As federacións de Administración, Ensino e Saúde da CIG recollerán os apoios á petición de interposición dun recurso de inconstitucionalidade contra o RD 8/2010 e a lei galega 3/2010.
As federacións de Administración, Ensino e Saúde veñen de pór en marcha unha campaña de recollida de sinaturas para adherirse á petición de interposición dun recurso de inconstitucionalidade contra o Real Decreto-lei 8/2010 do 20 de maio, polo que se adoptan as medidas extraordinarias para a redución do déficit público e contra a Lei galega 3/2010, do 23 de xuño, pola que se modifica a Lei 9/2009, do 23 de decembro, de orzamentos xerais da Xunta de Galiza.
As federacións afectadas por esta normativa entenden que non concorre unha situación de extraordinaria e urxente necesidade que xustifique a promulgación do RD lei e que, en todo caso, se están a vulnerar dereitos, deberes e liberdades da cidadanía regulados no Título I da Constitución.
Os secretarios nacionais de Administración Pública, María Carme López Santamariña; Ensino, Anxo Louzao e Saúde, María Xosé Abuín presentaron a solicitude de interposición de recurso de inconstitucionalidade ante a Defensora do Pobo, por considerar que a adopción de medidas lexislativas extraordinarias obedecen a unha situación de “mero oportunismo político, en absoluto amparado pola Constitución para habilitar ao poder executivo a ditar normas con rango de lei”.
Engaden ademais que en setembro de 2009 o goberno pactou con determinados sindicatos un incremento salarial do 0,3% para os empregados públicos, no ano 2009 (que a CIG considerou inaceptábel por consideralo escaso) e unha cláusula de revisión salarial de mantemento do poder adquisitivo, medidas, ambas as dúas, que foron incluídas na Lei de Orzamentos do estado para 2010, mediante as oportunas consignacións de crédito. Porén, sinalan que, transcorridos apenas 6 meses desde a súa aprobación, se decidiu reducir un 5% a masa salarial, no que consideran unha “clara contradición cunha previa (e recente) decisión lexislativa”.
Tamén consideran que a vía utilizada, mediante RD-Lei supón unha clara vulneración dos dereitos adquiridos polos empregados/as públicos/as e a diminución retributiva adoptada, discriminatoria.
Parten de que se vulnera o artigo 33.3 CE que di que “ninguén poderá ser privado dos seus bens e dereitos senón por causa xustificada de utilidade pública ou interese social, mediante a correspondente indemnización e de conformidade co disposto polas Leis” e o 31.1 no que se recolle que “todos contribuirán ao sostemento dos gastos públicos de acordo coa súa capacidade económica mediante un sistema tributario xusto inspirado en principios de igualdade e progresividade que, en ningún caso, terá carácter confiscatorio”.
Transposición lexislativa galega
Na petición presentada perante a Defensora do Pobo engaden que tanto o Decreto Lei como a súa transposición lexislativa galega vulneran o dereito fundamental á igualdade, na medida en que se aplica unicamente aos empregados e empregadas do sector público e o dereito á negociación, toda vez que nas leis de orzamentos estatal e galega para o ano 2010 foron obxecto de pacto na negociación colectiva funcionaria e laboral das administracións territoriais, organismos e entes públicos e empresas do sector público.
Para a recollida das follas sinaturas pódese imprimir o pdf adxunto e entregalas, unha vez cubertas, nos locais comarcais da CIG nas respectivas federacións.
Documentos
| Solicitude de interposición recurso inconstitucionalidade.pdf |  |
| Folla de recollida de sinaturas.pdf | |