Novas por contido

Detalles

No DOG do 30/10/2026 publican:

- RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de condución, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro) e do 5 de xullo de 2023 (Diario Oficial de Galiza número 129, do 7 de xullo).

- RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de mantemento de servizos, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro) e do 16 de novembro de 2023 (Diario Oficial de Galiza número 221, do 21 de novembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de análises de laboratorio, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro) e do 16 de novembro de 2023 (Diario Oficial de Galiza número 221, do 21 de novembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de cociña, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro) e do 24 de xuño de 2025 (Diario Oficial de Galiza número 123, do 30 de xuño).

- RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de recursos naturais e forestais, especialidade de guía intérprete de patrimonio natural, as persoas aspirantes que superaron o proceso selectivo convocado pola Resolución do 22 de decembro de 2022 (Diario Oficial de Galiza número 244, do 26 de decembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de recursos naturais e forestais, especialidade de patrón de embarcación, as persoas aspirantes que superaron o proceso selectivo convocado pola Resolución do 22 de decembro de 2022 (Diario Oficial de Galiza número 244, do 26 de decembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de recursos naturais e forestais, especialidade de mecánico naval, as persoas aspirantes que superaron o proceso selectivo convocado pola Resolución do 22 de decembro de 2022 (Diario Oficial de Galiza número 244, do 26 de decembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de recursos naturais e forestais, especialidade de capataz, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro) e do 16 de novembro de 2023 (Diario Oficial de Galiza número 221, do 21 de novembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de recursos naturais e forestais, especialidade de mariñeiro vixilante, as persoas aspirantes que superaron o proceso selectivo convocado pola Resolución do 22 de decembro de 2022 (Diario Oficial de Galiza número 244, do 26 de decembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de recursos naturais e forestais, especialidade de oficial, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro) e do 16 de novembro de 2023 (Diario Oficial de Galiza número 221, do 21 de novembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de condución, as persoas aspirantes que superaron o proceso selectivo convocado pola Resolución do 22 de decembro de 2022 (Diario Oficial de Galiza número 244, do 26 de decembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de laboratorio, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro) e pola Resolución do 22 de xaneiro de 2024 (Diario Oficial de Galiza número 20, do 29 de xaneiro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de mantemento de servizos, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro).

- RESOLUCIÓN do 23 de outubro de 2026 pola que se nomean persoal funcionario de carreira no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de cociña, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galicia número 244, do 26 de decembro, e Diario Oficial de Galiza número 245, do 27 de decembro) e pola Resolución do 24 de xuño de 2025 (Diario Oficial de Galiza número 123, do 30 de xuño).

- RESOLUCIÓN do 23 de outubro de 2026 pola que se nomean persoal funcionario de carreira no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala de gardas de recursos naturais, as persoas aspirantes que superaron o proceso selectivo convocado pola Resolución do 22 de decembro de 2022 (Diario Oficial de Galiza número 244, do 26 de decembro).

- RESOLUCIÓN do 23 de outubro de 2026 pola que se nomean persoal funcionario de carreira na agrupación profesional, escala de persoal de limpeza e recursos naturais e forestais, especialidade de limpeza e cociña, as persoas aspirantes que superaron algún dos procesos selectivos convocados pola Resolución do 12 de maio de 2021 (Diario Oficial de Galiza número 94, do 21 de maio), do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro), do 6 de novembro de 2023 (Diario Oficial de Galiza número 216, do 14 de novembro) e do 16 de novembro de 2023 (Diario Oficial de Galiza número 221, do 21 de novembro).

- RESOLUCIÓN do 23 de outubro de 2026 pola que se nomean persoal funcionario de carreira na agrupación profesional, escala de persoal de limpeza e recursos naturais e forestais, especialidade de recursos naturais e forestais, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro) e do 16 de novembro de 2023 (Diario Oficial de Galiza número 221, do 21 de novembro).

- RESOLUCIÓN do 23 de outubro de 2026 pola que se nomean persoal funcionario de carreira na agrupación profesional, subgrupo AP, escala de persoal de mantemento de servizos, as persoas aspirantes que superaron algún dos procesos selectivos convocados polas resolucións do 22 de decembro de 2022 (Diario Oficial de Galiza número 244, do 26 de decembro, e Diario Oficial de Galiza número 245, do 27 de decembro).

O prazo posesorio para o persoal aspirante que superou algún dos procesos a que se refiren estas resolucións será de quince días naturais a partir do 19 de novembro de 2026, de acordo coa Resolución do 6 de xullo de 2026 (DOG núm. 128, do 10 de xullo) pola que se declara a urxencia e se reducen os prazos nos procesos selectivos convocados pola Consellaría de Facenda e Administración Pública en que a súa elección de destino se convoque ou resolva en período estival (meses de xullo, agosto e setembro).

O cesamento deberá efectuarse o día 18 de novembro de 2026.

Detalles

No DOG do 30/10/2026 publican:

- RESOLUCIÓN do 23 de outubro de 2026 pola que se convoca o proceso selectivo mediante o sistema de concurso-oposición para o ingreso, pola quenda de acceso libre e promoción interna, no corpo de técnicos de carácter facultativo de Administración especial da Administración xeral da Comunidade Autónoma de Galiza, grupo B, escala de axentes técnicos en xestión ambiental.

