- Detalles
Galiza non ten unha taxa de baixas superior á doutras comunidades, senón unha duración media das incapacidades temporais desproporcionada, debido ás listaxes de agarda do Sergas, que bloquean as recuperacións; motivo polo que a CIG esixe a derrogación de calquera medida penalizadora da incapacidade temporal do persoal empregado público e o reforzo da atención sanitaria pública
Dende a CIG queremos agradecerlle publicamente á Xunta de Galiza o seu esforzo pedagóxico tratando de convencernos de que as persoas empregadas públicas somos unhas «lacazanas». Lamentamos estragarlle o relato, pero o Informe do Instituto de Estudos e Desenvolvemento de Galiza (Idega) da Universidade de Santiago de Compostela (USC) vén de deixar á Administración sen argumentos.
O estudo científico da USC revela que Galiza non ten unha taxa de entradas de baixas superior á doutras comunidades, senón unha duración media das incapacidades temporais desproporcionada: 82,85 días de baixa en Galiza fronte aos 45,93 do conxunto do Estado. A causa? Non é que no país nos entrara unha alerxia repentina ao traballo, senón o «deporte naciona» de ter que agardar por unha cita médica.
A Xunta chama «absentismo» ao que en realidade é «presentismo na listaxe de agarda»: a persoa traballadora está desexando volver ao seu posto, pero a cita coa especialista dorme o sono das xustas nun caixón do Sergas. Basicamente, a Administración penaliza á persoa empregada pola lentitude da que a propia Administración é culpábel.
Uns «pequenos» detalles que a Xunta esquecera mencionar
- O colapso do Sergas como medicina preventiva: se tes que agardar catro meses por unha resonancia, a baixa dura catro meses e medio. Matemática pura, non falla de ganas.
- A «austeridade» que enferma: cadros envellecidos, poboación traballadora envellecida. Galiza é a segunda comunidade con menor esperanza de vida saudábel ao nacer, o que require maiores tempos de recuperación biolóxica ante calquera enfermidade. Vacantes sen cubrir —a falla de cobertura de vacantes na Administración xera sobrecargas de traballo—, o estrés crónico e as patoloxías derivan en procesos de incapacidade máis longos. Sorprendentemente..., sobrecargar ao persoal e non substituír as baixas non mellora a súa saúde mental nin física.
O que esiximos dende a CIG —ademais de que deixeen de botarlle a culpa á vítima
- Derrogar calquera medida penalizadora na incapacidade temporal do persoal empregado público.
- Reforzar a atención sanitaria pública (Sergas) para eliminar as listaxes de agarda que bloquean a recuperación do persoal.
- Menos propaganda e máis axilidade nas probas diagnósticas e altas médicas: curar antes para traballar antes.
- Axilizar a xestión administrativa e a tramitación de altas e probas médicas no sector público.
- Menos estigmatización e máis xestión: fin inmediato ás campañas e penalizacións contra o persoal por mor dunhas cifras de «absentismo» que a propia Xunta infla cos seus atrasos.
- Cobertura de vacantes: deixar de empregar a falla de persoal como método de aforro á custa da saúde das persoas que quedan.
- Respecto aos datos: aceptar que o problema non é a vontade da persoa traballadora, senón a incapacidade da Administración para xestionar a súa propia casa. O informe das expertas advirte que os indicadores habituais sobre «absentismo» están completamente sobreestimados e distorsionados pola durabilidade dos procesos e non por un número elevado de ausencias.
UNHA DE TANTAS MARABILLAS DA ADMINISTRACIÓN...
- Detalles
O luns día 10 de agosto a Consellaría do Medio Rural e as organizacións sindicais CCOO, CSIF e UGT asinaron uns acordos parciais para o persoal do SPIF que entenden que son un logro sen precedentes. Para a CIG isto dista moito da realidade. Deseguido explicámosche o porque.
En primeiro lugar, a Consellería tiña moita présa en pechar estes acordos en pleno verán; tanta, que cando a CIG lle pediu o venres tempo (aínda sen convocatoria para a xuntanza deste luns) para valorar estas propostas e, sobre todo, para partillalas co persoal e coñecer a súa opinión, a resposta da Consellaría foi enviar a convocatoria de xuntanza un par de horas despois, o venres pola tarde —é dicir, nin sequera con 24 horas hábiles de antelación—, e con cambios non negociados.
