Novas por contido

Detalles

Un grupo nutrido grupo de lingüistas e unha representación da CIG acudimos ao Pleno do Parlamento o 20 de outubro, onde se debateu sobre a situación límite que está a soportar este persoal e a altísima demanda de formación en galego desatendida ano tras ano pola Escola Galega de Administración Pública (EGAP). O BNG presentou unha iniciativa para ampliar a dotación de cursos de galego impartidos pola EGAP e converter a media xornada e os 7 meses de traballo do persoal lingüista en xornada completa e nunha prestación de servizos de 12 meses, de xeito que as persoas empregadas públicas poidan vivir do seu traballo. A iniciativa contou cos votos favorábeis de PSOE e BNG e o voto en contra do PP. 

Para a CIG, o Goberno galego vén de revelar cal é o seu posicionamento no Pleno do Parlamento de Galiza do día 20 de outubro: deixar sen formación en lingua galega á maioría do persoal empregado público da Administración xeral da Xunta e entes, e persistir no maltrato laboral ao persoal lingüista e na infradotación de medios humanos encargados de impartir os cursos.

Mentres o pacto PP-PSOE pola suposta «actualización do Plan Xeral de Normalización da Lingua Galega (PXNLG)»  acaba de ser aprobado no Parlamento a primeiros de outubro sen consenso, por supoñer un empeoramento das condicións da nosa lingua, e por ignorar o Protocolo Lingua Vital, a demanda non atendida da EGAP segue a medrar ano tras ano e o persoal encargado da formación ve reducida a súa xornada á metade co dobre de carga de traballo. 

 

1200 prazas de LAG/LXG fronte a 5650 solicitantes na EGAP en 2026

Na Escola segue a manterse unha única convocatoria ao ano de formación, por exemplo, en linguaxe administrativa galega e linguaxe xurídica galega (LAG/LXG). Nela cada aspirante a  obter o diploma de nivel medio ou superior só pode optar a solicitar unha única edición (25 prazas) no canto de participar na selección de persoas adxudicatarias para o total de prazas.

Isto fai que a demanda desatendida pola EGAP ano tras ano, sen que se lle aplique nin a máis mínima solución, se acumule e medre até límites insospeitados como os actuais, mentres o persoal ve imposíbel, durante moitos anos consecutivos, obter unha oportunidade para avanzar na súa carreira profesional e participar en igualdade de condicións con outras persoas nos procesos competitivos. 

Chega con dicir que no ano 2026 a oferta da EGAP para LAG/(LXG foi de 1200 prazas, mentres as persoas solicitantes sumaron un total de 5650. Porén, en vez de buscar solucións, a EGAP bota a pelota da responsabilidade no tellado da Secretaría Xeral da Lingua, obviando a parte que lle corresponde de traballo, e a Secretaría só dá escusas de que carece de fondos para cumprir cos seus cometidos, cando nestes momentos ten executados tan só o 35% dos seus orzamentos.

 

Precariedade extrema do persoal lingüista e infradotación do servizo de formación

A outra cara da moeda é o persoal lingüista da Secretaría Xeral da Lingua, sometido a abusos laborais dende o primeiro segundo do inicio das súas contratacións.

O empeoramento das súas condicións é inadmísíbel. O colectivo viña desempeñando unha xornada completa, até que despois da estabilización a súa xornada se reducise á metade. O comezo da súa prestación de servizos o pasado 1 de setembro foi a media xornada, e a Administración encargoulle o dobre de traballo, ocasionando a imposibilidade de cumprir os prazos de atención ao alumnado e provocando unha sobrecarga de traballo inasumíbel. Trátase dun servizo infradotado de persoal e as poucas traballadoras e traballadores cos que conta seguen, día tras día, soportando o maltrato institucional sen que a Xunta se apresure a solucionar este conflito.