- RESOLUCIÓN do 23 de outubro de 2026 pola que se convoca o proceso selectivo para o ingreso, pola quenda de promoción interna, no corpo administrativo da Administración xeral da Comunidade Autónoma Galiza, subgrupo C1.

- RESOLUCIÓN do 23 de outubro de 2026 pola que se convoca o proceso selectivo mediante o sistema de oposición para o ingreso, pola quenda de acceso libre e promoción interna, no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de cociña.

- RESOLUCIÓN do 23 de outubro de 2026 pola que se convoca o proceso selectivo mediante o sistema de oposición para o ingreso, pola quenda de acceso libre e promoción interna, no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de coidadores.

- RESOLUCIÓN do 23 de outubro de 2026 pola que se convoca o proceso selectivo mediante o sistema de oposición para o ingreso, pola quenda de acceso libre e promoción interna, na agrupación profesional de persoal funcionario da Administración xeral da Comunidade Autónoma de Galicia, escala de persoal subalterno.

- RESOLUCIÓN do 23 de outubro de 2026 pola que se convoca o proceso selectivo, mediante o sistema de oposición para o ingreso, pola quenda de acceso libre e promoción interna, na agrupación profesional de persoal funcionario da Administración xeral da Comunidade Autónoma de Galiza, escala de persoal de limpeza e recursos naturais e forestais, especialidade de persoal de limpeza e cociña.

O prazo para presentar as solicitudes será de vinte (20) días hábiles, que se contarán a partir do día seguinte ao das publicacións destas convocatorias no Diario Oficial de Galiza (DOG).

Detalles

A CIG denuncia a falta de compromiso e de vontade negociadora da Consellaría e advirte de que non vai permitir que se siga adiando unha reivindicación histórica do persoal non docente.

As expectativas xeradas pola apertura dunha vía de negociación coa Consellaría de Educación para acadar un acordo que dea resposta ás demandas do persoal non docente quedaron frustradas na primeira xuntanza. A ausencia por enfermidade do director xeral e a incapacidade do subdirector para concretar un calendario, fixar uns prazos e presentar un plan de traballo deixaron en evidencia a falta de preparación e de compromiso da Xunta cun proceso que debería ser prioritario.

Este mércores 28 de outubro tiña que ser o día. O día agardado despois de moitos anos de loita, reivindicacións e mobilizacións do persoal non docente. Porén, a Consellaría volveu demostrar que non está á altura das necesidades nin das expectativas das traballadoras e dos traballadores que sosteñen cada día o funcionamento dos centros educativos públicos.

Unha reivindicación histórica, unha loita que vén de lonxe

Cómpre lembrar que a loita pola mellora nas condicións de traballo de centros de ensino ven de lonxe. Nos anos 2007 e 2008 conseguimos negociar melloras para o persoal laboral de centros de ensino que tamén callaron e se recolleron no Convenio Colectivo, e melloras para o persoal funcionario (daquelas só o eran o persoal auxiliar e o persoal subalterno).

Máis recentemente, nestes últimos 3 anos, intentamos poñer no foco a necesidade de novos acordos (con máis forza dende que o anterior director xeral de Emprego Público declarara que despois dos acordos acadados con Política Social e SPIF tocaba o de persoal non deocente).

E así:

- Setembro de 2024. A CIG-Autonómica reitera á Consellaría de Educación a necesidade de abrir as negociacións e remite unha táboa reivindicativa coas demandas do persoal. 

- Outono de 2025. Tras unha concentración diante da Consellaría, a CIG entrega máis de 1.000 sinaturas de traballadoras e traballadores que reclaman avances e respostas ás súas reivindicacións.

- Xullo de 2026. A CIG, xunto co resto das organizacións sindicais, planta a Dirección Xeral de Emprego Público e Administración de Persoal na negociación da RPT para esixir unha data para abordar o acordo. Daquela presión sae a data inicial do 21 de outubro.

- Setembro de 2026. A CIG solicita á Consellaría que se adiante a xuntanza e presenta un documento no que recolle os piares básicos que, ao seu xuízo, debe contemplar o futuro acordo.

-20 de outubro de 2026. A Consellaría comunica o adiamento da xuntanza por mor da enfermidade do director xeral, trasladándoa ao 28 de outubro.

Escusas de mal pagador

E chegou o día. Mais, en lugar de atopar unha Consellería preparada para negociar, a xuntanza converteuse nunha sucesión de desculpas: que as propostas sindicais eran demasiado xerais, que determinadas demandas —como as relativas ás ratios— non eran competencia exclusiva da Consellaría e, finalmente, que non se podía avanzar sen a presenza do director xeral e sen consultar previamente ás delegacións provinciais.

A enfermidade dunha persoa non pode converterse nun pretexto para paralizar unha negociación nin para deixar o persoal non docente sen respostas. Se a Consellaría tiña dúbidas sobre as propostas presentadas, o que correspondía era concretalas, achegar documentación, aclarar as competencias e fixar un calendario de traballo. Iso é negociar. O que non é aceptable é convocar as organizacións sindicais sen ter preparado un plan de traballo nin unha proposta para avanzar.

Despois de expresar o noso malestar pola falta de respecto ás organizacións sindicais e ao persoal ao que representamos, o único compromiso que conseguimos arrincar do subdirector foi a promesa de propoñer, nun prazo de dúas ou tres semanas, unha nova data, acompañada dunha orde do día e da documentación correspondente.

