- Detalles
Preguntamos pola promoción interna de Psicoloxía xa que a primeira parte foi o día 30 de xuño e o segundo exame tiña que ser en 40 días e sacaran resolución ampliando 20 días máis. O prazo (coa ampliación) rematou o pasado 18 de setembro e non temos máis información.
O que nos din da DXEP é que remataron de preparar o buzón de postos e continuarán en breve, pero non da datas.
Ademais se reclama que se de continuidade ao proceso de integración do INTECMAR, do que non da resposta da DXEP.
Consorcio
O desastre na xestión do persoal é tal que case que levamos tempo en condicións de poder dicir que será “a pregunta Consorcio” propia de cada mesa de negociación.
Nesta ocasión o Consorcio repite o mesmo erro que coas escalas infantís, agora para o persoal sociosanitario: requírelles que para poder asinar a toma de posesión a partir do día 1 deben entregar a mesma documentación solicitada na resolución do DOG coa lista de persoas aprobadas, necesaria para poder acceder ao acto de elección de destino (de feito se non a entregaban decaían).
Como é posible que repitan o erro? Isto nas escalas infantís (mentres non se aclarou), levou a que varias traballadoras atrasaran a súa toma de posesión porque non conseguían cita para solicitar o informe médico. Piden CELGA, informe médico e titulación académica. Non hai consellería que faga isto que fai o Consorcio. Hai que pecharse en San Lázaro de novo para que actúen?
Tamén preguntamos cando pensan comezar a respectar a conciliación e resolver as reducións de xornada.
A directora xeral responde que estamos no certo e que non poden pedir esa documentación de novo e xa entregada. Que unha vez máis darán aviso no Consorcio de que é un erro pedila. Das reducións non se manifesta.
Tamén se fala de que as comisións de servizo, ao non ter control ningún están supoñendo diferentes tipos de situacións como que nalgunhas das xefaturas territoriais de Política Social din que van resolvelas antes das tomas de posesión, co cal as novas funcionarias non poderían acceder a elas, cousa que si se puido facer noutras escalas.
A directora di que terían que levar o mesmo sistema que noutras escalas e poder acceder as novas funcionarias.
- Detalles
Esiximos a convocatoria urxente da Mesa de seguimento do Acordo das condicións de traballo e avances na xubilación anticipada e a inclusión na xuntanza do 24 de setembro das especializacións e da actualización do Acordo de condicións de traballo, ao tempo que denunciamos a total falla de planificación de Defensa do Monte para o dispositivo de incendios ante o posíbel outono cálido e seco que prolongaría o risco de lumes forestais.
Convocatoria urxente da Mesa de seguimento do Acordo de condicións de traballo e avances na xubilación anticipada
Na CIG lamentamos a falla de resposta da Consellaría do Medio Rural ás reivindicacións das escalas de enxeñaría forestal, un persoal que desempeña funcións esenciais na planificación e xestión forestal, na coordinación do dispositivo e na loita contra os incendios forestais.
Após as reunións mantidas nos meses de maio e xuño para abordar diferentes cuestións que preocupan a este colectivo, dende a CIG sinalamos que a conselleira do Medio Rural convocounos a unha xuntanza para o vindeiro 24 de setembro. Porén, a orde do día limita a reunión unicamente á cuestión da aplicación de coeficientes redutores para facilitar a xubilación anticipada.
Convocatoria da Mesa de seguimento do Acordo das condicións de traballo do persoal técnico
Na CIG resúltanos incomprensíbel que fiquen fóra desta convocatoria outras reivindicacións prioritarias para o persoal técnico, como as especializacións ou a actualización do Acordo de condicións de traballo.
Esta situación non é nova. O 6 de marzo do 2024 as organizacións sindicais —coa excepción de CCOO— solicitamos formalmente a convocatoria da Mesa de seguimento do Acordo de condicións de traballo do persoal técnico. Trátase dun acordo que data de 2008 e que, despois de case dúas décadas, precisa dunha revisión e actualización que dea resposta á realidade actual destes postos de traballo.
