A Administración, a instancia da Consellaría de Traballo e Benestar, vén de proporlles ás centrais sindicais asinantes do Convenio a modificación do mesmo substituíndo o descanso adicional derivado do traballo en domingos e festivos contemplado no artigo 19.5 do Convenio pola remuneración deses días de descanso.

A consecuencia máis notable disto sería a redución de emprego público, a volta para casa dos/as compañeiros/as que cobren estes días de descanso e a maiores se estaría a xogar coa saúde do persoal.

A CIG, como central asinante do V Convenio, apostou porque este defendese o descanso dos/as traballadores/as fronte a remuneración do traballo en domingos e festivos.

E consecuentemente con isto a CIG non pode aceptar esta proposta que só vai destinada á destruír emprego público e aforrar os cartos que supón de cara á creación da Axencia Galega de Servizos Sociais.

Suporía ademais unha degradación das condicións laborais ao se intensificar o traballo nos centros de Benestar, xa que a eles vai destinada a reforma, e non incrementarse a plantilla.

E como corolario, a CIG non pode aceptar ningunha chantaxe e está disposta a asumir as consecuencias desta negativa a satisfacer os plans dunha Administración que ten a cabeza posta na creación dunha Axencia cunhas condicións laborais devaluadas.

Nota remitida aos medios