Un compromiso vago e insuficiente que, lonxe de ofrecer garantías, prolonga a incerteza e evidencia a ausencia dunha vontade real de avanzar con decisión.

O persoal non docente merece respecto e solucións

O acontecido confirma que a Consellaría de Educación non está á altura do persoal que traballa nos centros educativos públicos. Falamos de traballadoras e traballadores imprescindibles para o funcionamento do ensino público, que levan anos reclamando melloras e un recoñecemento efectivo do seu traballo e das súas condicións laborais.

Desde a CIG acudimos á negociación cunha actitude construtiva, con propostas concretas e coa vontade de avanzar cara a un acordo que dea resposta ás demandas do colectivo. Pero a boa fe negocial non pode confundirse con paciencia ilimitada, nin a disposición ao diálogo pode servir para xustificar novos atrasos.

O acontecido nesta primeira xuntanza foi un auténtico xerro de auga fría sobre un colectivo canso de agardar e dun inmobilismo que se prolonga desde hai anos.

A Consellaría debe ter claro que as reivindicacións do persoal non docente son xustas e que non imos renunciar a elas. Non aceptaremos que esta negociación se converta nunha nova promesa baleira nin que o acordo quede atrapado nunha sucesión interminable de adiamentos.

A CIG seguirá defendendo os dereitos e as condicións laborais do persoal non docente, impulsando as iniciativas e mobilizacións que sexan necesarias.

Non imos parar ata acadar un acordo para o persoal non docente!

Detalles

Hai despedidas tristes. Cando unha compañeira ou compañeiro de traballo abandona porque non pode manter á súa familia co salario que cobra, ou remata farta e con medo ás agresión que todas e todos sufrimos.

Nestes últimos tempos, marcados polos conflitos en ensino infantil 0-3, en menores, na discapacidade, en dependencia, en residencias, nos SAF, servizos esenciais para a cidadanía e que na súa meirande parte están en mans de empresas privadas pero pagados con fondos públicos, vemos como son as persoas traballadoras as que sosteñen estes servizos públicos co seu traballo diario e que, demasiadas veces, reciben como recompensa a incerteza, a falta de recoñecemento e decisións tomadas de costas a elas.

Tamén acontecen despedidas que se viven con alivio. Especialmente cando marcha quen, desde a súa responsabilidade política, contribuíu a empeorar as condicións de traballo, a deteriorar os servizos públicos e a ignorar sistematicamente as demandas do persoal traballador. Ou cando unha conselleira é reclamada polos dirixentes do PP de Madrid para capitanear novos barcos nas augas mesetarias. Un ascenso, din algúns; unha recompensa polos servizos prestados, poderiamos dicir nós, con toda a retranca do mundo. Porque, á vista da situación na que deixa a Consellaría, o difícil non é mellorar a súa xestión: o difícil sería empeorala aínda máis.

Esta é a herdanza que deixa Fabiola García:

Máis agresións ao persoal traballador, nun contexto no que faltan medios, protección e respostas efectivas para garantir a seguridade de quen atende a persoas en situacións de especial vulnerabilidade.

Un persoal técnico desbordado, cunha carga de traballo incompatible cunha atención individualizada e de calidade. Cunhas ratios esaxeradas e inasumibles.

Un sistema de protección ao bordo do colapso, incapaz de dar resposta adecuada ás necesidades existentes e cada vez máis dependente das prazas concertadas con entidades do terceiro sector.

Máis desprofesionalización e menos especialización, debilitando os equipos e comprometendo a calidade da atención.

Un avance continuado da privatización do sistema de protección ás persoas en situación de vulnerabilidade, abrindo cada vez máis espazo á xestión externa en detrimento do reforzo dos servizos públicos.

Un acceso colapsado aos recursos de dependencia e discapacidade, con persoas e familias condenadas a agardar por unha atención que precisan aquí e agora.

Unhas condicións laborais con xornadas abusivas, falta de medidas de conciliación e cunhas táboas salariais que non dan para a carestía de vida, a maioría está no SMI ou mesmo por debaixo.

E esta é só unha parte da factura da súa xestión. Detrás de cada dato hai profesionais precarizados, desbordados, equipos insuficientes, persoas desatendidas e familias obrigadas a soportar as consecuencias dunha política que non estivo á altura das necesidades sociais.

Pero hai algo que define aínda mellor estes anos de xestión: o desprezo polo persoal traballador

Ás carencias materiais, á sobrecarga de traballo e ao deterioro dos servizos públicos sumouse a falta de vontade política para escoitar e negociar con quen coñece de primeira man os problemas. Centos de demandas, conflitos e dificultades quedaron sen resposta. As canles de negociación permaneceron pechadas mentres o persoal seguía facendo fronte, día tras día, a unha situación cada vez máis difícil.

Porque gobernar non consiste en ocupar un despacho, facerse fotografías e anunciar compromisos que logo non se cumpren: pura propaganda. Gobernar implica asumir responsabilidades, poñer medios, escoitar as persoas traballadoras e negociar solucións. E nisto, Fabiola García deixa moito que explicar e demasiado por reparar.

Por iso, desde a CIG, a CUT e o SNEP, este bye, bye Fabiola non é unha despedida triste. É unha despedida cargada de alivio e tamén de esperanza. A esperanza de que a súa marcha poña fin a unha etapa marcada pola falta de diálogo, polo abandono do persoal e polo deterioro dun sistema público esencial para garantir dereitos. É un obxectivo acadado cando xa viñamos, mobilización tras mobilización, pedindo a súa dimisión.