Toda esta situación demostra que a denominada «actualización do PXNLG» do PP non é máis que unha pantalla para tapar a verdadeira aposta do Goberno galego por desprotexer o galego, impedir a capacitación lingüística do persoal da Administración e reducir á mínima expresión o dereito da cidadanía a ser atendida na súa lingüa.

Detalles

Logo de anos de loita semella que comeza a verse algo de luz ao final do túnel, estamos expectantes ante a reunión que nos agarda. Creemos que é fundamental unha regularización e actualización das funcións así como dotar dunha estrutura organizativa departamental encamiñada á profesionalización, acorde coas novas realidades técnicas  e  que dea resposta ás necesidades específicas de cada centro. 

A CIG leva as tarefas feitas, e  xa enviamos, o que pode ser a  base, para comezar a traballar o futuro acordo. 

Principios xerais colectivos:

  1. Axilidade nas coberturas: cobertura inmediata de toda baixa e permiso. Durante o proceso para a cobertura (2 días máximo) adaptaranse as funcións ordinarias ás circunstancias extraordinarias provocadas pola falta de persoal. Pasados os dous días acordados sin cobertura, a partir do 3º día establecerase un método de compensación, por esta carga de traballo engadida.

  2. Cobertura das prazas estruturais: creación de prazas por sobrepasar rateos fixados neste acordo ou polas limitacións que por esixencias de Saúde Laboral se teñan que adaptar postos do persoal que ocupa esa praza. Garantirase a creación das prazas para o inicio do seguinte ano académico. En tanto non se produce a creación e modificación da RPT, cubriranse mediante cúmulos de tarefas para evitar a sobrecarga do persoal.

  3. Todas as modificacións que impliquen un cambio organizativo, precisarán consenso co departamento afectado, e de ser o caso, si a modificación e substancial, negociación coa representación dos/as traballadores.

  4. Uniformidade: Se lle proporcionará  a todo o persoal que presta servizos na Consellería de Educación os uniformes que se precisen acordes á categoría profesional e á área onde desenvolven os seus servizos. Comprenderán por ano académico: 2 prendas de indumentaria laboral e 1 de calzado de traballo ou calzado de seguridade si o servizo que presta así o require. Serán proporcionados todos os EPIs que en materia de PRL sexan necesarios.

  5. Encadre das categorías dacordo a LEPG: As diferentes categorías profesionais que conforman o colectivo Persaol Non Docente (PND), serán encadradas no grupo ou subgrupo que lle corresponda dacordo coa titulación académica requirida para o acceso. Abrindo o grupo B para Técnicos Superiores e eliminando a Agrupación Profesional. Darase un encadre real das funcións desempeñadas. Así mesmo promocionaranse as escalas que a día de hoxe non se lle pide titulación específica para o desempeño pero existe esa oferta formativa dentro do catálogo académico da Consellería de Educación.
    - Contabilizar cursos doutras consellerías ou actividades formativas non curriculares aínda que sexan en horario habitual centro.
    - Negociar e aprobar as rateos específicas de centros e as RPTs antes do 15 de setembro de cada curso escolar, con negociación previa nas Xuntas de Persoal e entrega de datos dos centros e persoal á representación do persoal coa antelación necesaria para que sexan avaliados.
    - As equipas técnicas deberán ter actualizadas as medicións dos espazos especialmente cando estes espazos sexan ampliados ou modificados. Así mesmo as modificacións dos espazos deberán ter a correspondente avaliación de riscos realizada antes da incorporación do persoal ó traballo neses espazos.
    - Modificación da normativa relativa aos rateos dos comedores , persoal coidador, persoal administrativo e subalterno.

  6. Rateos: negociación de rateos por categorías en función de actividades formativas, ampliación dos centros, medicións reais (as actuais están obsoletas), estructura do edificio. En concreto no que atinxe a:

    • Contabilizar cursos doutras consellerías ou actividades formativas non curriculares aínda que sexan en horario habitual centro.

