Segundo o acordado nas asembleas, o Comité de Empresa e Xunta de Persoal de Servizos Centrais da Xunta de Galiza veñen de remitir dúas cartas por correo electrónico aos representantes dos traballadores das administracións públicas en Asturias e Andalucía no que lle da conta das actuacións levadas a cabo sobre os empregados públicos galegos polo goberno do PP na Xunta de Galiza en contraposición ao que se prometía no seu programa electoral.

No escrito comunícase que o Partido Popular no seu programa de goberno presentado nas eleccións galegas que tiveron lugar no mes de maio de 2009, xa coa crise, divulgaba as medidas que ía adoptar se gañaba as eleccións,  como indica a páxina 169 do seu programa electoral: Incrementar de forma significativa as cantidades destinadas ao Fondo de Acción social, alcanzando o antes posible o 1% da masa salarial, así como cláusulas de revisión salarial e recuperación do poder adquisitivo.

A Xunta de Persoal e Comité de Empresa advirten aos compañeiros e compañeiras andaluces e asturianos de que o Partido Popular fixo exactamente o contrario. Así, por exemplo, a recente Lei 1/2012, publicada no Diario Oficial de Galicia de 02.03.12, cuxo artigo 3 ELIMINA INTEGRAMENTE O FONDO DE ACCIÓN SOCIAL, agás unha pequena cantidade para casos de discapacidade, suprimindo así unha partida de gastos compensatorios para o persoal de máis de 9 millóns de euros, que existiu na práctica totalidade da historia desta autonomía.

Ademais doutros recortes ben coñecidos por todas e todos nós, como é o caso dos supostos de Incapacidade Temporal ou a redución forzosa baixo criterios discrecionais da xornada e salario do persoal temporal e interino mentres aumenta a privatización dos servizos públicos.

Seguindo o mandato da Asemblea de persoal xa indicada, a Xunta de Persoal e Comité de Empresa dos Servizos Centrais da Xunta de Galiza considerou necesario comunicar aos órganos representantes do persoal funcionario e laboral de Andalucía e Asturias para que os seus representados poidan VALORAR, de cara aos próximos comicios autonómicos, este exemplo do que pode valer a palabra e as promesas dos líderes e candidatos deste partido e o que poden esperar do seu goberno, como xa o estamos a sufrir en Galiza.