É curiosa esta présa cando o persoal leva anos agardando polas súas melloras laborais.
QUE TRAE ESTE PAQUETE DE «ACORDOS»?
PERSOAL DESCONTINUO
- Para algunhas persoas é un éxito rotundo que o persoal descontinuo comece a cobrar con máis de dous anos de atraso sobre o persoal funcionario o importe de compensación económica polo traballo realizado en domingos e festivos. Para a CIG non é tal.
- Cando se asinou o acordo de condicións do persoal funcionario, o 22 de xullo de 2024, outra vez en pleno verán, a disposición adicional única establecía que «Porén, tras a sinatura deste acordo iniciaranse negociacións para adecuar a aplicación das condicións específicas de traballo fixadas neste acordo ao réxime xurídico do persoal descontinuo do Servizo de Prevención de Incendios Forestais».Por iso a CIG asinou este acordo no seu momento, para rematar coa discriminación entre o persoal do SPIF, non para seguir manténdoa.
- Dous anos despois a realidade é que o persoal descontinuo vai ter dous anacos do acordo: un que son as quendas de 10 horas (no caso de que as queiran) e outro, un pagamento parcial do traballo realizado en domingos e festivos.
- Que nos perdoe o persoal descontinuo do SPIF se non morremos de optimismo. Pero onde está o resto do Acordo? a prolongación de xornada só nos casos de situación operativa 2 e cobramento no caso de realizalas? O mesmo réxime de vacacións?...
- Buff... pois igual dentro de varios anos chegan, tendo en conta que o propio Acordo di que xa se irán tratando de forma progresiva cando haxa dispoñibilidade orzamentaria, aínda que haxa cuestións que non dependan diso. E xa miraremos o que vai pasar coas reclamacións xudiciais que había por todo o País para reclamar que o persoal descontinuo cobrara o mesmo salario polo mesmo traballo. Agora hai un acordo coas organizacións sindicais que avala que o fagan no ano 2028.
PERSOAL AXENTE
- É certo que esta proposta establece unha importante suba de niveis, iso si..., dividindo ao persoal, esquecéndose das reivindicacións xerais, premiando de forma alarmante as UDEX e as UIFO (as unidades de dirección de extinción que levan anos funcionando irregularmente e, que sopresa!, acaban de legalizar na RPT) con persoal escollido a dedo e, por suposto, sen criterios obxectivos.
- Establécese como data do peche para negociar as melloras das condicións dos axentes o 31 de decembro de 2029.
- É que este Acordo so é para a foto e para alongar un mes máis o extraordinario sen as «compensacións extraordinarias».
- E ten dúas cláusulas dedicadas a dicir que non é un acordo de aplicación directa, que ten que ser aprobado en mesas e por Orzamentos, e que, en todo caso, é un documento base para negociar.
- Entón... para que a foto?
PERSOAL TÉCNICO
- Nesta proposta a Consellaría comprométese a negociar coas organizacións sindicais as bases da convocatoria para a provisión dos postos de xefatura de distrito e a publicalas unha vez finalizado o período de alto risco de incendios forestais, pero... ollo!, só é un «proxecto piloto» para a provincia de Lugo.
- A maiores, as partes comprométense a solicitar os coeficientes redutores sen ningún tipo de concreción temporal. É dicir, outro acordo en falso.
A CIG interpreta que a Consellaría do Medio rural quere tomarlles o pelo e rirse das escalas do persoal técnico. Son feitos comprobábeis que se trata das únicas escalas coas que a Dirección Xeral de Defensa do Monte se negou a negociar condicións de traballo e a convocar a Mesa de Seguimento do Acordo (cando a CIG xa a solicitou hai máis de dous anos). Temos que recordar que é un acordo asinado no Bipartito no ano 2008, con algunha modificación posterior.
ESPECIALIZACIÓNS
- Unha vez máis. incomprensibelmente, exclúe ao persoal enxeñeiro, como se puido comprobar hai menos de 1 mes coa modificación das RPTs da Consellaría do Medio Rural.