    • Negociar e aprobar as rateos específicas de centros e as RPTs antes do 15 de setembro de cada curso escolar, con negociación previa nas Xuntas de Persoal e entrega de datos dos centros e persoal á representación do persoal coa antelación necesaria para que sexan avaliados.

    • As equipas técnicas deberán ter actualizadas as medicións dos espazos especialmente cando estes espazos sexan ampliados ou modificados. Así mesmo as modificacións dos espazos deberán ter a correspondente avaliación de riscos realizada antes da incorporación do persoal ó traballo neses espazos.

    • Modificación da normativa relativa aos rateos dos comedores , persoal coidador, persoal administrativo e subalterno.

  7. Itinerancias: É fundamental regular as condicións de todo o persoal afectado polas itinerancias de xeito que se compatibilice coa vida persoal e familiar das persoas traballadoras.

  8. Seguridade e Saúde Laboral: Realizarase un plano preventivo específico no que se avaliarán todos os postos de traballo segundo tipoloxía de centro e funcións. Terase en conta de forma específica os riscos no embarazo e lactación (suspensión por risco). 

  9. Xornada de traballo, horarios e permisos: 35 horas, desfrute real dos asuntos propios e regulación de nocturnidades. Os permisos solicitaranse por medios telemáticos a través dun sistema normalizado e xenérico para todos os centros. A súa denegación deberá ser motivada, por escrito, con indicación expresa das necesidades do servizo e dos recursos procedentes, non admitíndose denegacións xenéricas.

  10. Espazos axeitados e diferenciados: Para o descanso do persoal, para gardar as pertenzas persoais. Eliminación de sinalización excluínte.

  11. Recoñecemento profesional e negociación dun catálogo de funcións: O persoal de administración e servizos dos centros educativos será encadrado no grupo e subgrupo de clasificación profesional que corresponda en función da titulación esixida para o acceso e das funcións efectivamente desempeñadas. En ningún caso poderá producirse unha situación de infraclasificación profesional que supoña unha rebaixa das condicións laborais ou retributivas do persoal. Elaboración dun catálogo que terá por obxecto definir as funcións propias de cada grupo, subgrupo e categoría profesional, evitando a asignación de tarefas alleas ao posto e garantindo a adecuación entre funcións, responsabilidade e clasificación profesional.

Con tal motivación, a CIG leva anos traballando de cara este colectivo e con moita máis intensidade estes dous últimos anos. Aquí deixamos recompilación:

 

Detalles

Información da Mesa Sectorial de Negociación de Persoal Funcionario, do 20/10/26:

Nomeamento das escalas convocadas a escoller destino no DOG 30/09/26 (limpeza, cociña, mantemento, RRNN, etc, que agrupou 18 convocatorias de procesos selectivos: afirma a DXEP que publicarán a resolución co nomeamento e destino adxudicado no DOG do 30/10/26. En canto á data de toma de posesión, non a teñen decidida, pero será na semana do 16 a 20 de novembro. Xustifica o retraso na necesidade de reorganizar en comisión de servizos e chamamentos de listas para as prazas non cubertas (principalmente por limpeza e condución, que non poden deixalas sen cobertura). 

Escala de A2-Inspección de turismo que están dende maio/2026 como persoal funcionario en prácticas: o tempo de prácticas finalizou o 31 de xullo. CIG reclamou que tomen medidas para que deixen de cobrar só unha parte das retribucións. A DXEP resposta que estas persoas serán convocadas a escoller destino definitivo na última semana de outubro.

Escala de A2-Consumo (promoción interna): a DXEP afirmou que na 2ª quincena de outubro serían chamadas a elección de destino. Temos información na CIG de que xa circula un listado de prazas que lles van ofertar (os sindicatos ainda non o temos), e que habería unha restricción importante de postos. Reclamamos que oferten todas as vacantes do concurso de traslados. A DXEP di que non o van facer así, que a súa obriga é ofertar un mínimo de prazas como de persoas convocadas, e que teñen prioridades. Denunciamos que están a restrinxir posibildiades ao persoal de promoción interna, tal e como xa pasou fai poucos días en corpos xerais. Esto é inaceptable, teñen que ofertar todas as vacantes. As persoas funcionarias non teñen por que asumir as consecuencias do mal facer da Administración e Xunta.