E desexámosche, Fabiola, que «tanta paz leves como desfeita e desleixo para o persoal deixas».

Mais non confundamos o alivio pola marcha dunha conselleira coa solución dos problemas que deixa atrás. Cambiar a persoa que ocupa o cargo non abonda se non cambia a política que conduciu a esta situación. Os problemas seguen aí, o persoal segue soportando as súas consecuencias e as persoas usuarias seguen precisando respostas urxentes.

Por iso, tamén lle damos a benvida á nova conselleira, Ángeles Vázquez, á que lle desexamos acerto no desempeño das súas novas responsabilidades e, sobre todo, a vontade política que faltou ata agora. Recibe unha Consellaría con moito traballo pendente, conflitos sen resolver e servizos públicos que precisan medidas urxentes. Agardamos que veña cun talante diferente, con disposición real ao diálogo e coa vontade de construír, xunto coa representación social, solucións que permitan recuperar e reforzar uns servizos públicos de calidade.

Pero que ninguén se equivoque: a paciencia do persoal non é infinita, e a disposición ao diálogo non significa renunciar á reivindicación nin á mobilización. A negociación non pode ser unha operación de imaxe nin unha sucesión de reunións sen resultados. Ten que servir para resolver problemas, mellorar as condicións de traballo, reforzar os cadros de persoal e garantir unha atención digna e de calidade.

Desde a CIG, a CUT e o SNEP seguiremos defendendo os dereitos do persoal e denunciando todas as decisións que debiliten os servizos públicos. Non imos normalizar a sobrecarga de traballo, a falta de medios, a privatización nin o desprezo cara a quen sostén estes servizos co seu esforzo diario.

Nos vindeiros días volveremos remitir a petición de apertura das mesas de negociación. Esiximos que se convoquen, que se aborden os problemas reais e que se poña enriba da mesa un compromiso efectivo coa construción dun Sistema Público Galego de Servizos de Atención ás Persoas, con persoal suficiente, condicións laborais dignas, atención profesionalizada e garantías públicas de calidade.

Porque os servizos sociais non poden seguir funcionando a costa do sacrificio das persoas traballadoras. Porque a atención ás persoas non pode quedar subordinada á improvisación nin aos intereses privatizadores. E porque Galiza precisa uns servizos públicos fortes, públicos de verdade, planificados desde o país e ao servizo das necesidades da súa xente.

Fabiola marcha. Os problemas quedan. E a loita por uns servizos públicos galegos, dignos e de calidade continúa.

Nin un paso atrás na defensa dos dereitos do persoal e dos servizos públicos!

Detalles

Despois da reunión de mesa sectorial de hai un mes onde se abordou a modificación da Orde do 2 de maio de 2006 pola que se establece o réxime de prestación de servizos, horarios, vacacións, licenzas e permisos e compensacións económicas para percibir polo persoal do Servizo de Gardacostas de Galiza, é previo á levar o texto á Comisión de Persoal onde se aprobaría, a consellería convocounos a unha xuntanza para tratar de ultimar os cambios.

Despois de que a consellería explique as últimas modificacións, dende a CIG valoramos que hai avances aínda que tamén certas demandas non foron atendidas.

  • Atenden a nosa alegación de non modificar e volver á redacción orixinal do artigo 1 para non excluír ao persoal que pase a segunda actividade.
  • Aceptaron a alegación referida ao descanso semanal mínimo de 60 horas e á determinar que a quenda semanal se entende como a comezada ás 00:00 horas do día no que se inicie o primeiro servizo da quenda.
  • Matizan o novo artigo 2.bis introducindo unha prelación, pero non excluíndo como antes, para prestar servizos en embarcacións tripuladas por persoal de empresas privadas, dando preferencia a quen non ocupe praza de patrón ou mecánico.
  • En relación ao número máximo de horas que non se poden exceder nas prolongacións de xornada pasan de 12 a 10 (nós pedíamos 8).
  • No caso do número máximo de quendas nocturnas aceptan que se fixe que non se poden realizar máis de 3 consecutivas pero non reducen o número a 6 como propón a CIG e manteñen as 8 mensuais.
  • Aceptan a suba da compensación do 24, 25, 31 de decembro e 1, 5 e 6 de xaneiro a 120 euros fronte aos 90 actuais.
  • Actualizan a contía suplementaria do complemento específico recollida na orde polo importe actual de 746,40 euros.
  • Aceptaron en case a súa totalidade a alegación da CIG referida á formación.
  • Tamén aceptan que a comisión se reúna ordinariamente 2 veces ao ano e que poida facelo de xeito extraordinario a petición dunha das partes.

Hai que dicir tamén que outras alegacións non foron aceptadas.

  • Non aceptan que o descanso adicional de 10 días por ano traballado pase de computarse en días naturais a hábiles, aínda que si aceptan, que no caso de postos con adaptación ou redución de xornada por conciliación, baixas, embarazo, maternidade e lactación ou permisos legais retribuídos, non se aplique a proporcionalidade e se desfruten na súa totalidade. E aceptan que se poidan desfrutar, a petición do interesado, de forma continuada, aínda que suxeita ás necesidades do servizo.
  • Aínda que, como dixemos antes, reducen o número máximo de horas que non se pode exceder nas prolongacións de xornada a 10 horas mensuais, non recollen a nosa demanda de topar o semestre en 16, nin de reducir a 3 horas prolongación por quenda.
  • Tamén queda sen resposta a redución proposta de 10 quendas de fins de semanas e festivos e de quendas nocturnas como máximo en cada período de 6 meses, mantendo as 16 de fin de semana e 18 nocturnas de fin de semana actuais.
  • Tampouco aceptan considerar como xornadas especiais de traballo os festivos de carácter estatal e autonómico.