Na CIG tampouco entendemos que as persoas responsábeis da Consellaría do Medio Rural manteñan reunións con outras escalas, grupos e categorías que forman parte do dispositivo de prevención e extinción de incendios forestais e, pola contra, non atendan do mesmo xeito as escalas de enxeñaría forestal. Este persoal asume importantes responsabilidades na planificación do territorio, na coordinación, na xestión forestal e na propia extinción dos incendios.
Esta falla de atención resulta aínda máis preocupante cando o executivo galego vén insistindo publicamente na necesidade de investir e reforzar a prevención dos incendios forestais. Fronte a estas declaracións, dende a CIG advertimos de que na Dirección Xeral de Defensa do Monte existen dúas prazas dependentes da Subdirección Xeral de Prevención que levan meses sen estar ocupadas.
Xubilación anticipada e coeficientes redutores
O 14 de setembro de 2026 a CIG rexistrou perante a Secretaría Xeral Técnica do Medio Rural e a Dirección Xeral de Emprego Público e Persoal un escrito no que solicitamos a modificación da normativa de emprego público necesaria para facilitar a xubilación anticipada do persoal técnico mediante a aplicación dos correspondentes coeficientes redutores.
Esta será unha das cuestións que o noso sindicato trasladará á conselleira na reunión do día 24 de setembro, na que tamén reclamaremos que se desbloquee dunha vez a situación do colectivo e que se convoque, coa máxima urxencia, a Mesa de seguimento do Acordo do persoal técnico, ademais de que se cumpran os compromisos adquiridos pola Administración a respecto das restantes reivindicacións pendentes.
Incerteza ante o remate das gardas o 30 de setembro
Dende a CIG advertimos á Consellería de que o 30 de setembro rematan os 4 meses de gardas deste persoal sen que, a día de hoxe, se coñezan as previsións da Dirección Xeral de Defensa do Monte a respecto do dispositivo de incendios para as semanas posteriores.
Esta falla de planificación resulta especialmente preocupante ante a posibilidade de que se produza un outono cálido e con poucas precipitacións, circunstancia que podería prolongar o risco de incendios forestais máis alá do período habitual.
Por todo isto, a CIG esíxelle á Consellaría do Medio Rural que deixe de adiar os problemas do persoal técnico de enxeñaría forestal, que abra unha interlocución efectiva co colectivo e que dea resposta ás cuestións laborais e organizativas que levan anos pendentes.
- Detalles
A CIG vén de solicitar a Función Pública que aquel persoal que supere un proceso de estabilización e que teña recoñecida a axuda por persoa con discapacidade do artigo 35 do V Convenio Colectivo da Xunta de Galiza non deixe de percibila.
Entendemos que, como xa pasou co persoal laboral que se funcionarizou, o persoal que estabilizou deixará de percibir esta axuda e cando menos terá que esperar a que se abra novamente o prazo de solicitude do Fondo de Acción Social (FAS) para que poida solicitar a pervivencia do seu dereito.
Hai que ter en conta, tamén, que o FAS leva un importante atraso (agora mesmo aínda está sen resolver o que corresponde ao ano 2025), polo que, se a este persoal non se lle mantén o dereito que tiña recoñecido como persoal laboral, tería que esperar ata o ano 2027 para poder solicitalo.
É evidente que o importe non é elevado, pero si que supón unha axuda para contribuír aos gastos que supón ter unha persoa dependente a cargo e que ten uns ingresos moi baixos (inferiores ao SMI).
A CIG xa leva anos denunciando que do FAS xa só queda a axuda para a atención de persoas con discapacidade porque a Xunta mantén suprimidas as axudas iniciais deste fondo, como a xubilación, discapacidade propia, fillos/as menores, maiores a cargo, axuda aos estudos de fillos/as e propios, adquisición de vivenda, gastos sanitarios e ópticos.