Proceso selectivo veterinarios/as 2024: cando rematen o proceso selectivo serán convocados/as para destino de inmediato, non terán que agardar por un novo concurso de traslados.

En canto á convocatoria de promoción interna a A2-Escala de inspección de consumo, na que ofertan 7 prazas (dos anos 2024, 2025 e 2026), vai ser por concurso-oposición. A CIG reclamou a eliminación do exame de desenvolvemento escrito de tema, ou alternativamente a súa substitución dunha proba tipo test. Rexeitamos a valoración do tempo en comisión de servizos no baremo de traballo desenvolvido. Rexeitamos o modelo restrictivo ás escalas que poden participar (sempre dende un criterio de reciprocidade que non están a permitir).

Detalles

A Dirección Xeral de Emprego Público e Administración de Persoal convoca Mesa Sectorial de Negociación de Persoal Funcionario para o martes 20 de outubro, para discutir a convocatoria da promoción interna á escala de inspección de consumo, subgrupo A2. Descargar. Outra vez nos envían a documentación sen tempo abondo para a súa difusión e preparación, sen unha negociación real. 

Se é do teu interese, contacta coa CIG.

Detalles

Na Mesa Sectorial de Negociación do Persoal Funcionario (MSF), discutimos coa Dirección Xeral de Emprego Público e Administración de Persoal (DXEP), as bases das convocatorias de varios procesos selectivos. Na rolda aberta de intervencións, a DXEP deu información sobre a convocatoria de elección de postos de diversas escalas.

Convocatoria de procesos selectivos

Respecto das convocatorias dos procesos selectivos, quedou claro unha vez máis que a directora xeral non ten intencións de negociar nada, pois a entrega dos borradores das convocatorias foi sen tempo para que as organizacións sindicais as poidamos difundir, estudar e alegar en condicións axeitadas. En definitiva, que o que busca a directora é simplemente cumprir coa obriga formal de negociación, sen interese de chegar a consenso coa representación do persoal. Supoñemos que na semana do 19 convocarán a Comisión de Persoal para a aprobación das convocatorias.

En todos os procesos reclamamos:

Queremos que as convocatorias sexan mediante concurso-oposición.
Non nos chega con que poñan o prazo mínimo de 6 meses para a realización do primeiro exercicio. Queremos que poñan tamén un prazo máximo, de xeito que dende a convocatoria ata a resolución do proceso non pasen máis de 12 meses.
Queremos a promoción interna separada do acceso libre, co 50% da oferta, tanto horizontal como vertical dende calquera escala, en todos os casos e con reciprocidade nas respectivas promocións que se convoquen, e que se reclasifiquen os postos cando sexa posible ou se artelle algún sistema que facilite manter a proximidade á localidade.

Promoción interna a C1-Administrativo

É o único que será concurso-oposición. Son 148 prazas, correspondentes ás ofertas de emprego dos anos 2024 e 2025. A CIG manifestou que hai outras 74 prazas da OEP do 2026, e solicitamos a súa inclusión. Restrinxen a participación a só C2-Auxiliar. A promoción interna non consume taxa de reposición: vai sendo hora de artellar un novo sistema de promoción interna, sen restricións de prazas. Descargar

Acceso libre e promoción interna a B-Escala de Axentes Técnicos en Xestión Ambiental

Son 65 prazas, das ofertas de emprego dos anos 2024 e 2025. Aínda que esta escala estea clasificada como grupo B, a realidade é que as persoas que superen o proceso serán nomeadas funcionarias de C1. E así seguimos dende fai moitos anos. Xa é hora de rematar con esta rebaixa que prevé a Lei do emprego público de Galiza.