 

Gardacostas como servizo público esencial

Unha das demandas fundamentais e que non foi atendida, se ben é certo que tería que ir fóra desta orde de horarios, recollerse nunha lei e que necesita o visto e prace de Orzamentos, sería a da consideración deste Servizo como servizo público esencial a efectos de cubrir as baixas e poder facer chamamentos de persoal.

Isto solucionaría moitos dos problemas, e repercutiría na calidade do servizo que se presta, na minoración da carga de traballo, na creación de emprego e movemento das listas, na racionalización dos cuadrantes, na seguridade e saúde no traballo, etc,

Dende a CIG levamos anos insistindo que se acepte que moitas das funcións centrais deste servizo que están ligadas ao salvamento marítimo, loita contra a contaminación, etc. son en esencia propias dun servizo de emerxencia.

A consellería di que a Dirección Xeral de Orzamentos non atende esta demanda e nós pola nosa banda, solicitamos a través dunha proposta de emenda que enviamos aos grupos parlamentares, que se inclúa aos efectos antes mencionados o Servizo de Gardacostas como prioritario e servizo esencial.

Porque as consecuencias prácticas de non facelo é que Orzamentos non permite cubrir case a metade das necesidades de interinidades e substitucións cada vez que se solicitan.

ÚLTIMA MODIFICACIÓN: hoxe, día 27, a consellería envíanos un correo dicindo que aceptan a redución de 8 a 6 quendas nocturnas mensuais.

Detalles

A CIG denuncia que a Consellaría de Cultura convoca a terceira mesa de negociación sen achegar a información sobre cargas de traballo, necesidades de persoal e externalizacións, nin ofrecer garantías contra a precariedade, a desregulación e as desigualdades salariais. 

O 20 de outubro, Casares, deputado do PP, anunciaba no Pleno do Parlamento un principio de acordo, acadado fóra da mesa de negociación. Na CIG consideramos que este anuncio non pode substituír o diálogo nin pechar un proceso con cuestións fundamentais pendentes.

Na segunda xuntanza da negociación das condicións laborais do persoal do grupo I-40, celebrada o 5 de outubro, a Administración comprometeuse a achegar os convenios solicitados pola CIG, así como tamén a análise das cargas de traballo que indicaron que tiñan feita. Porén, a nova convocatoria de xuntanza chegou sen eles, e a poucas horas da reunión o compromiso segue incumprido.

Dende a CIG denunciamos que a nova proposta de acordo segue sen concretar os horarios, as quendas nin a distribución das tarefas. Baixo a escusa dunha «actividade singular», sen explicar que a distingue da do resto do persoal da Xunta, a Administración saca da manga o que denomina «traballo en liña», á marxe das modalidades reguladas existentes na Xunta. 

Esta fórmula non fai senón perpetuar a desregulación e a precariedade e permite manter na sombra a quen se lle está a asignar a dedo, como unha segunda actividade, parte da carga de traballo que lle corresponde ao persoal laboral lingüista, os horarios nos que se lle asigna e as compensacións que se lles pagan.

 

Información demandada pola CIG

A CIG presentou distintos escritos ante os órganos competentes para reclamar información e solucións á precariedade do persoal laboral lingüista, que despois de dous meses de negociacións seguimos sen ter. As nosas demandas abrangueron os seguintes aspectos:

 

  • Esclarecer quen imparte os cursos e leva a cabo todas as tarefas e en que condicións e con que compatibilidades, incluídas as privatizacións: solicitamos á Consellaría, á Secretaría Xeral da Lingua (SXL), á EGAP e a Emprego Público (DXEP), segundo as súas competencias, a relación da actividade, persoal, procedencia, horarios, retribucións, convenios e compatibilidades, incluída a cobertura de vacantes e períodos de inactividade. A EGAP, fiel á súa opacidade, xa botou balóns fóra, cando na propia mesa de negociación a Secretaría nos indicou que é a EGAP a que ten contratada unha empresa ou persoa non empregada pública para asumir tarefas dos cursos de formación en lingua galega, como son todas as relacionadas coa coordinación... 

 

  • Avaliar todas as cargas de traballo: pedimos a Simplificación Administrativa (DXSA) un estudo técnico que compute toda a actividade formativa impartida pola SXL, todas as tarefas e o contraste do tempo necesario co contratado. Preparar, titorizar, corrixir, coordinar, elaborar contidos, actualizalos, deseñar exames e avaliar tamén é traballar: contar cursos non abonda. Ao tratarse dun persoal fortemente feminizado, a CIG exixe, tamén, que as cargas de traballo se analicen con perspectiva de xénero e se efectúe a valoración de postos de traballo (VPT), indispensábel para a descrición das funcións e tarefas e para garantir a igualdade  retributiva. A día de hoxe, e grazas a CCOO, UGT e CSIF, asinantes do I Plan de «DesIgualdade», todo o persoal da Xunta carecemos deste instrumento esencial.

