A ministra de Emprego, Fátima Báñez, anunciou a aprobación por parte do Consello de Ministros o pasado venres do Real Decreto 1483/2012 de despedimentos colectivos, que será de aplicación a todo o persoal laboral das Administracións Públicas (non só ao persoal laboral temporal, senón tamén ao persoal fixo por oposición). O dito decreto vén de ser publicado no BOE do 30/10/2012.
De acordo co Título III do dito real decreto 1483/2012, abondaría para aprobar o despido colectivo do persoal laboral nun determinado organismo ou departamento, por causas económicas, a insuficiencia orzamentaria sobrevida e persistente, entendida como a diminución dun 5% do orzamento dun organismo respecto do exercicio anterior, ou do 7% nos dous anos anteriores; mentres que, para aprobar o despido colectivo por causas organizativas, abondaría con xustificar que a externalización do servizo producise unha redución de custos (art. 35.3.b) do RD 1483/2012).
Na práctica, isto permítelle ao Partido Popular, tanto no Goberno da Xunta como a nivel do Estado, producir por razóns políticas as causas que habiliten o despedimento de persoal laboral.
No decreto, por outra banda, nin sequera se garante a preferencia de permanencia do persoal laboral fixo, que será meramente potestativa para o organismo que aprobe o despedimento colectivo no caso do persoal laboral que superase un proceso selectivo (art. 41.1 do RD 1483/2012).
Dada a gravidade extrema desta medida, que constitúe ademais un claro referente para unha hipotética reforma do Estatuto básico do empregado público que remate coa garantía de emprego do persoal funcionario, a CIG-Autonómica anuncia que adoptará todas as medidas posibles a nivel xudicial contra este real decreto e chama a todos os traballadores e traballadoras da Xunta a secundar todas as accións en contra das políticas do Partido Popular e da Troika, que esixen unha mobilización contundente na vindeira folga xeral convocada para o 14 de novembro.
Referencia no web da Moncloa
Descargar o Real decreto 1483/2012, publicado no BOE do 30/10/2012