Nas escalas de axentes ambientais e forestais non houbo un proceso específico de estabilización a pesar da alta interinidade: a Xunta excluíu estes procesos argumentando ou que era unha escala a extinguir (forestais), ou non recoñeceu como vacantes estruturais moitos postos que viñan sendo ocupados durante anos mediante comisións de servizo encadeadas. Así, no 2023 diciamos que non saíran as prazas en estabilización (0 en C2, e 1 en C1), cando había máis de 130 persoas interinas.

Demandamos que o proceso sexa convocado como concurso-oposición. A este respecto, a DXEP, na súa intervención, afirmou que reconsiderarían a forma da convocatoria (veremos).

En canto á promoción interna, permiten horizontal dende outros B (algo que é falto, pois non existe ninguén de grupo B na nosa Administración) e permiten C1 dende calquera escala. Reclamamos que permitan tamén dende C2-Forestais, pois en realidade estamos ante unha promoción a C1.

Para a proba física, non hai diferenza entre homes e mulleres, nin de peso, nin de tempos. Lembramos á DXEP que o Plan de igualdade da Xunta, establece expresamente a obriga de analizar con perspectiva de xénero as probas físicas e os baremos dos procesos selectivos, para detectar posibles impactos negativos e adoptar medidas correctoras.

Descargar

Acceso libre e promoción interna a C2-Auxiliar de Coidadores

Convocan 126 praza do 2025 e 2026. Para esta escala, si permiten a promoción interna horizontal e vertical dende calquera escala de C2 e Agrupación Profesional (AP). Descargar

Acceso libre e promoción interna a C2-Auxiliar de Cociña

50 prazas do 2025 e 2026. Engaden unha proba práctica de cociña, para a que as persoas candidatas teñen que levar as súas ferramentas, instrumentos de corte, uniforme, etc. Xa hai un suposto práctico tipo test, polo que a proba práctica en cociña pode ser excesiva. E no caso de que a manteñen, reclamamos que sexa a Administración quen facilite os instrumentos. Permiten horizontal e vertical dende calquera escala de C2 e AP. Descargar

Acceso libre e promoción interna persoal subalterno

Son 96 prazas das OEP de 2025 e 2026. Permiten promoción horizontal dende outras escalas de agrupación profesional. Vai ser do 25%. Queremos do 50%. Descargar

Acceso libre e promoción interna limpeza e cociña

Son 305 prazas da OEP 2024 e 2025. Pero hai 95 prazas do 2026 que reclamamos que engadan na convocatoria. Igual que en subalterno, permiten promoción interna horizontal dende outras escalas de agrupación profesional. Descargar

Rolda aberta de intervencións

Resolución de adxudicación de postos da elección convocada o 30/09/26: a DXEP afirma que a información de que está reservado o DOG para o 3 de novembro é un ruxe-ruxe. Afirma que están vendo a planificación da adxudicación, pero aínda non hai datas.

Promocións internas pendentes de resolución (convocatorias de 2024, de enxeñarías e consumo): xa teñen a relación de persoas que superan o proceso, pero están a revisar a cantas desas persoas lles corresponde escoller destino por non ter o actual posto aberto ao subgrupo ao que promocionaron. Afirma que son poucas persoas, e considera que cos postos de nivel base que teñen poderían dar destino. No caso das enxeñarías o concurso de traslados resolveuse fai un ano, e consideran que ao tratarse de promoción interna, postos base, e moi poucas persoas as que terían que escoller destino, si poderían dar destino agora sen agardar por un novo concurso. Están a traballar nos listados de postos e considera que nesta 2ª quincena de outubro poderían convocar a elección de destinos de enxeñarías e consumo.

Veterinaria (concurso e elección de destino): agás a convocatoria do 2024 (pendente de relación de persoas aprobadas), para os demais procesos poderían convocar destino e resolución do concurso de traslados na última semana de outubro ou primeira de novembro.