 

  • Continuar a estabilización e abrir as listas de contratación: reclamamos á DXEP a cobertura das prazas vacantes tras as renuncias, conforme as bases do concurso-oposición e do concurso da Lei 20/2021, e a apertura urxente da lista regulamentaria de contratación temporal para atender substitucións e necesidades de persoal. Por certo, é totalmente inaceptábel que a propia Consellaría declare que estivo a empregar unha lista non regulamentaria para os chamamentos! 

 

Na CIG mantemos as nosas reivindicacións laborais 

Reclamámoslle expresamente por escrito tanto á Secretaría Xeral Técnica (SXT) como tamén á DXEP:

  • Modificar a RPT do persoal titulado superior lingüista para garantir a xornada completa durante todo o ano;
  • Unha dotación equilibrada para cada provincia (postos de nova creación);
  • A funcionarización sen máis demoras;
  • O recoñecemento profesional e retributivo;
  • E a a equiparación ao nivel 25 do persoal funcionario de perfil lingüístico.

De paso, tamén lle esiximos á DXEP revisar a RPT do persoal funcionario lingüista e equiparar ao nivel 25 os postos dos niveis 20 e 21. Xunto coa DXSA, a DXEP é responsábel, segundo o I Plan de «DesIgualdade», do incumprimento dos prazos marcados nel para a elaboración da VPT e da auditoría retributiva (medidas 5.1 e 5.2); unha VPT que, non obstante, debería ter solucionado esta discriminación salarial hai xa anos e, cando menos, no momento da aprobación do plan en 2023.

Non aceptaremos unha negociación opaca nin un acordo imposto que consolide a precariedade, a desregulación e as desigualdades salariais. 

Na CIG non podemos dar por negociado o que se mantén ás agachadas nin facer que o persoal pague as consecuencias da falta de medios, planificación e transparencia!

Detalles

Un grupo nutrido grupo de lingüistas e unha representación da CIG acudimos ao Pleno do Parlamento o 20 de outubro, onde se debateu sobre a situación límite que está a soportar este persoal e a altísima demanda de formación en galego desatendida ano tras ano pola Escola Galega de Administración Pública (EGAP). O BNG presentou unha iniciativa para ampliar a dotación de cursos de galego impartidos pola EGAP e converter a media xornada e os 7 meses de traballo do persoal lingüista en xornada completa e nunha prestación de servizos de 12 meses, de xeito que as persoas empregadas públicas poidan vivir do seu traballo. A iniciativa contou cos votos favorábeis de PSOE e BNG e o voto en contra do PP. 

Para a CIG, o Goberno galego vén de revelar cal é o seu posicionamento no Pleno do Parlamento de Galiza do día 20 de outubro: deixar sen formación en lingua galega á maioría do persoal empregado público da Administración xeral da Xunta e entes, e persistir no maltrato laboral ao persoal lingüista e na infradotación de medios humanos encargados de impartir os cursos.

Mentres o pacto PP-PSOE pola suposta «actualización do Plan Xeral de Normalización da Lingua Galega (PXNLG)»  acaba de ser aprobado no Parlamento a primeiros de outubro sen consenso, por supoñer un empeoramento das condicións da nosa lingua, e por ignorar o Protocolo Lingua Vital, a demanda non atendida da EGAP segue a medrar ano tras ano e o persoal encargado da formación ve reducida a súa xornada á metade co dobre de carga de traballo. 

 

1200 prazas de LAG/LXG fronte a 5650 solicitantes na EGAP en 2026

Na Escola segue a manterse unha única convocatoria ao ano de formación, por exemplo, en linguaxe administrativa galega e linguaxe xurídica galega (LAG/LXG). Nela cada aspirante a  obter o diploma de nivel medio ou superior só pode optar a solicitar unha única edición (25 prazas) no canto de participar na selección de persoas adxudicatarias para o total de prazas.

Isto fai que a demanda desatendida pola EGAP ano tras ano, sen que se lle aplique nin a máis mínima solución, se acumule e medre até límites insospeitados como os actuais, mentres o persoal ve imposíbel, durante moitos anos consecutivos, obter unha oportunidade para avanzar na súa carreira profesional e participar en igualdade de condicións con outras persoas nos procesos competitivos. 

Chega con dicir que no ano 2026 a oferta da EGAP para LAG/(LXG foi de 1200 prazas, mentres as persoas solicitantes sumaron un total de 5650. Porén, en vez de buscar solucións, a EGAP bota a pelota da responsabilidade no tellado da Secretaría Xeral da Lingua, obviando a parte que lle corresponde de traballo, e a Secretaría só dá escusas de que carece de fondos para cumprir cos seus cometidos, cando nestes momentos ten executados tan só o 35% dos seus orzamentos.

 

Precariedade extrema do persoal lingüista e infradotación do servizo de formación

A outra cara da moeda é o persoal lingüista da Secretaría Xeral da Lingua, sometido a abusos laborais dende o primeiro segundo do inicio das súas contratacións.

O empeoramento das súas condicións é inadmísíbel. O colectivo viña desempeñando unha xornada completa, até que despois da estabilización a súa xornada se reducise á metade. O comezo da súa prestación de servizos o pasado 1 de setembro foi a media xornada, e a Administración encargoulle o dobre de traballo, ocasionando a imposibilidade de cumprir os prazos de atención ao alumnado e provocando unha sobrecarga de traballo inasumíbel. Trátase dun servizo infradotado de persoal e as poucas traballadoras e traballadores cos que conta seguen, día tras día, soportando o maltrato institucional sen que a Xunta se apresure a solucionar este conflito.

