos coa nosa asesoría xurídica cando o concurso de traslados de gardacostas, no que pasou o mesmo. Ainda así, o dereito a reclamar está na túa man.
Esta instrución xa constaba nas bases. Tamén volveu a sair no DOG do 26/06/20 (apertura do período de presentación de solicitudes de postos e de xustificación de méritos). Esa información publicámola no noso web ese mesmo día.
Este procedemento xa foi así no concurso de corpos xerais anterior ao actual. E tamén foi así no concurso de gardacostas. E unha vez máis está a producir a exclusión de moitos compañeiros e compañeiras. Ata a propia Función Pública recuou, e no concurso de escalas de finanzas aprobado na Comisión de Persoal do 16/06/2021, xa non é necesario facer nada en caso de conformidade cos méritos (pero chega tarde para quen está afectado agora).
Traballo desenvolvido en comisión de servizos
Este asunto foi un dos puntos conflitivos durante a negociación, pois a CIG non acepta que se recoñezan méritos obtidos sen existir un criterio obxectivo de selección, como é a figura da comisión de servizos.
Finalmente, a Dirección Xeral de Función Pública publicou unha modificación das bases nas que corrixe a metedura de pata, engadindo esta redacción ás bases: "O traballo desenvolvido na situación de comisión de servizos puntuarase como realizado no posto de orixe da persoa funcionaria".
Ollo. Falamos do traballo desenvolvido. Outra cousa diferente son os méritos específicos.
- Detalles
A CIG Autonómica ten solicitado en incontables ocasións xuntanzas e mesas de negociación coa Consellería de Cultura, Educación e Universidade para aqueles asuntos de interese para o persoal non docente dos centros de ensino; pero con carácter xeral esta Consellería non quere entender que o ámbito de negociación lexítimo non é a Mesa Sectorial Docente cando o que se negocia afecta a unha parte do seu persoal que non é docente.
Que fixemos nos últimos meses?
- O Protocolo de adaptación ao contexto Covid para o curso pasado (2020-2021) tratouse no ámbito da Mesa Sectorial do Persoal Docente. Aínda así, e dada a excepcionalidade e importancia deste asunto, xa que afectaba as condicións de traballo do persoal non docente, por responsabilidade, dende a CIG Autonómica fixemos achegas a cada unha das versións deste protocolo que se foron publicando na páxina web, achegas que non foron respondidas por parte da Consellería.
- En abril deste mesmo ano, repítese esta maneira de proceder por parte da Consellería cando se leva á mesa sectorial a negociación da orde pola que se regula a atención á diversidade do alumnado dos centros docentes, o que produce a queixa da CIG Autonómica en varias Mesas Xerais de Empregados Públicos e, que incluso, nos obrigou a presentarnos na xuntanza da mesa sectorial para esixir a súa negociación coa representación lexítima do persoal.
- En maio, a Xunta propón unha modificación da RPT desta Consellería. A última creación en RPT de postos de persoal laboral existentes foi no ano 2015, e dende aquela creáronse numerosos postos que están fóra da RPT (abondan exemplos de postos de auxiliar coidador, axudante de cociña, intérprete de linguaxe de signos...). Nunha xuntanza anterior pola RPT de educación en data 26/09/2019, responsábeis da consellería de Educación recoñeceron o problema e comprometéronse a “comezar a traballar na RPT do persoal laboral” co fin de regularizar a situación dos postos ficticios. Pero desta volta con esta nova modificación tampouco se inclúe a este persoal o que supón que
- Os postos que non meteron en RPT non puideron ser ofertados na recente elección de destino do proceso de camareira/limpadora (promoción interna e libre).
- As persoas que os ocupan non poden cobrar todos os pluses aos que si terían dereito de estar en RPT.
- O Protocolo de adaptación ao contexto Covid do vindeiro curso 2021-2022, que loxicamente afecta a persoal non docente, é novamente levado a consideración pola mesa sectorial o pasado 13 de xullo, sin que se nos faga partícipes.
- O persoal non docente itinerante atópase discriminado respecto do persoal docente itinerante, que dispón de un acordo das súas condicións de traballo dende o ano 2008 onde se recoñece, entre outras, a limitación de desprazamentos, a compensación económica destes desprazamentos, a protección da súa saúde nos desprazamentos e incluso a protección as docentes xestantes. O persoal non docente non ten recollido ningún destes dereitos e compre a súa urxente negociación para que se habiliten de cara o curso 2021-2022.