Detalles

Na xuntanza da Comisión de Persoal do 15 de outubro, a directora xeral volveu ás andadas de facer imposíbel calquera posibilidade de negociación efectiva, impedindo que haxa calquera avance nas condicións laborais do persoal da Administración xeral da Xunta e entes.

Xa se está a convertir en costume ter que dicirlle á diretora xeral de Emprego Público que coa CIG non conte para validar o seu proceder de enviar convocatorias sen documentación previa, con documentación incompleta ou con menos de 24 horas de antelación, que non permiten nin o seu estudo nin partillalos co persoal e recoller o seu parecer.

Pero a verdade é que non deixa de sorprendernos... 

 

Comisión de Persoal Empregado Público

A directora xeral de Emprego Público volveu pasar o rolete coa proposta mal chamada Estudo do anteproxecto da Lei de Orzamentos para o ano 2027 en materia de persoal. Dicimos «mal chamada» porque as organizacións sindicais non tivemos tempo para o seu estudo.

O único que obtivemos desta xuntanza foron uns datos facilitados polo diretor xeral de Orzamentos:

1. O capítulo de gastos de persoal incrementarase nun 8 % para o ano 2027
2. Se o goberno do Estado español o habilita, abonarán o 4,5 % + 0,5 % adicional ao mes seguinte de que se produza esta habilitación.
3. Establecen medidas orzamentarias sectoriais específicas:

  • Educación: crean 1000 prazas de docentes por mor da reducción da ratio de alumnado en secundaria
  • Sanidade: non precisan cando se incrementa o gasto nin en que
  • Outra parte para facer fronte a unha nova convocatoria da carreira extraordinaria en 2026
  • Cumprimento dos acordos do persoal do SPIF
  • Acordo de carreira do persoal de Xustiza (dotación para 2026 e 2027 para completar o 100 % do tramo)

 

Rolda aberta de intervencións

  • O representante da Consellaría de Educación confirma que segue vixente a data do 21 de outubro para unha primeira xuntanza coas organizacións sindicais para tratar un acordo para o persoal non docente da Consellaría de Educación.
  • A DXEP comentou que publicarán na segunda quincena de outubro a resolución de elección de destino definitivo do persoal  inspector de turismo.

Para a CIG estas leis son outra oportunidade perdida para recuperar dereitos e avanzar na mellora das condicións do persoal da Xunta de Galiza e, ademais, estaremos vixilantes para que as cuestións recollidas nestas leis se desenvolvan e implanten de xeito efectivo, sen discriminacións e cumprindo as resolucións xudicais.

Detalles

Dentro da campaña que se está a levar a cabo “Por un sistema público galego de servizos ás persoas”, pedimos xuntanza tanto coa Conselleira de Política social como co Conselleiro de Educación. Adxuntamos os escritos remitidos solicitando esas xuntanzas, para, se o consideras oportuno lles envíes un recordatorio de que estamos á espera dunha data.

ASUNTO: O que se considere oportuno
CORPO:
Ola,
Precisamos avanzar cara a un sistema público galego de servizos de atención ás persoas, que garanta unha atención digna, universal, próxima e de calidade.
A atención ás persoas é un dereito, non un negocio. Por iso, é fundamental fortalecer os servizos públicos, garantir os recursos necesarios e mellorar as condicións laborais das profesionais.
Desde esta campaña queremos sumar voces, crear conciencia e reclamar un compromiso firme das administracións para construír un modelo de atención centrado nas persoas, que poña no centro a dignidade, a autonomía, a igualdade e o benestar colectivo.