Toda esta situación demostra que a denominada «actualización do PXNLG» do PP non é máis que unha pantalla para tapar a verdadeira aposta do Goberno galego por desprotexer o galego, impedir a capacitación lingüística do persoal da Administración e reducir á mínima expresión o dereito da cidadanía a ser atendida na súa lingüa.

Detalles

Logo de anos de loita semella que comeza a verse algo de luz ao final do túnel, estamos expectantes ante a reunión que nos agarda. Creemos que é fundamental unha regularización e actualización das funcións así como dotar dunha estrutura organizativa departamental encamiñada á profesionalización, acorde coas novas realidades técnicas  e  que dea resposta ás necesidades específicas de cada centro. 

A CIG leva as tarefas feitas, e  xa enviamos, o que pode ser a  base, para comezar a traballar o futuro acordo. 

Principios xerais colectivos:

  1. Axilidade nas coberturas: cobertura inmediata de toda baixa e permiso. Durante o proceso para a cobertura (2 días máximo) adaptaranse as funcións ordinarias ás circunstancias extraordinarias provocadas pola falta de persoal. Pasados os dous días acordados sin cobertura, a partir do 3º día establecerase un método de compensación, por esta carga de traballo engadida.

  2. Cobertura das prazas estruturais: creación de prazas por sobrepasar rateos fixados neste acordo ou polas limitacións que por esixencias de Saúde Laboral se teñan que adaptar postos do persoal que ocupa esa praza. Garantirase a creación das prazas para o inicio do seguinte ano académico. En tanto non se produce a creación e modificación da RPT, cubriranse mediante cúmulos de tarefas para evitar a sobrecarga do persoal.

  3. Todas as modificacións que impliquen un cambio organizativo, precisarán consenso co departamento afectado, e de ser o caso, si a modificación e substancial, negociación coa representación dos/as traballadores.

  4. Uniformidade: Se lle proporcionará  a todo o persoal que presta servizos na Consellería de Educación os uniformes que se precisen acordes á categoría profesional e á área onde desenvolven os seus servizos. Comprenderán por ano académico: 2 prendas de indumentaria laboral e 1 de calzado de traballo ou calzado de seguridade si o servizo que presta así o require. Serán proporcionados todos os EPIs que en materia de PRL sexan necesarios.

  5. Encadre das categorías dacordo a LEPG: As diferentes categorías profesionais que conforman o colectivo Persaol Non Docente (PND), serán encadradas no grupo ou subgrupo que lle corresponda dacordo coa titulación académica requirida para o acceso. Abrindo o grupo B para Técnicos Superiores e eliminando a Agrupación Profesional. Darase un encadre real das funcións desempeñadas. Así mesmo promocionaranse as escalas que a día de hoxe non se lle pide titulación específica para o desempeño pero existe esa oferta formativa dentro do catálogo académico da Consellería de Educación.
    - Contabilizar cursos doutras consellerías ou actividades formativas non curriculares aínda que sexan en horario habitual centro.
    - Negociar e aprobar as rateos específicas de centros e as RPTs antes do 15 de setembro de cada curso escolar, con negociación previa nas Xuntas de Persoal e entrega de datos dos centros e persoal á representación do persoal coa antelación necesaria para que sexan avaliados.
    - As equipas técnicas deberán ter actualizadas as medicións dos espazos especialmente cando estes espazos sexan ampliados ou modificados. Así mesmo as modificacións dos espazos deberán ter a correspondente avaliación de riscos realizada antes da incorporación do persoal ó traballo neses espazos.
    - Modificación da normativa relativa aos rateos dos comedores , persoal coidador, persoal administrativo e subalterno.

  6. Rateos: negociación de rateos por categorías en función de actividades formativas, ampliación dos centros, medicións reais (as actuais están obsoletas), estructura do edificio. En concreto no que atinxe a:

    • Contabilizar cursos doutras consellerías ou actividades formativas non curriculares aínda que sexan en horario habitual centro.

    • Negociar e aprobar as rateos específicas de centros e as RPTs antes do 15 de setembro de cada curso escolar, con negociación previa nas Xuntas de Persoal e entrega de datos dos centros e persoal á representación do persoal coa antelación necesaria para que sexan avaliados.

    • As equipas técnicas deberán ter actualizadas as medicións dos espazos especialmente cando estes espazos sexan ampliados ou modificados. Así mesmo as modificacións dos espazos deberán ter a correspondente avaliación de riscos realizada antes da incorporación do persoal ó traballo neses espazos.

    • Modificación da normativa relativa aos rateos dos comedores , persoal coidador, persoal administrativo e subalterno.

  7. Itinerancias: É fundamental regular as condicións de todo o persoal afectado polas itinerancias de xeito que se compatibilice coa vida persoal e familiar das persoas traballadoras.

  8. Seguridade e Saúde Laboral: Realizarase un plano preventivo específico no que se avaliarán todos os postos de traballo segundo tipoloxía de centro e funcións. Terase en conta de forma específica os riscos no embarazo e lactación (suspensión por risco). 

  9. Xornada de traballo, horarios e permisos: 35 horas, desfrute real dos asuntos propios e regulación de nocturnidades. Os permisos solicitaranse por medios telemáticos a través dun sistema normalizado e xenérico para todos os centros. A súa denegación deberá ser motivada, por escrito, con indicación expresa das necesidades do servizo e dos recursos procedentes, non admitíndose denegacións xenéricas.