É por iso que xa solicitamos que esta axuda sexa incluída no recibo de salarios tamén para o persoal funcionario, co mesmo sistema de solicitude e xestión que ten o persoal laboral. De non facerse así supón un agravio comparativo para o persoal funcionario público que cada ano debe solicitar e achegar a documentación xustificativa para percibila con máis de un ano de atraso.
Para poder facelo sería necesario acompasar os dous anos que leva de atraso e é preciso incrementar o orzamento, polo que a CIG novamente o incluirá nas súas achegas á lei de medidas que se negocie nos vindeiros meses.
Agora mesmo manter a axuda do artigo 35 a aquelas persoas que a viñan percibindo é cuestión de vontade, non de cartos, porque ese orzamento existe polo que... Haberá vontade por parte de Dirección Xeral de Emprego?
- Detalles
A CIG denuncia que Facenda, por aforrar 2 pesos, incumpre toda a normativa de igualdade situándonos na prehistoria dos dereitos das mulleres traballadoras.
Traballadoras da Xunta de Galiza veñen de ver denegado o grao de carreira profesional por non acadar o tempo necesario para a súa concesión, alias a súa antigüidade na Administración fora máis que suficiente. Unha vez conseguida a aclaración do departamento de Emprego público, a causa é que o tempo en redución de xornada por conciliación non se esta a contabilizar, só se está a contar o efectivamente traballado.
Dupla penalización
Na CIG non saímos do noso asombro. A propia Función Pública discrimina na promoción profesional ás súas traballadoras por usar seu dereito á conciliación, facéndoas caer na dupla penalización: redución de salario e redución na carreira profesional.
Por iso, preguntámonos quen está ao mando deste barco, quen controla que se cumpra a normativa de igualdade e non discriminación, para que serve ter un Plan de Igualdade se non se cre na Igualdade, quen dá este tipo de ordes discriminatorias e onde está a formación do persoal responsable e das persoas traballabadoras en materia de igualdade para que isto non poida suceder.
No noso sindicato cuestionamos a hipocrisía e falla de compromiso coa igualdade e solicitamos que corrixan estas prácticas discriminatorias e que fagan real e efectiva a igualdade na Xunta de Galiza.
Denuncia no xulgado
De non ser así, advertimos de que acudiremos aos tribunais a denunciar á Dirección Xeral de Emprego Público e ao resto de consellarías que non están a contabilizar a redución de xornada, por violación do dereito fundamental á igualdade por razón de xénero na promoción profesional e no salario.
Na CIG amosamos a nosa desconformidade con que non se computen para carreira profesional como xornada completa as xornadas inferiores á ordinaria, da mesma forma que acontece nos trienios. A antigüidade sempre é a xornada completa e existe numerosa normativa e xurisprudencia que así o recoñece.
- Detalles
O deber legal de capacitar o persoal público en galego non pode depender de convenios temporais nin asentarse na precariedade laboral
A CIG esixe a ampliación inmediata e con efectos retroactivos da xornada do persoal titulado superior lingüista da Secretaría Xeral da Lingua, ao que a Xunta duplicou a carga de traballo dende o 1 de setembro. A sobrecarga pon en risco os prazos, a atención ao alumnado e a calidade da formación.
Na primeira xuntanza para negociar as condicións laborais do colectivo, celebrada o 8 de setembro, a Secretaría Xeral Técnica da Consellaría de Cultura, Lingua e Xuventude recoñeceu que o problema xa existía antes da estabilización derivada da Lei 20/2021. Porén, presentou unha solución provisional baseada en horas complementarias, sen garantir nin a xornada completa nin a actividade durante os doce meses.
