No DOG de hoxe, 3/04/2017, publícanse as bases para a concesión da prestación económica de pagamento único por fillas e fillos menores de tres anos, así como a convocatoria destas axudas para o ano 2017.
Estas axudas van dirixidas á cidadanía en xeral (non se trata de axudas de acción social para persoal da Xunta de Galiza).
O prazo de presentación das solicitudes ábrese o martes 4 de abril e remata o 26 de maio
O martes 4 de abril, ábrese o prazo para solicitar a prestación económica de pagamento único por fillas e fillos menores de tres anos, correspondente a 2017. Novamente, quedan excluídas destas axudas as persoas que o pasado ano presentaran a declaración da renda, aínda sen ter a obriga de facelo.
Poderán ser beneficiarias desta prestación aquelas persoas que teñan fillas ou fillos menores de tres anos o 1 de xaneiro de 2017 (nados entre o 02-01-2014 e o 01-01-2017, in-cluídos) e que, durante o ano 2015, nin elas nin ningunha das persoas que compoñen a unidade familiar estivesen obrigadas a presentar a declaración polo IRPF correspondente a este período, nin a presentaran de xeito voluntario aínda sen estar obrigadas a facelo.
A prestación consistirá nun pagamento único por cada filla ou fillo menor de tres anos, na seguinte contía:
- Cando sexa a primeira crianza: 360 euros.
- Cando sexa a segunda crianza: 1.200 euros.
- Cando sexa a terceira ou terceiro e sucesivos: 2.400 euros.
O prazo de presentación das solicitudes será de 35 días hábiles, contados a partir do día 4 de abril. Dado que a nova normativa non contabiliza os sábados como hábiles, o último día para presentar a solicitude será o 26 de maio.
As solicitudes presentaranse preferiblemente por vía electrónica a través do formulario normalizado dispoñíbel na sede electrónica da Xunta de Galiza (https://sede.xunta.gal).
Opcionalmente, poderanse presentar presencialmente en calquera dos lugares e rexistros estabelecidos na normativa reguladora do procedemento administrativo común.
