A nómina, que se entenda
O xerente do Consorcio Galego de Servizos de Igualdade e Benestar, Perfecto Muíños, máximo responsable da xestión desta entidade, non está a cumprir adecuadamente coas funcións e responsabilidades inherentes ao cargo para o que foi nomeado. É imperativo salientar que esta deficiente xestión afecta, engadindo ao persoal substituto, a máis de 2000 persoas traballadoras.
O persoal encargado das nóminas é insuficiente (dúas traballadoras). Os problemas de eivas na xestión de persoal son endémicos no Consorcio, engadíndose agora os derivados dos procesos de estabilización, a integración do persoal como propio da Xunta e a súa funcionarización, o cambio de vínculo do persoal temporal a funcionarizado interino e xestión de nóminas tras as sentenzas sobre a carreira profesional de 2019.
A inseguridade que sofre o persoal ao non saber se os pagamentos son correctos causa un grave prexuízo na saúde laboral das traballadoras e traballadores. As nóminas do Consorcio son máis un xeroglífico que un documento intelixible para quen as recibe e non hai ninguén en servizos centrais que conteste ás dúbidas nin que explique os conceptos.
As nóminas do persoal, produto da falta de medios humanos e o estrés laboral que xera, veñen con moitos erros:
• Non se están pagando os trienios ao persoal fixo funcionarizado dende hai dous meses.
• Non se lle paga, no complemento específico, o complemento de dirección as persoas que a asumen.
• Non lle pagan os trienios xa xerados a parte do persoal das listas de contratación (agora funcionarizadas).
• Erros na execución de sentenzas sobre a carreira profesional de 2019 e falta de execución de moitas das sentenzas no referido a pagamentos.
• Pagamentos do grao 2 do complemento de desempeño incompletos, cando hai sentenzas xudiciais firmes e os terían que pagar con efectos dende xaneiro de 2022 (só pagan con efectos retroactivos dende xaneiro de 2025).
A CIG pedimos:
• Que se inste ao Consorcio a que corrixan todas as irregularidades que se están a dar e que se dote ao departamento de persoal, principalmente no referido a confección de nóminas, dos medios humanos e materiais que se precisen.
• Que se estableza unha canle de comunicación fluída co departamento de persoal e se dea a resposta que se solicita nun prazo razoable.
• Que se dote ao Consorcio de persoal competente, comezando pola xerencia.