A Administración non achegou informes sobre o tempo necesario para desenvolver as tarefas, a carga efectiva, a demanda atendida e non atendida, o financiamento, o impacto de xénero ou o custo da ampliación. Escúdase na anualidade orzamentaria, na dependencia de convenios e fondos externos e nos límites previstos para incrementar determinadas partidas en 2027. Para a CIG, nada disto xustifica unha precariedade que dura décadas.
Unha necesidade permanente tratada como temporal
Os 18 postos da relación de postos de traballo, a media xornada e con só sete meses de actividade anual, non abondan para atender unha demanda elevadísima. En 2024 a Escola Galega de Administración Pública (EGAP) convocou oficialmente 750 prazas para os cursos de linguaxe administrativa e xurídica galega (LAG e LXG) fronte ao redor de 5.000 solicitudes —únicos datos facilitados pola propia Escola—. Milleiros de persoas empregadas públicas fican sen formación ano tras ano.
Os cursos Celga, LAG e LXG préstanse de maneira continuada dende hai décadas. A reiteración da actividade, a renovación anual dos convenios e a propia estabilización dos postos acreditan unha necesidade estrutural. A súa natureza non muda porque se financie mediante fondos ou convenios temporais. A Xunta non pode manter durante anos un servizo permanente con financiamento provisional e empregar despois a falla de orzamento para negar a xornada completa e a estabilidade laboral.
Formar en galego é un deber legal permanente
A formación lingüística en lingua galega non é unha actividade ordinaria nin accesoria. Está ligada ao dereito da cidadanía a empregar esta lingua, á obriga dos poderes públicos de garantilo e á capacitación do persoal para atender, redactar e tramitar en galego con corrección e seguridade.
O artigo 3.1.i) da Lei 4/1987, do 27 de maio, de creación da EGAP, na redacción dada pola Lei 10/1989, atribúelle a capacitación do persoal, a difusión e normalización do galego na Administración e a participación na fixación da linguaxe técnica, administrativa e xurídica. Son deberes públicos permanentes, non tarefas subordinadas á existencia dun convenio anual.
Nun contexto de perda de falantes, feble presenza do galego en ámbitos profesionais e competencia insuficiente por parte do persoal público, a formación especializada resulta indispensábel. Non abonda con acreditar coñecementos xerais: cómpre garantir unha capacidade efectiva para traballar en galego con calidade.
A proposta do goberno da Xunta da actualización do Plan xeral de normalización da lingua Galega en 2026 recoñece a elevada demanda, a insuficiencia da oferta especializada e o limitado protagonismo da EGAP, da Academia Galega de Seguridade Pública e da Axencia Galega para a Xestión do Coñecemento en Saúde. É contraditorio anunciar a revitalización do idioma mentres se precariza o persoal encargado de facela posíbel. Un plan sen persoal suficiente, estabilidade, orzamento e avaliación non é unha política lingüística efectiva: é propaganda.
Persoal precario e distribución opaca do traballo
A CIG reclamou información sobre quen imparte e titoriza os cursos, coordina a formación, realiza as segundas e terceiras correccións, elabora materiais e exames ou participa nas avaliacións. Tamén pediu datos sobre convenios, entidades asinantes, horas, retribucións e compatibilidades.
Segundo a información trasladada polo colectivo, parte destas tarefas estaría a ser realizada por persoal doutras escalas da Xunta ou doutras administracións que xa traballa a xornada completa. A Secretaría Xeral Técnica non aclarou o alcance destas colaboracións nin a distribución efectiva da carga.
Para a CIG é inaceptábel manter o persoal propio a media xornada e con actividade descontinua mentres parte das súas funcións se atribúen a outras persoas como segunda actividade. O traballo estrutural debe corresponder ao colectivo que o ten encomendado. As colaboracións externas, de existiren, deben ser excepcionais, complementarias, motivadas e transparentes, nunca substitutivas do cadro propio.
