Cando a mensaxe que está a mandar continuamente a Xunta de Galiza e o seu Presidente é de que hai que apretarse o cinto, de que estamos nun momento delicado para o País e que non hai diñeiro, todo isto parece que non vai coa Consellería de Traballo e Benestar que se dedica a dilapidar os recursos públicos a mans cheas.

A última é a Adxudicación de atención teléfonica a usuarios do Servizo Público de Empleo de Galicia, por un importe de 295.744,33€ IVE Incluído, a empresa adxudicataria deberá formar un equipo composto por un coordinador e nove teleoperadores.

O obxecto do contrato é  "proporcionar aos usuarios do Servizo Público de Emprego de Galicia, tanto a demandantes como a empresas ofertantes de emprego, toda a información que precisan en materia de xestión de ofertas, liñas de promoción do emprego e outros programas da Consellería de Traballo e Benestar"

Dende a C.I.G.-Autonómica queremos denunciar esta nova privatización dun servizo que ten que ser dado pola Subdirección Xeral de Colocación, facendo novamente unha escandalosa mostra de deixación de funcións e malgastando os poucos recursos públicos que temos.

Instamos a Conselleira de Traballo e Benestar a que anule esta adxudicación e obrigue a Subdirección Xeral de Colocación a que dote o servizo dos medios necesarios para a atención teléfonica aos cidadáns galegos, dende a xestión pública, con profesionalidade e calidade.