- Agardemos que o presidente da Xunta de Galiza e os responsábeis da Consellaría do Medio Rural nunca teñan que dar explicacións por estas maneiras de proceder.
CONCURSOS ESPECÍFICOS
- Teñen que cumprir coa lexislación do persoal empregado público, e co Decreto de mobilidade.
- Non podemos consentir que existan comisións de servizo con máis de 10 anos de antigüidade.
COEFICIENTES REDUTORES
- Grave e preocupante, dende o punto de vista democrático, é o comportamento da Consellaría do Medio Rural nas negociacións dos coeficientes redutores, cando o pasado mes de xullo se presentan nunha xuntanza coas organizacións sindicais cunha proposición non de lei do partido político que sustenta o goberno galego, é dicir, o Partido Popular
- Dende a CIG temos que recordarlles que vivimos nunha democracia parlamentaria onde o poder lexislativo, executivo e xudicial están separados, e por riba dun complemento ou dunha mellora laboral está protexer e defender a democracia, e máis nos tempos que corren.
- Ademais,é unha iniciativa ridícula, que consistía en instar a Pedro Sánchez para que arranxe a xubilación do persoal técnico da Xunta de Galiza, cando xa había xuíces na Galiza, e tamén a propia Seguridade Social, que din que ao persoal técnico do servizo de loita contra os incendios de Galiza hai que aplicarlle os coeficientes reductores.
- Evidentemente a Consellaría do Medio Rural, de seguir así, vai perder o tren da negociación. Xa temos algunhas compañeiras e compañeiros xubiladas/os e outras e outros en camiño.
A CIG esíxelle á Consellaría do Medio Rural que cumpra cos seus compromisos e abra a mesa de negociacion das condicións de traballo do persoal técnico, que cumpra coa palabra das especializacións e coa lexislación do persoal empregado público para este persoal.
PACTOS ÁS AGACHADAS
- Non podemos omitir, ademais, que no caso do persoal axente e descontinuo do SPIF, o documento que se nos remitiu o xoves contiña a obriga de pasar un recoñecemento médico obrigatorio anual e, se o persoal resultaba non apto, destinaríase ao desempeño de funcións non vinculadas directamente coa extinción de incendios forestais.
- Dicimos «contiña» porque lendo os INFORMAS das outras organizacións sindicais xa non debe ser tal. Xa temos claro que os textos do acordo que se enviou á CIG e os que logo se asinaron son diferentes. Houbo, entón, pactos ás agachadas. A Xunta do PP teno claro: divide e vencerás, e aquí o que fai é afondar na división entre o persoal.
Pero xa sabemos que… COA CIG, NA RÚA, A LOITA CONTINÚA!!
- Detalles
Na CIG defendemos unha Administración pública aconfesional, neutral e de todas e todos, que non empregue os seus medios institucionais para dar relevancia pública a unha opción relixiosa particular, nin para facer publicidade da dimensión persoal de quen ocupa a Presidencia.
Si, Alfonso Rueda, a título persoal, pode facer o que lle pete: pode ir a unha procesión, acudir á misa ou participar nos actos relixiosos que considere oportunos. É unha cuestión da súa esfera persoal e da súa liberdade individual, e non temos nada que dicir ao respecto.
O que cuestionamos é que a propia Xunta de Galiza empregue o seu web e as súas canles institucionais para publicitar a participación do presidente nun acto de culto relixioso, porque aí xa non estamos a falar de Rueda como cidadán. Estase a empregar a institución que representa ao conxunto das galegas e dos galegos, independentemente das súas crenzas, da súa relixión ou de que non profesen ningunha.
A participación de Rueda na procesión da Virxe da Peregrina é unha cuestión persoal. Que a Xunta a converta en comunicación institucional é unha decisión da Xunta. Non é a primeira vez que usa as canles de difusión da Xunta para promocionarse, pero por iso non é menos cuestionábel.
E resulta difícil non preguntarse: veremos tamén á Xunta publicitando a participación do presidente en actos relixiosos doutras confesións? Ou emulará ao novo goberno de Colombia cos seus retiros, ou a Trump, é pasará directamente a rezar antes dos Consellos da Xunta?
