O xoves, 13 de decembro, os traballadores e traballadoras de negro dos Servizos Centrais da Xunta de Galiza concentrámonos en San Caetano para reclamar o dereito ao cobro do noso salario roubado, para reclamar, en definitiva, que se respecten os nosos dereitos. Contra os chuzos de punta e o vento, xuntámonos onde ben podíamos e, a pesar de todo iso, manifestamos o noso compromiso, un xoves máis, coa loita pola nosa dignidade como empregadas e empregados públicos.

Nun ambiente moi bon, ao que non axudou evidentemente as condicións climatolóxicas, estivemos berrando ao Consello da Xunta que se estaba a celebrar ao carón. "O noso diñeiro vai para os banqueiros", "Mans arriba, isto é un atraco", "Non é unha crise, é unha estafa", "A nosa dignidade, non é recortable", foron varias das consignas que se berraron, ademáis do xa protocolario minuto de ruído que tamén xa tradicionalmente lle adicamos todos e todas ao Consello da Xunta. E todo isto axudou a correlo frío.

Nesta concentración avanzouse a convocatoria para a semana que vén, animando á xente a participar e anunciando varias accións sorpresas que tentarán chamar a atención sobre a nosa loita e serán concretadas nos vindeiros días. Concentración que pechará o programa iniciado pola Xunta de Persoal "4 xoves, 4 causas" polo que durante os xoves de finais de novembro e os de antes de nadal estamos reclamando a recuperación dos dereitos perdidos, denunciando a nula vontade negociadora por parte de Función Pública e esixindo a paga extra que nos usurparon para darlla aos bancos e aos especuladores.

Non máis, o xoves que vén, día 20 de decembro, volveremos a estar aí, á mesma hora e no mesmo lugar, na explanada da cafetaría de San Caetano, aí onde os empregados públicos dos Servizos Centrais reclaman os seus dereitos e onde se pelexa polos Servizos Públicos. Se chove pois que chova que a auga fai falta, tanto nos ten, non imos agardar a que saia o sol.