Unha precariedade con faciana de muller
En 2016, o colectivo de persoas colaboradoras estaba integrado por 51 mulleres e 11 homes: un 82 % de mulleres, tendencia que se mantén. A parcialidade, a descontinuidade e a imprevisibilidade prexudican as retribucións, a cotización, a protección social e a conciliación. A CIG reclama que se avalíe expresamente este impacto de xénero.
As deficientes condicións económicas provocaron varias renuncias após a estabilización. A Administración non fixou un prazo certo para publicar a relación complementaria dos procesos selectivos e adía até 2027 a posíbel incorporación de persoal. A CIG esixe a cobertura inmediata e unha listaxe específica, consonte o Decreto 37/2006, para substituír con axilidade baixas, permisos e renuncias. Parte do colectivo comunicou, ademais, a presentación dunha denuncia perante a Inspección de Traballo. A negociación non pode limitar os dereitos nin as accións individuais ou colectivas xa iniciadas.
Xa non caben máis parches! Solución xa!
- Detalles
A Xunta asigna dous cursos simultáneos de teleformación ao persoal da Secretaría Xeral da Lingua, cuxos postos son a media xornada
A CIG esixiu á Secretaría Xeral Técnica da Consellaría de Cultura, Lingua e Xuventude a ampliación inmediata e con efectos retroactivos da xornada do persoal titulado superior lingüista da Secretaría Xeral da Lingua para garantir os cursos de linguaxe administrativa galega e de linguaxe xurídica galega (LAG/LXG) da EGAP iniciados o 1 de setembro.
Cada lingüista ten asignados, de xeito simultáneo, dous cursos de teleformación deste semestre, o dobre do que viña atendendo, malia ter unha xornada parcial e o seu período de actividade abranguer dende o 1 de setembro e rematar o 22 de decembro.
Cada curso conta con 25 participantes e unha tarefa semanal por persoa. Segundo a estimación do colectivo, corrixir as 25 tarefas pode requirir ao redor de 17 horas semanais por curso. Dous cursos representarían unhas 34 horas só de corrección, ás que se deben engadir foros, consultas privadas, materiais, incidencias e demais tarefas de titorización.
Na xuntanza do 8 de setembro, a CIG advertiu de que esta carga non pode atenderse axeitadamente cunha media xornada e de que os atrasos se acumularán durante todo o curso, con consecuencias para o persoal, o alumnado e a calidade da formación.
A Administración presentou unha proposta de acordo sen achegar un estudo das cargas de traballo que permita comprobar canto tempo require cada modalidade de curso. Tampouco facilitou informes sobre demanda, financiamento, impacto de xénero ou custo da ampliación dos postos.
A CIG rexeita que se fixe automaticamente un número de cursos sen computar a preparación, titorización, corrección, avaliación, atención ao alumnado, materiais, coordinación, incidencias e reclamacións.
A Secretaría Xeral Técnica defendeu que as horas complementarias poden calcularse en cómputo anual. Porén, o acordo non pode declararse, sen máis, un título suficiente para exixilas. Deben respectarse os límites, o pacto escrito cando proceda, o preaviso, o rexistro, a retribución, a cotización e os supostos de renuncia do artigo 12.5 do Estatuto das persoas traballadoras.
As necesidades permanentes non poden cubrirse mediante horas complementarias habituais. A CIG reclama a xornada completa, a prestación durante os doce meses e a modificación da RPT.
Dende a CIG urximos á Xunta a actuar antes de que a sobrecarga provoque o colapso dos cursos que xa están en marcha!
- Detalles
Á Comisión de Persoal do mércores 9 de setembro, foi como único punto da orde do día a proposta de modificación de varios postos na Relación de Postos de Traballo (RPT) das consellerías de Emprego, Comercio e Emigración, e de Presidencia, Xustiza e Deportes, a causa da execución de sentenzas de persoas que reclamaron destino definitivo no posto que ocupaban en provisional.