A Administración pública debe ser neutral e representar a toda a cidadanía. Non pode empregar os medios institucionais nin as persoas empregadas públicas para dar relevancia a unha opción relixiosa particular, aínda que sexa a maioritaria do País, nin para facer publicidade da dimensión persoal de quen ocupa a Presidencia.
Dende a CIG defendemos unha Administración pública aconfesional, neutral e para todas.
Rueda pode facer o que lle pete. A Xunta debe representar a todas e todos!
- Detalles
ESCOLAS INFANTÍS (A2 e C1)
- Resolución de adxudicacións de destino e concurso de traslados: venres 07/08
- Cesamento: 17/08
- Data de incorporación: 01/09
- Tomas de posesión: do 18/08 ao 01/09
- A toma de posesión será telemática: entre esta semana e a seguinte publicarán no web de FP a forma para asinar. En principio, indican que non esixirán nin chave 365 nin certificado dixital.
- Listas complementarias de C1: o acto de eleccións de destino (concurso-oposición + libre) será na segunda quincena, co cal antes publicarán o listado de persoas aprobadas, dando un prazo para entregar documentación (e indicarán as datas correspondentes).
PERSOAL AUXILIAR COIDADOR
- Resolución de adxudicacións de destino e concurso de traslados: na semana do 10/08
- Cesamento: 31/08
- Toma de posesión: 01/09 nos centros de traballo (prazo de 15 días naturais)
- Non aclaran a data de incorporación.
- O mesmo día da publicación das adxudicacións de destinos irá publicada a listaxe complementaria de persoas aprobadas (e indicarán as datas correspondentes).
ESCALAS SOCIOSANITARIAS
- Resolución de adxudicación de destinos e concurso de traslados: entre o 10 e o 20 de agosto
- Cesamento: 30/09
- Toma de posesión e incorporación: 01/10 (prazo 15 días naturais)
- Emprego Público indica que irán publicando as listaxes complementarias de persoas aprobadas até completaren todas as vacantes.
ASUNTOS VARIOS
- Comisións de servizo: no caso das escolas infantís tentarán sacalas dende o 10/08, condicionadas á toma de posesión
- Queren sacar todas con data límite do 25 de agosto, na cal que terían que lanzar as vacantes a listas de contratación.
- No resto destas escalas irán anunciando as comisións de servizo conforme avancen os procesos.
- Agás nas escolas infantís, as persoas que estean desfrutando de vacacións no prazo posesorio, non poderán asinar até finalizalas.
- Conciliación: ao darse un cambio de vínculo xurídico, todas as persoas terán que solicitar, de novo, os diferentes permisos de conciliación.
- Adaptacións de postos: Emprego Público valorará as distintas opcións segundo o caso.
- Prestacións por embarazo e COMEs: non se inicia o trámite de novo, pero piden que se comunique o cambio de destino/centro (para cubrir os postos).
- Detalles
Ademais de tratar os asuntos da orde do día, nesta xuntanza, após a nosa protesta, quedou fixado o 21 de outubro para comezar a negociar o acordo do PND. Repetimos a petición de que se dean destinos adaptados para persoal con discapacidade intelectual; preguntamos pola toma de posesión para corpos xerais e escalas sociais o mesmo día 15 de setembro e por se nas escalas de infantil e persoal auxiliar coidador se mantén no 1 de setembro. Aclaramos se haberá cesamentos de persoal interino e confírmannos a elección de destino de animación sociocultural en setembro. Ademais, denunciamos o mal funcionamento do aplicativo de elección de destinos, e preguntamos polas solicitudes de carreira que aínda seguen «en trámite» e pola situación das embarazadas en risco biolóxico na toma de posesión.
Negociación do acordo de PND
- Na Comisión de Persoal manifestamos o noso total desacordo con que nos convoquen a votar a RPT de Educación cando mesa tras mesa de negociación non traen unha data para comezar a negociar o acordo das condicións de traballo do persoal non docente (PND). Así que, tras dar plantón, aceptan datar no 21 de outubro a primeira reunión para o acordo. Sen tempo non era!
Destinos adaptados para o persoal con discapacidade intelectual
- Levamos anos pedindo que unhas persoas que ocupan destino provisional con discapacidade intelectual, rogan non continuar nos institutos de educación secundaria nos que están e que se lles oferten uns destinos adaptados.
