Na última xuntanza da Comisión Permanente Central de Listas de substitución, o pasado venres 18 de xaneiro, unha vez vistas e tratadas as reclamacións particulares, tratáronse os seguintes asuntos:
- Actualización de méritos
- Acordo de admitir nas listas pechadas as solicitudes de persoas que superasen algunha proba do último proceso selectivo antes da publicación do acto de elección de destino do persoal de novo ingreso.
- Modificación do Decreto 37/2006.
- Guía do Decreto.
Función Pública informa de que a actualización de méritos estará lista para principios do mes de febreiro.
Solicítase aclaración sobre o Acordo de admitir nas listas pechadas as solicitudes de persoas que superasen algunha proba do último proceso selectivo, aínda que non se publicase o acto de elección de destino do persoal de novo ingreso.
Á vista de múltiples reclamacións relativas á admisión nas listas das persoas que superaran algunha proba do último proceso selectivo, pídese unha aclaración sobre a interpretación do acordo. Ata agora utilizábase o mesmo criterio para a admisión nas listas pechadas regulada no artigo 6 do Decreto 37/2006 que para a baremación regulada no artigo 9. Este criterio impedía que se inscribiran nas listas as persoas con algunha proba superada nun proceso selectivo en curso, debendo esperar para presentar a súa solicitude ao prazo de inscrición posterior á publicación do resultado do acto de elección de destino. Revisando o artigo 6 do Decreto 37/2006 compróbase que a excepción para inscribirse nas listas pechadas refírese "as/os interesadas/os que superasen algunha proba do último proceso selectivo", sen establecer limitación algunha ao momento no que se atope dito proceso. Polo que se adopta por unanimidade o acordo de admitir nas listas pechadas as solicitudes de persoas que superasen algunha proba do último proceso selectivo, aínda que non se publicase o acto de elección de destino do persoal de novo ingreso, sen implicar isto ningunha modificación no criterio seguido para o baremo, xa que o artigo 9 a) do Decreto 37/2006 esixe que se puntúe o proceso selectivo unha vez publicado o resultado do acto de elección de destino.
Modificación do actual Decreto.
Unha vez máis preguntamos a Función Pública cando nos vai remitir o borrador para negociar a modificación do decreto xa que hai máis de un ano que estamos esperando. A resposta da Presidenta da Comisión foi que aínda que se trata dun tema prioritario na D.X. de Función Pública e que están traballando no texto, non nos poden dar unha data aproximada de cando nos pasarían dito borrador e cando poderían dar comezo as negociacións. Que, en todo caso, nolo comunicarían no seu momento. Dende a CIG consideramos que xa levamos tempo dabondo esperando polo borrador e esiximos un compromiso e unha data de comezo das negociacións por parte de Función Pública.
Guía do Decreto na páxina web da Xunta.
Preguntamos cal é o motivo de que se retirara a guía da páxina web, xa que hai moito tempo que se retirou para revisar algúns erros e non se volveu a subir. Insistimos na importancia de que volva estar activa para a consulta dos/as usuarios/as na maior brevidade posible. Comprométense a correxir os erros atopados e colgala de novo na web
A próxima reunión da Comisión será o venres 22 de febreiro.