Consellaria Educación:
conselleiro.educacion.ciencia@xunta.gal, sxt.educacion.ciencia@xunta.gal, gabinete.educacion.ciencia@xunta.gal, dxcrrhh@edu.xunta.gal, prensa.educacion.ciencia@xunta.gal,

Consellaria Política Social:
conselleria.politicasocial@xunta.gal, sxt.politicasocial@xunta.gal, gabinete.politicasocial@xunta.gal, dxfamilia.politicasocial@xunta.gal, dxinclusion.politicasocial@xunta.gal, dxdiscapacidade.politicasocial@xunta.gal, dxmas.politicasocial@xunta.gal, prensa.politicasocial@xunta.gal

Detalles

A rolda aberta de intervencións da Mesa Xeral volveu evidenciar unha Administración instalada na demora e na falta de transparencia. A directora xeral de Emprego Público e Administración de Persoal (DXEP) confirma que haberá "repescas" en todos os procesos de estabilización e acceso libre, pero non pon datas; non responde ante o caos no Consorcio e alega descoñecer a información trasladada pola CIG sobre Gardacostas. Moitas promesas, ningún calendario e demasiadas cuestións sen resolver. A CIG esixe solucións concretas e responsabilidades.

Repescas en todos os procesos, pero sen datas

A DXEP confirmou que realizará listas complementarias (repescas) de todos os procesos, tanto de estabilización como de acceso libre (como son corpos xerais, infantil, tituladas/os superiores lingüistas e os demais procesos pendentes, incluídos auxiliar de bibliotecas C2, SPIF e persoal auxiliar coidador, así como os procesos de promoción interna e concursos que continúan sen resolver).

Porén, non concretou ningún prazo para a publicación das listas nin para rematar os procesos. A CIG esixe un calendario claro. A directora está a outras cousas.

Consorcio: centros paralizados e ningunha resposta

A incorporación da escala de facultativos deixou centros sen acceso aos sistemas informáticos, mesmo ás persoas responsables da dirección, impedindo a xestión ordinaria dos servizos. A isto súmanse os atrasos nas baixas na Seguridade Social do persoal que non estabilizou, que dificultan a súa reincorporación ás listas de chamamentos. Volven a repetir o caos das escalas infantís.

Preguntamos cando vai intervir a DXEP tal e como solicitamos por rexistro e a directora xeral non contestou.

Retirada de prazas: decisións que prexudican as persoas aspirantes

No medio do prazo de elección de destinos de C1-mantemento de servizos, retiráronse catro prazas. A DXEP indicou que non se terían en conta as solicitudes que as incluísen e xustificou parte das retiradas pola situación dos centros e a falta de funcións asignadas, sen aclarar completamente o sucedido. Así que cando se publique a adxudicación de destinos eses códigos desaparecerán.

A CIG reclama garantías para que as persoas aspirantes non resulten prexudicadas por cambios realizados co prazo de elección xa aberto.

Gardacostas: a DXEP descoñece a información trasladada pola CIG

Advertimos de que, segundo a información recibida, se poderían ofertar postos de xefatura de unidade operativa para elección de destino sen pasar previamente por concurso. Isto permitiría que persoas de novo ingreso optasen a postos aos que non tería acceso persoal con 30 anos de servizo.

A resposta da DXEP foi que descoñecía a información que lle estabamos trasladando, sen ofrecer aclaracións. Esiximos que se contraste esta situación e se garantan criterios transparentes na provisión dos postos.

Máis procesos pendentes, máis incerteza

A CIG reclamou avances na elección de destino das 18 escalas e do persoal PSX e xerocultor, nos procesos de promoción interna, nas escalas de informática e nos concursos pendentes.

A DXEP situou a elección de destino de PSX e xerocultor na segunda quincena de outubro, pero continúan sen concretarse numerosos prazos. Entre as cuestións pendentes están as notas do segundo exame do corpo de xestión A2, a apertura da fase de concurso do corpo auxiliar C2 e os actos de elección de destino das enxeñarías agronómica, industrial, de minas e de montes.

No proceso de persoal auxiliar coidador, convocado en xuño de 2025 pola OPE de 2024, seguen pendentes de resolución reclamacións ás cualificacións e actuacións necesarias para finalizar o procedemento.

A CIG insistiu tamén na necesidade de regular as comisións de servizo mediante un regulamento con criterios obxectivos e transparentes, ante a existencia de postos que non se ofertan nos actos de elección de destino e que posteriormente se adxudican sen criterios claros coñecidos polo persoal.