- En mesas anteriores a DXEP indicou que a elección de destino definitiva será no último trimestre do ano, e que mentres tanto, para que non teñan que incorporarse o día 1 nos institutos de educación secundaria, poderían usar a fórmula da comisión de servizo.
- Preguntamos na mesa como vai está xestión e din que están revisando todo isto ao xa estar adxudicados os destinos dos corpos xerais; que tentarán resolver, pero que non teñen información máis detallada.
Vindeiras adxudicacións de destino
- Preguntamos se teñen en conta que as escalas sociais e os grandes centros de Política Social teñen a toma de posesión o mesmo día que os corpos xerais (15 de setembro).
- A directora di que non ve que sexa un problema que coincidan cesando e tomando posesión, porque é pouco o persoal administrativo que hai nos centros de Política Social.
- No caso das escalas de infantil e persoal auxiliar coidador preguntamos, tamén, se manteñen a data da toma de posesión (1 de setembro), xa que está anunciado o inicio de curso con alumnado o 7 de setembro, e como dispoñen de 15 días para incorporarse pode darse a circunstancia de que non poidan prestar o servizo nos centros.
- Dende a CIG insistimos en varias ocasións, por diferentes medios, que o inicio de curso nas escolas infantís con alumnado debería ser o 15 de setembro.
- Ante isto a DXEP di que entre o 7 e o 14 publicarán a adxudicación de destinos nestas escalas e que tamén sairá a listaxe de novas aprobadas, para que na segunda quincena poidan participar no segundo acto de elección de destino.
Posíbeis cesamentos de persoal interino
- Outra cuestión que tamén preocupa é en relación aos cesamentos do persoal interino que ocupa vacante, pero non colle praza.
- Indican que estas persoas non cesarán se están ocupando un posto que non se ofertou no acto de elección de destinos.
- O persoal substituto si que ten que cesar porque o obxecto de cobertura xa non continúa, sempre e cando cese a titular.
Escala de animación sociocultural
- Na escala 20C8 (C1), de animación sociocultural, están pendentes de información sobre cando elixirán destino, xa que a lista de persoas aprobadas xa é de outubro do 2024.
- Confirma a directora que será no mes de setembro.
Queixa oficial da CIG a respecto do aplicativo para as eleccións de destino
- Con anterioridade a este mesa, na CIG rexistramos ante Emprego Público unha queixa sobre o aplicativo dos actos de elección de destino.
- É un aplicativo que non facilita nada a xestión que teñen que facer todas as persoas aspirantes a elixir unha praza.
- Os ficheiros txt dan problemas cando se cargan, e o sistema non indica de que problema se trata.
- Se o persoal ordena por concello, o aplicativo pode desordenar todo o que se fixera previamente.
- Se se ordena manualmente, tamén pode desordenar…
- Todo un despropósito, sobre todo en corpos nos que xa pasamos de 800 persoas, e outros que quedan por vir.
- Tamén pedimos que suban ao web a folla de cálculo coa listaxe de postos, para facilitar a elaboración do ficheiro txt.
- A DXEP responde que revisarán o aplicativo e nada máis.
Solicitudes de carreira profesional «en trámite»
- Aínda hai solicitudes da carreira profesional que no Fides aparecen como «en trámite».
- A DXEP recoñece que si, que están finalizando, e que, en principio, a vindeira semana informarán das solicitudes estimadas e as desestimadas que faltan.
Toma de posesión e risco biolóxico das traballadoras embarazadas
- No caso das escolas infantís, por prevención debido ao risco biolóxico, as embarazadas son apartadas do posto de contado.
- Moitas delas están nesta situación no momento da toma de posesión e é importante saber como teñen que proceder, se é que teñen que tramitar algo.
- Emprego Público considera que non hai que iniciar trámites dende cero, pero que non está de máis trasladar por sede da Xunta esta situación para que a teñan en conta nas unidades administrativas.
- Tamén pasaría o mesmo coas prestacións por coidado de menores con enfermidades graves (COMEs).
- Detalles
Máis de 50 compañeiras e compañeiros ven como a Administración lles desconta máis de 1000 euros nas nóminas de xullo.