Se ben estamos conformes en que hai que acatar tales sentenzas, non estamos de acordo coa forma de proceder: amortizan dous postos para crear outros dous. Para a CIG, terían que ter prover o orzamento para crear dous novos postos, polo que o noso voto foi a abstención (CCOO, CSIF e UGT votaron a favor).
Na rolda de intervencións quixemos aclarar o seguinte:
É totalmente vergoñento que tras anos solicitando o traslado de centro a tres traballadoras que accederon como subalternas ás prazas de discapacidade intelectual (en destino provisional dende o 2018) do que ROGAN moverse por non adaptarse ás condicións que poden desenvolver, todo continúe igual. Dende a CIG levamos multitude de escritos, Valedora do pobo, e infinidade de mesas de negociación pedindo que teñan un destino definitivo no que exercer o seu traballo con dignidade. A Xunta de Galiza continúa co “estamos traballando” e o tempo corre en contra delas. Teremos que acudir a outro tipo de vías que resolvan esta situación!
En relación ás probas físicas que quedaron pendentes do proceso de SPIF di a directora que non poden realizalas ata rematar o período de alto risco de incendios.
Tal e como adiantamos na CIG o pasado 4 de setembro, confirma a DXEP que na última semana de setembro publicarase no DOG o acto de elección de destino de camareiras/os, limpadores/as, cociña, condución, mantemento e laboratorio, e que será de máis de 1000 persoas. A súa pretensión é que sexa todo nun acto único, aínda que deben comprobar se se darán moitas renuncias dos procesos dos anos 2023 e 2024.
Para os procesos de PSX, persoal xerocultor e persoal veterinario non dá datas pero si anuncia que serán os seguintes. E o proceso de C2, auxiliar de bibliotecas di que irían a continuación.
Para finalizar informan que os procesos de A1 e A2 de finanzas teñen pendentes de convocar o concurso de traslados e que retomarán a negociación da RPT das oficinas de emprego unha vez rematen os procesos pendentes.
- Detalles
Na MSF trouxeron a proposta da modificación da RPT Administración Xeral da Comunidade Autónoma na Consellería de Emprego, Comercio e Emigración e na Consellería de Presidencia, Xustiza e Deportes na que se amortizan dous postos para crear outros dous. Dende a CIG non estamos de acordo coas amortizacións pero o que ademais lle fixemos saber á DXEP é que estas presas débense a non ter feito os cálculos para dar postos nos corpos xerais a quen ten que tomar posesión o día 15.
Na rolda de intervención tratamos as seguintes cuestións:
1) Datas dos vindeiros actos de elección de destino pendentes: A DXEP di que os seguintes serán o persoal de mantemento, limpeza, cociña, recursos naturais, conductorxs, e que será un volume moi alto de participantes. Es acto será neste mes de setembro pero como aínda hoxe resolveron o de persoal aux coidador, non teñen data de publicación. Que informarán nos seguintes días.
Di que neste mes irán rematando os concursos de traslados que están pendentes de resolverse e que a idea que teñen é ter todo listo en novembro.
2) Promoción interna 23, necesitamos saber se hai data programada e nos di que si, que está enviada para que se publique no DOG do 16/09/2026.
3) Segundo as instrucións de ceses e tomas de posesión de persoal sociosanitario (que entendemos que soamente recibiron nos centros, nos non as temos, nin están publicadas) din que: “ Exclúese tamén o sábado do cómputo de acordo co establecido no n2 do artigo 30 da lei 39/2015”. Como o que se nos traslada á CIG son interpretacións diferentes desta instrución, pedimos aclaración e o que nos di a directora é que “o sábado non é hábil a todos os efectos”.
4) Escolas infantís: O caos é a dimensións inimaxinadas. Non existen instrucións de ceses e tomas de posesión do segundo acto de elección de destino e nos servizos centrais a información é totalmente diferente segundo con quen consultemos.