- Ratios de limpeza e comedores: Respecto de outro persoal non docente como pode ser o de limpeza ten establecida unha ratio dende o ano 1994 (sin ter en conta os cambios que se teñen producido nos centros de ensino dende aquela e moito menos o aumento das tarefas pola Covid); o único que fixo a Consellería foi facer contratos de acúmulos de tarefas (que xa remataron en xuño) pero soamente nalgúns centros, deixando a maioría deles sen ese reforzo, cousa que non se entende xa que a dispoñibilidade e as tarefas deste persoal incrementaron en todos os centros e non soamente nalgúns. Ou o persoal de cociña ó que se lle sigue a aplicar un decreto do ano 2013, que durante este pasado curso (e en vista do novo protocolo no vindeiro curso as cousas non mudan) tiveron que asumir as medidas establecidas pola Covid (varias quendas de comida, novos espazos empregados como comedores alternativos...) e neste caso sen ningún tipo de reforzo.
Por todo o anterior, a CIG Autonómica acaba de solicitar unha vez máis a negociación coa representación lexítima do persoal non docente por parte da Consellería de Cultura, Educación e Universidade e a recuperación do dereito á negociación colectiva das súas condicións laborais e avisamos que na CIG Autonómica xa non estamos dispostas a seguir consentindo este desleixo polo que esiximos unha mesa de negociación urxente de cara a acordar para o curso 2021-2022 avances nos seguintes asuntos:
- Condicións do persoal itinerante
- Ratios do persoal de limpeza
- Ratios derivados do decreto de comedores
- Bases de actuación para a negociación previa de todos os asuntos que afectan ao persoal non docente coa consellería do mesmo xeito que se fai co persoal docente no seu ámbito específico.
De non obter resposta por parte da Consellería de Educación a CIG Autonómica agotará todas as vías posibles.
- Detalles
Remata a negociación coa Consellaría de Emprego e Igualdade sen que a Xunta aceptara nengunha alegación agás correccións de erros de trascrición. Unha vez máis, a Xunta demostra que non ten intención de negociación e só quere cumprir o trámite.
Opoñémonos a que o posto de nivel 25 Unidade Sist. Informac. Serv. Público de Emprego sexa de libre designación. Por outra parte trasladarlle a este posto “a representación da Comunidade Autónoma na Comisión de coordinación” é un total despropósito pois esa representatividade da Comunidade recae nos órganos de estrutura, comezando polo altos cargos.
Solicitamos que as dispoñibilidades horarias leven o complemento adecuado incluído no CE.
Botamos en falta o reforzo das unidades de igualdade desta consellería a pesar de darlle bombo e porlle o nome a consellería e ter o I Plan de Igualdade para o persoal da Xunta de Galiza sen elaborar. Demóstrase coa falla do plan e do reforzo desta dirección xeral que a igualdade para este goberno é so unha cuestión de blanqueo social ou propaganda.
Hai un abuso na apertura a persoal doutras administracións. Falta a xustificación de que se poden abrir tanto por números e porcentaxes totais na Xunta como na consellería e a xustificación da reciprocidade.
Os programas de orientación están a ser ligados uns con outros, con continuidade. Non ten sentido esta forma de proceder e pedimos que se creen as prazas en estrutura. Por outra parte preguntamos nos centros pola necesidade dos postos que se propoñen para amortización das prazas de Lopez Mora e Pontevedra e se nos respostou que non se cobren porque o traballo era en parte realizado polo persoal de orientación. Que pasaría si se amortizan as prazas e desaparece o persoal dos programas? Quedariamos a mínimos nas oficinas de emprego. Entendemos que se deben crear as prazas de orientadoras/es en estrutura ou non proceder a amortización desas.
- Detalles
No DOG do 16/07/2021 fan públicas as puntuacións provisionais das persoas participantes admitidas no concurso para a provisión de postos de traballo vacantes da Administración xeral da Comunidade Autónoma de Galiza, convocado pola Resolución do 25 de novembro de 2019.
Publican as puntuacións provisionais das persoas concursantes admitidas, para cada un dos postos solicitados, no portal web corporativo da Dirección Xeral da Función Pública (https://www.xunta.gal/funcion-publica/concurso-de-traslados/).
As persoas interesadas poderán formular reclamación contra as puntuacións provisionais no prazo de dez días hábiles contados a partir do día seguinte ao da publicación desta resolución no DOG.
Tamén dan publicidade á modificación da Resolución do 26 de abril de 2021 pola que se aproba a relación definitiva de persoas admitidas e excluídas do concurso para a provisión de postos de traballo vacantes da Administración xeral da Comunidade Autónoma de Galiza, convocado pola Resolución do 25 de novembro de 2019
- Detalles
Recibimos aviso da Dirección Xeral de Función Pública no que nos comunican que a Resolución coas puntuacións provisionais das persoas participantes admitidas no concurso para a provisión de postos de traballo vacantes da Administración xeral da Comunidade Autonómoma de Galiza, vai ser publicada no DOG do venres 16 de xullo.
Non vamos a facer un repaso polos reiterados incumprimentos de prazos. Tan só vamos co último deles: este baremo provisional era marzo/abril deste ano, e xa estamos en xullo. Cando será a resolución definitiva, que era para xullo?