O caos na xestión das nóminas do persoal de Medio Rural volve quedar en evidencia. Nesta ocasión, máis de 50 axentes ambientais da provincia de Pontevedra sufriron descontos superiores aos 1000 euros na nómina de xullo baixo o concepto «Específico xuño/decembro», unha regularización que a Administración atribúe a incidencias na confección das nóminas derivadas da aplicación da cotización adicional para a xubilación co coeficiente redutor.
Non é a primeira vez que o persoal axente e bombeiro padece erros nas súas nóminas ao longo deste ano. O que resulta inadmisíbel é que a Administración continúe trasladando ao persoal as consecuencias dos seus propios fallos, provocando minoracións salariais de tal magnitude sen información previa nin explicacións suficientes.
A comunicación remitida ás persoas afectadas non permite comprender con claridade a regularización practicada. Mentres nas nóminas o desconto figura baixo un concepto retributivo, a Administración tamén fai referencia a unha suposta duplicidade nas retencións do IRPF e anuncia unha redución das retencións nos vindeiros meses para «solucionalo». Ambas as dúas cuestións aparecen mesturadas, sen que resulte posíbel verificarmos a relación entre elas nin coñecermos se a solución adoptada garante que non existirán consecuencias fiscais para o persoal afectado.
Non é aceptábel que un erro na xestión das nóminas se resolva descontando máis de 1000 euros nun único mes, xerando graves dificultades económicas a numerosas compañeiras e compañeiros.
Por este motivo, vimos de presentar un escrito dirixido á Secretaría Xeral Técnica da Consellaría do Medio Rural e á Dirección Xeral de Emprego Público e Administración de Persoal, no que esiximos unha explicación formal do sucedido, a remisión do informe técnico elaborado por CIXTEC que fundamenta a regularización practicada e garantías expresas de que as medidas anunciadas a respecto do IRPF non ocasionarán ningún prexuízo ás persoas traballadoras afectadas.
Ao mesmo tempo, estamos recompilando información para coñecer o alcance real desta incidencia e determinar se tamén afectou a outras provincias e colectivos.
A Administración debe asumir a súa responsabilidade. Non é o persoal quen ten que pagar as consecuencias dunha xestión deficiente das nóminas. Exiximos transparencia, garantías e unha solución inmediata!
- Detalles
A CIG reclama o rexistro retributivo, imprescindíbel para analizar a fenda retributiva entre mulleres e homes.
No mes de xuño a CIG solicitou o rexistro retributivo do persoal ao servizo da Comunidade Autónoma do ámbito subxectivo do I Plan de Igualdade da Xunta de Galiza, que afecta a máis de 26.000 persoas.
A Dirección Xeral de Emprego Público e Administración do Persoal resolveu en contra da solicitude con base nas «limitacións do dereito de acceso á información pública», aludindo ao artigo 25.1 da Lei de transparencia e bo goberno. Tamén á necesidade da Administración de «reelaboración previa» da información que se solicita.
A CIG non asinou un plan de igualdade que non estabelecía ningunha medida para corrixir desigualdades máis que as que estabelece a propia lexislación básica. Os demais sindicatos da Mesa foron quen de asinar, incluso sen os documentos de obrigada achega por parte da Administración como é o rexistro de postos de igual valor.
Enchen a boca dicindo que mulleres e homes reciben as mesmas retribucións («faltaría máis»—din), pero os feitos sonche testáns: as mulleres, ao cobrarmos as prestacións por embarazos, por risco ou por maternidade pola última base de cotización, quedamos decotío sen as subas salariais, sen o cobramento dos atrasos dos trienios cumpridos durante estas situación, etc.
Pasaron xa tres anos e seguimos sen avanzar no plan de igualdade nin un pequeniño chanzo, coa complicidade dos sindicatos asinantes que forman parte da Comisión de Seguimento do I Plan de Igualdade; tres anos sen ningún documento sobre os postos de igual valor e sen actualizar o rexistro retributivo.