Formación 2027: sen negociación nin resposta

A DXEP continúa sen responder ao escrito presentado pola CIG o 1 de outubro, no que reclamamos a constitución dos órganos paritarios de formación, un calendario de negociación do Plan de formación de 2027 e información sobre os fondos destinados á formación desde 2016.

A formación do persoal debe negociarse colectivamente, con transparencia económica, participación sindical e criterios acordados, e non mediante decisións unilaterais da Administración.

A CIG esixe feitos, non promesas

A Administración non pode seguir acumulando procesos sen resolver, centros con problemas de funcionamento e demandas sindicais sen resposta.

Esiximos prazos, transparencia e negociación real. Confirmar que se farán as repescas sen dicir cando, ou alegar descoñecemento ante información relevante, non resolve os problemas do persoal.

A Xunta debe asumir as súas responsabilidades e dar solucións. O persoal merece respostas concretas, procesos que rematen e garantías de que os seus dereitos serán respectados.

Detalles

A documentación do anteproxecto da Lei de Medidas para 2027 chega o martes 13 ao mediodía, reunímonos o mércores 14 e o xoves 15 xa vai á Comisión de Persoal. A pesares de pedir adiamento por este motivo négase a mudar de data!

Que negociación é esta? Unha farsa! Sen tempo para estudar, consultar co persoal nin presentar alegacións. Convocan mesas para cubrir o expediente e facer que negocian.

Esta falta derespecto ás organizacións sindicais e ás traballadoras e traballadores é inadmisible.

Unha vez máis, desde a CIG non podemos solicitar outra cousa que a DIMISIÓN DA DIRECTORA XERAL DE EMPREGO PÚBLICO.

BASTA DE SIMULAR NEGOCIACIÓN!

 

Detalles

Neste boletín:

- E despois de todo isto? Que vai pasar cando rematen os concursos e tomas de posesión

- Medio Rural asina acordos aos cachos para o persoal do SPIF

- Concurso específico (a libre designación encuberta con estabilidade de 5 anos)

- Movementos tras o concurso ou destino definitivo

- Persoal non docente: chegou o momento de negociar

Descargar

Outras novas recentes

Luns, 19 Outubro 2026

Destinos e convocatoria oposicións (axen. ambientais, c2-cociña, coidador, subalterno, limpeza, e P.I. administrativo) (MSF 16/10/26)

Na Mesa Sectorial de Negociación do Persoal Funcionario (MSF), discutimos coa Dirección Xeral de Emprego Público e Administración de Persoal (DXEP), as bases das convocatorias de varios procesos selectivos. Na rolda aberta de intervencións, a DXEP deu información sobre a convocatoria de elección de postos de diversas escalas. Convocatoria de procesos selectivos Respecto das...
Martes, 20 Outubro 2026

Destinos limpeza, cociña, mantemento, RRNN, etc. (DOG 30/09/26), inspección consumo, inspección turismo, veterinarios/as-2024. Convocator...

Información da Mesa Sectorial de Negociación de Persoal Funcionario, do 20/10/26: Nomeamento das escalas convocadas a escoller destino no DOG 30/09/26 (limpeza, cociña, mantemento, RRNN, etc, que agrupou 18 convocatorias de procesos selectivos: afirma a DXEP que publicarán a resolución co nomeamento e destino adxudicado no DOG do 30/10/26. En canto á data de toma de...
Luns, 19 Outubro 2026

Convocatoria promoción interna A2-Inspección de consumo (para MSF 20/10/26)

A Dirección Xeral de Emprego Público e Administración de Persoal convoca Mesa Sectorial de Negociación de Persoal Funcionario para o martes 20 de outubro, para discutir a convocatoria da promoción interna á escala de inspección de consumo, subgrupo A2. Descargar. Outra vez nos envían a documentación sen tempo abondo para a súa difusión e preparación, sen unha negociación...