Ainda non están cesadas aquelas persoas que tiñan que estalo a 17/08, co cal non cobran a prestación por desemprego nin poden optar a vacantes, se a Xunta non resolve estas persoas tomarán as medidas legais oportunas, porque é un escándalo o que está a suceder.
Ademais, dende os servizos centrais están pedindo entregar o certificado médico coa toma de posesión cando xa o entregaran cando sairon as listas de aprobadas.
Explica a directora xeral de Emprego Público que no primeiro acto cesaron a todas as persoas que non estabilizaban o día 17 porque estaban as escolas pechadas, agora para o 2º acto continúan na vacante que ocupan como interinas ata que a titular do posto asine a toma de posesión.
Que falarán co departamento de persoal porque non poden ter esa situación irregular coa Seguridade Social e que non poden pedir os informes médicos para as tomas de posesión, xa que esta documentación xa foi entregada cando saíron as listas de aprobadas.
5) A Consellería de Educación enviou mail cun adxunto para presentasen renuncias antes do cese e a solicitude do carné de conducir para persoal aux coidador, que sentido ten todo isto? Cal é a intención destas solicitudes?
Responde a directora que ten que ser un erro da consellería porque efectivamente no caso das renuncias xa está o cese e non é necesario enviar renuncia algunha e no caso do carné de conducir non é un requisito recollido na RPT.
Por último engaden antes de rematar esta mesa que como retomamos agora a axenda de mesas que sabe que temos que tocar outros asuntos como negociar un novo modelo de procesos selectivos e que tamén quere informar que irán saíndo listas complementarias de novos aprobados de todos os procesos onde non se completaran as prazas, como é o caso de corpos xerais no que sairá a finais de setembro/principios de outubro (uns 20/25 novos aprobados/as).
- Detalles
O que non resulta admisible é establecer unha norma de seguridade sen dotar previamente os vehículos e o persoal dos medios necesarios para poder cumprila.
Hai que cumprir a norma SI, pero co material adecuado:
1. Real Decreto 1215/1997
• Art. 2: definición de equipo de traballo.
• Anexo I, apartado 1.6: risco de caída superior a 2 m → varanda ou protección colectiva equivalente.
• Anexo II, apartado 1.2: acceso e permanencia seguros nos lugares necesarios do equipo.
• Anexo II, apartado 4.1.1: prioridade da protección colectiva sobre a individual.
• Anexo II, apartado 4.1.4: dispositivos adecuados contra caídas.
2. Real Decreto 2177/2004, que modifica o RD 1215/1997 especificamente en materia de traballos temporais en altura.
3. Lei 31/1995 de PRL
• Art. 14: dereito á protección eficaz.
• Art. 15: evitar riscos e prioridade da protección colectiva.
• Art. 17: equipos de traballo e EPI adecuados.
4. Real Decreto 773/1997, se se pretende solucionar mediante arnés ou EPI anticaídas.
- Detalles
Chegounos información nestes días, de que persoal auxiliar coidador estaba a recibir un correo electrónico do Servizo de Selección de Persoal (Dirección Xeral de Emprego Público e Administración de Persoal), no que se lle informaba de que "para os efectos de acreditar estar en posesión do carné de conducir tipo B que se precisa para desenvolver determinados postos da escala de auxiliar de coidadores, subgrupo C2, é polo que se lle solicita que se envíe coa maior brevidade posible copia...".
O mércores 2 de setembro contactamos co Servizo de Selección de Persoal para falar sobre o asunto, e comunícanos que o permiso de conducir NON É UN REQUISITO IMPRESCINDÍNBEL para o persoal auxiliar coidador e polo tanto a Xunta NON PODE EXIXIRLLE NIN QUE O TEÑA NIN QUE O PRESENTE.
Por isto informamos que a súa presentación e/ou incorporación ao seu expediente FIDES é un acto VOLUNTARIO, NUNCA UNHA OBRIGA!!!!