O Real decreto 902/2020, de igualdade retributiva entre mulleres e homes, estabelece que todas as empresas teñen que ter un rexistro retributivo coa elaboración dos datos das medias dos niveis de remuneración e desagregados, indicando que ten que incluír os valores medios dos salarios, os complementos salariais e as percepcións extrasalariais dos cadros de persoal, desagregados por sexo, a media aritmética e a mediana do realmente percibido por cada un destes conceptos e polo sistema de clasificación que empregue a empresa (niveis, categorías, postos...).
A Directiva (UE) 2023/970, do 10 de maio de 2023, pola que se reforza a aplicación do principio de igualdade de retribución entre homes e mulleres por un mesmo traballo ou un traballo de igual valor a través de medidas de transparencia retributiva e de mecanismos para o seu cumprimento, estabelece, tamén, que este rexistro retributivo ten que facilitárselle ao persoal a través da súa representación cunha periodicidade anual.
- Detalles
Nesta xuntanza por parte da CIG solicitamos que o persoal que actualmente non fai quendas poida manter a súa situación até que a praza quede vacante; insistimos na urxencia de abrir a negociación integral das condicións de traballo da escala de Recursos Naturais e Forestais; e reiteramos a nosa solicitude de abril para abrir unha negociación global sobre quendas, domingos e festivos, roupa de traballo, formación, descansos e desigualdades retributivas. Opoñémonos á esixencia da titulación de Dereito para a xefatura de sección xurídica, e demandamos que antes de crear ou modificar postos se nos informe das cargas de traballo, se faciliten aclaracións e se corrixan erros, ademais de homoxeneizar os servizos de persoal das catro provincias.
A respecto da proposta de modificación da RPT da Consellaría do Medio Ambiente e Cambio Climático que a Administración trouxo á mesa de negociación, coa finalidade de adaptar a estrutura do persoal ás necesidades actuais e anticipar a dotación de recursos para a futura Lei de administración ambiental simplificada de Galiza, o noso posicionamento foi o seguinte:
Recoñecemento retributivo das quendas do persoal de campo
- Valoramos positivamente a compensación económica prevista para o persoal dos centros de recuperación de fauna e piscifactorías, pero solicitamos que o persoal que actualmente non realiza quendas poida manter a súa situación até que a praza quede vacante.
- Porén, insistimos na urxencia da apertura dun proceso de negociación integral das condicións de traballo do persoal da escala de Recursos Naturais e Forestais.
- Reiteramos a necesidade de abrir unha negociación global sobre quendas, domingos e festivos, roupa de traballo, formación, descansos e desigualdades retributivas, entre outros aspectos. Lembramos que esta petición foi rexistrada no mes de abril e continúa sen resposta.
Reserva da xefatura de sección xurídica para persoas tituladas en Dereito
- Amosamos o noso rexeitamento a esta limitación por considerar que exclúe de forma inxustificada persoal do corpo superior da Administración Xeral e vulnera os principios de igualdade, mérito e capacidade.
Organización dos servizos
- Solicitamos corrixir erros da documentación, homoxeneizar os servizos de persoal das catro provincias e facilitar datos sobre as cargas de traballo antes de crear ou modificar determinados postos.
- Tamén reclamamos aclaracións sobre diversos postos afectados pola modificación.
Respostas da Consellaría de MACC
- Recoñece a necesidade de negociar as condicións do persoal de campo, pero non fixa ningunha data para iniciar esa negociación.
- Mantén a esixencia da titulación en Dereito para a nova xefatura de sección.
- Rexeita que o persoal que actualmente non fai quendas poida conservar as súas condicións, alegando que o cambio "non é á carta". Na CIG observamos que si se manteñen condicións do persoal en prazas de xefaturas de sección de persoal provinciais até que queden vacantes. Por que se aplican criterios tan diferentes?
- Admite que existen desigualdades retributivas entre postos equivalentes, pero anuncia que non fará equiparacións á alza, senón que aplicará modificacións cando os postos queden vacantes.
A vindeira reunión celebrarase na primeira quincena de setembro.
Compartimos convosco a documentación para recompilar as vosas achegas.
Contacta con nós para mais información!
- Detalles
A Consellería da Imposición e falta de Educación, segue a mofarse do Persoal da Administración e Servizos dos centros educativos, e levan á Mesa Xeral de negociación a modificación da relación de postos de traballo (RPT), sin propoñer nin dar datas de cara á negociación dun Acordo Marco de condicións de traballo para o persoal non docente dos centros, motivo polo que xa na anterior reunións os deixamos sentados e coa palabra na boca.
