Novas por contido

O 29 de xaneiro, a Xunta de Persoal da Xunta de Galicia en Lugo mantivo unha entrevista co Fiscal Provincial de Lugo para darlle coñecemento do que ao noso entender é un dos máis claros exemplos de cómo se pode ignorar a lei todos os días e nin tan sequera disimulalo. E para ilustrar a nosa acción, elaboramos un informe (preme aquí para descarregalo) no que se poñen de manifesto e con exemplos, varios incumprimentos da Xunta de Galicia en materia de normativa reguladora nas comisións de servizos.

A comisión de servizos é un procedemento de provisión de postos de traballo de carácter excepcional para darlle cobertura a postos vacantes que teñan unha urxente necesidade. É un procedemento regulado e creado para suplir unha eiva temporal e está limitado no tempo xa que o procedemento ordinario é o concurso de traslados. O problema radica en que os concursos de traslados que deberían ser anuais e resolvidos en seis meses (artigo 29 da LFPG) no seo da Xunta de Galicia temos exemplos de concursos de traslados que se demoran ata dez anos.  Á parte diso, a Xunta de Galicia incumpre sistematicamente toda a normativa reguladora deste medio de provisión temporal como poñemos de manifesto no informe presentado e que se estrutura deste xeito:

 

  • Antecedentes: Nesta parte do informe poñemos de manifesto perante a Fiscalía provincial as solicitudes feitas por esta Xunta de Persoal desde xuño de 2011, solicitando información dos/das responsables da Xunta de Galicia sobre as comisións de servizo na nosa provincia sen ter nunca resposta por parte das autoridades e de como vimos denunciando periodicamente aquelas comisións de servizo que son a todas luces irregulares.
  • Aplicación e situación: Expóñense no informe os puntos onde se incumpre a normativa reguladora. Máis do 50% das comisións de servizo da provincia de Lugo incumpren a limitación temporal de dous anos que indica a lexislación. Tamén se burla a normativa en dereitos dos traballadores e traballadoras a optar limpamente a unha comisión de servizos cun mínimo de garantías de imparcialidade no proceso.Neste apartado tamén se pon de manifesto a utilización da comisión de servizos en postos de libre designación  na administración para non perder a praza que teñen obtido no concurso de traslados.  Neste caso temos exemplos tan claros como varias Xefaturas Territoriais ou o Secretario Territorial que tamén incumpren a limitación de tempo dunha comisión de servizos. Por último, analizamos que máis do 60% das comisións de servizo da provincia de Lugo están concedidas aos niveis máis altos da nosa administración coma se de postos de libre designación se tratase.
  • Referencia de sentenzas:  Nesta parte xuntamos sentenzas individuais de traballadores e traballadoras que se sentiron discriminados/as e decidiron acudir á xustiza para que se respectasen os seus dereitos.  Varios exemplos da acción da xustiza contra a Xunta de Galicia por este asunto.
  • Denuncia: Presentación ante a Fiscalía Provincial do que consideramos que é unha práctica irregular sistemática e continuada contra a lexislación e a normativa vixente para que investigue os feitos e actúe se cre que o debe facer.Denúnciase á Delegada Territorial da Xunta de Galicia en Lugo e mais ao Director Xeral da Función Pública para que se estude se puideron ter incorrido en presuntos delitos de prevaricación ao seren coñecedores dos feitos tal e como acredita o informe.
  • Anexos : Enumeración das comisións de servizo concedidas na nosa provincia durante o último ano, libres designacións na Xefatura Territorial do Medio Rural e documentación de todas as denuncias e escritos feitos por esta Xunta de Persoal para intentar poñerlle freo a estas prácticas.

Outras novas recentes

Martes, 21 Outubro 2025

RPT IGVS (para CP 24/10/25)

A Dirección Xeral de Emprego Público e Administración de Persoal convocou unha xuntanza da Comisión de Persoal para o día 24 de outubro, co seguinte punto da orde do día: Proposta de modificación da Relación de Postos de Traballo (RPT) do Instituto Galego da Vivenda e Solo (iGVS) Esta proposto pasou pola Mesa Sectorial de Negociación de Persoal Funcionario (MSF) o pasado...
Luns, 20 Outubro 2025

Proposta de modificación da RPT do Instituto Galego de Vivenda e Solo (MSF 17/10/25)

O pasado venres día 17 de outubro á Mesa Sectorial trouxeron a proposta de modificación da relación de postos de traballo (RPT) do Instituto Galego de Vivenda e Solo (IGVS) Contido da proposta: Creacións de 24 postos de traballo: 1 posto de director/a, 5 postos de xefatura de servizo, 1 posto de xefatura de oficina técnica ,5 postos de xefatura de sección, 5 postos de...
Luns, 27 Outubro 2025

Manifestación do SPIF o 30 de outubro: a mobilización funciona!!

Seguimos adiante na loita aínda que CCOO, UGT e CSIF intenten deixar vendido ao persoal do Servizo de Incendios Forestais Denunciamos a actitude desleal e irresponsable de CCOO, UGT e CSIF, que solicitaron DESPOIS DA CONVOCATORIA DA MANIFESTACIÓN, unha reunión coa Consellería do Medio Rural excluíndo a representación maioritaria do persoal. Esta manobra, xusto antes da...