A secretaria xeral de Presidencia, Beatriz Cuíña Barja, ordena á policía impedir a entrada ao Salón Grande de San Caetano, que fora previamente reservado pola CIG, e expulsar aos representantes sindicais do Edificio Administrativo.
O venres 24 a CIG-Autonómica solicitou formalmente e por escrito no impreso habitual dispor dunha sala de actos en San Caetano, como se ven facendo habitualmente dende hai moitos anos, para celebrar unha xuntanza de traballo hoxe martes, e tratar temas relacionados coa actividade sindical recente.
Despois de sernos concedido o Salón de Actos A (Grande) atopámonos coa sorpresa que diante da porta se atopan varios policías impedíndonos o paso e declarando que teñen orde de impedir que se realice unha reunión da CIG en San Caetano.
Nin dende a Secretaría Xeral de Presidencia nin dende Función Pública se nos quixo dar unha explicación para o desaloxo.
A CIG-Autonómica vai presentar unha demanda para a tutela xudicial do dereito á liberdade sindical por entender que a Administración quixo impedir que os/as delegados/as da CIG se reunisen nos locais da empresa, previamente solicitados, co único fin de impedir a función representativa e evitar que os órganos da CIG poidan adoptar decisións contrarias á política do Partido Popular.
Os/as delegados/as da CIG-Autonómica, decidimos entón celebrar a xuntanza nun dos espazos comúns do vestíbulo de entrada a San Caetano, sendo desaloxados pola policía e escoltados ata a saída das instalacións.
Debe quedar constancia de que moitos/as dos/as delegados/as son empregados/as públicos/as dese mesmo centro.
Nen nos tempos máis rancios de Fraga se nos impediu o dereito de reunión como ven de facer cunha actitude fascista a secretaria xeral da Presidencia do Partido Popular.