Nesta Mesa Xeral, dimos lectura dun comunicado conxunto de CIG, CCOO, CSIF e UGT, acordado previamente.
A Consellería de Educación, e a Dirección Xeral de Emprego Público e Administración de Persoal, non traen nin datas nin propostas de cara a comezar coas negociacións do Acordo. Limítanse a impoñer a modificación da RPT sen ningún tipo de negociación, que será aprobado unilateralmente nunha vindeira Comisión de Persoal prevista para este venres 31 de xullo.
Novamente quedan plantados na mesa, e non vamos a tratar outros asunto coa Consellería de Educación mentres non haxa unha negociación dun Acordo para o persoal de administración e servizos.
A esta loita iniciada pola CIG xa fai dous anos, novamente volvesen a sumar as demais organizacións sindicais, de cara a remar todas xuntas por un acordo para o PAS. Seguiremos pelaxando ata acadar o Acordo. Si a Consellería non atende as nosas demandas, a CIG seguirá no conflito.
Non hai loita perdida, máis a que se abandona!!
- Detalles
Emprego Público pasa outra vez o rolo e aproba varios procesos selectivos co voto en contra de todas as organizacións sindicais
Na Comisión de Persoal (CP) do 23 de xullo constátase unha vez máis o desprezo negociador da Dirección Xeral de Emprego Público (DXEP) que usa ás organizacións sindicais, representantes lexítimos do persoal da Xunta de Galiza, como meros correctores da documentación ao non terse en conta ningunha das alegación presentadas, sendo finalmente aprobadas con pequenos cambios por maquillaxe e/ou erros das versións iniciais remitidas.
Procesos selectivos aprobados, máis non negociados:
- A1, escala de enxeñeiros, especialidade de enxeñaría agronómica
- A1, escala de sistemas e tecnoloxía da información
- A2, escala de enxeñeiros técnicos, especialidade de enxeñaría técnica agrícola
- A2, escala de enxeñeiros técnicos, especialidade de enxeñaría técnica de obras públicas
- A2, escala de axudantes de arquivos, bibliotecas e museos, especialidade de arquivos
Dende a CIG votamos en contra, ao igual que as demais OOSS en base ás seguintes argumentacións:
- Defendemos concurso-oposición
- Concordamos con permitir promoción interna horizontal e vertical dende calquera escala. Pero queremos co 50% da oferta, e separada
- Non estamos de acordo en que o 3º exercicio sexa de desenvolvemento escrito de temas, e de mantelo solicitamos que teña un peso da metade do dos demais exercicios
Rexistro do persoal funcionario habilitado e asistencia para a identificación e a sinatura electrónicas
A DXEP tamén trouxo á CP o proxecto de decreto polo que se regula o Rexistro do Persoal Funcionario Público Habilitado e a asistencia para a identificación e a sinatura electrónicas no ámbito da Administración xeral da Comunidade Autónoma de Galiza e as entidades públicas instrumentais do sector público autonómico.
A CIG entende que a creación deste Rexistro vén derivado dunha obriga legal, polo que nese senso non temos nada que obxectar, máis quixemos deixar constancia da inquedanza que nos traslada o persoal que, en atención ao disposto no artigo 5 do decreto, vai ser incluído no antedito Rexistro.
Esa inquedanza radica en que o seu número de documento de identidade, un dato sensible segundo o criterio da Axencia Española de Protección de Datos (AEPD), vai quedar exposto ante as persoas que exerzan o seu dereito a seren asistidas no uso de medios electrónicos nas súas relacións coa Administración en todas as súas vertentes.
Atendendo ao disposto no informe da AEPG 88/2020 e na que a propia Lei 4/2019, do 17 de xullo, de administración dixital de Galiza, xa recolle a posibilidade de emisión de certificados dixitais de pseudónimo para determinados colectivos de persoal empregado público, entendemos que esa posibilidade podería facerse extensiva tamén ao persoal que vai ser inscrito no citado Rexistro.
Quedan en valorar esta inquedanza.