  10. Espazos axeitados e diferenciados: Para o descanso do persoal, para gardar as pertenzas persoais. Eliminación de sinalización excluínte.

  11. Recoñecemento profesional e negociación dun catálogo de funcións: O persoal de administración e servizos dos centros educativos será encadrado no grupo e subgrupo de clasificación profesional que corresponda en función da titulación esixida para o acceso e das funcións efectivamente desempeñadas. En ningún caso poderá producirse unha situación de infraclasificación profesional que supoña unha rebaixa das condicións laborais ou retributivas do persoal. Elaboración dun catálogo que terá por obxecto definir as funcións propias de cada grupo, subgrupo e categoría profesional, evitando a asignación de tarefas alleas ao posto e garantindo a adecuación entre funcións, responsabilidade e clasificación profesional.

Con tal motivación, a CIG leva anos traballando de cara este colectivo e con moita máis intensidade estes dous últimos anos. Aquí deixamos recompilación:

 

Detalles

Información da Mesa Sectorial de Negociación de Persoal Funcionario, do 20/10/26:

Nomeamento das escalas convocadas a escoller destino no DOG 30/09/26 (limpeza, cociña, mantemento, RRNN, etc, que agrupou 18 convocatorias de procesos selectivos: afirma a DXEP que publicarán a resolución co nomeamento e destino adxudicado no DOG do 30/10/26. En canto á data de toma de posesión, non a teñen decidida, pero será na semana do 16 a 20 de novembro. Xustifica o retraso na necesidade de reorganizar en comisión de servizos e chamamentos de listas para as prazas non cubertas (principalmente por limpeza e condución, que non poden deixalas sen cobertura). 

Escala de A2-Inspección de turismo que están dende maio/2026 como persoal funcionario en prácticas: o tempo de prácticas finalizou o 31 de xullo. CIG reclamou que tomen medidas para que deixen de cobrar só unha parte das retribucións. A DXEP resposta que estas persoas serán convocadas a escoller destino definitivo na última semana de outubro.

Escala de A2-Consumo (promoción interna): a DXEP afirmou que na 2ª quincena de outubro serían chamadas a elección de destino. Temos información na CIG de que xa circula un listado de prazas que lles van ofertar (os sindicatos ainda non o temos), e que habería unha restricción importante de postos. Reclamamos que oferten todas as vacantes do concurso de traslados. A DXEP di que non o van facer así, que a súa obriga é ofertar un mínimo de prazas como de persoas convocadas, e que teñen prioridades. Denunciamos que están a restrinxir posibildiades ao persoal de promoción interna, tal e como xa pasou fai poucos días en corpos xerais. Esto é inaceptable, teñen que ofertar todas as vacantes. As persoas funcionarias non teñen por que asumir as consecuencias do mal facer da Administración e Xunta.

Proceso selectivo veterinarios/as 2024: cando rematen o proceso selectivo serán convocados/as para destino de inmediato, non terán que agardar por un novo concurso de traslados.

En canto á convocatoria de promoción interna a A2-Escala de inspección de consumo, na que ofertan 7 prazas (dos anos 2024, 2025 e 2026), vai ser por concurso-oposición. A CIG reclamou a eliminación do exame de desenvolvemento escrito de tema, ou alternativamente a súa substitución dunha proba tipo test. Rexeitamos a valoración do tempo en comisión de servizos no baremo de traballo desenvolvido. Rexeitamos o modelo restrictivo ás escalas que poden participar (sempre dende un criterio de reciprocidade que non están a permitir).

Detalles

A Dirección Xeral de Emprego Público e Administración de Persoal convoca Mesa Sectorial de Negociación de Persoal Funcionario para o martes 20 de outubro, para discutir a convocatoria da promoción interna á escala de inspección de consumo, subgrupo A2. Descargar. Outra vez nos envían a documentación sen tempo abondo para a súa difusión e preparación, sen unha negociación real. 

Se é do teu interese, contacta coa CIG.

Outras novas recentes

Xoves, 29 Outubro 2026

BYE, BYE FABIOLA!

Hai despedidas tristes. Cando unha compañeira ou compañeiro de traballo abandona porque non pode manter á súa familia co salario que cobra, ou remata farta e con medo ás agresión que todas e todos sufrimos. eowpzSxtLVM| Nestes últimos tempos, marcados polos conflitos en ensino infantil 0-3, en menores, na discapacidade, en dependencia, en residencias, nos SAF, servizos...
Venres, 30 Outubro 2026

Nomeamentos como persoal funcionario de carreira e apertura do prazo posesorio de varios procesos selectivos

No DOG do 30/10/2026 publican: - RESOLUCIÓN do 23 de outubro de 2026 pola que se nomean persoal funcionario de carreira no corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1, escala técnica de condución, as persoas aspirantes que superaron algún dos procesos selectivos convocados polas...
Venres, 23 Outubro 2026

Voto en contra do PP a máis cursos de galego e á xornada completa do persoal lingüista (Pleno do Parlamento do 20/10/26)

Un grupo nutrido grupo de lingüistas e unha representación da CIG acudimos ao Pleno do Parlamento o 20 de outubro, onde se debateu sobre a situación límite que está a soportar este persoal e a altísima demanda de formación en galego desatendida ano tras ano pola Escola Galega de Administración Pública (EGAP). O BNG presentou unha iniciativa para ampliar a dotación de cursos...