A CIG-Autonómica quere denunciar perante a opinión pública unha situación que se vén sufrindo no interior do Edificio Administrativo da Xunta de Galicia en Lugo. Se as semanas anteriores eran as altas temperaturas soportadas no interior do Edificio Administrativo, nesta ocasión queremos demandar unha solución inmediata para un problema de fácil amaño se o persoal e os/as cidadáns/ás que se dirixen á Xunta, lle importasen o máis mínimo aos seus dirixentes.

Hai preto dun ano que se comezou a solucionar un problema de electrificación dentro do edificio (problema no que a Xunta ten que refacer o que antes fixo mal) e para isto fanse necesarios uns traballos que requiren mover en determinadas actuacións o falso teito que cobre os lugares de traballo e os lugares reservados para a atención ao público. Pois ben, desde hai ese tempo, o falso teito está retirado en boa parte das instalacións co conseguinte desprendemento de po, partículas en suspensión e no día de hoxe ata auga nun dos andares. Se coas temperaturas que se soportan no edificio administrativo, engadimos que o persoal (toda a xornada) e os/as cidadáns/ás (cando teñen que dirixirse alí) teñen tamén que aturar a continua caída sobre eles destes refugallos, faise máis que comprensivo o enfado destes e destas coa administración.

Tanto desde a Xunta de Persoal como desde o Comité de Seguridade e Saúde, as organizacións sindicais vimos pedíndolle á Delegación Territorial, por escrito e en xuntanzas desde que comezaran as interminables obras, que se limitase a retirada do falso teito ás zonas onde se traballa diariamente, para así minimizar as molestias para todos/as. Pois a Xunta, como é habitual, dá a calada por resposta e non resolve o fácil problema que está a xerar doenzas e proídos continuos nos ollos en varios traballadores e traballadoras. Deste xeito, a única solución que nos dá unha e outra vez é a de buscar solucións fóra do ámbito de entendemento.

Desde a CIG-Autonómica queremos esixirlle á Xunta de Galicia que se solucione dunha vez por todos este problema que vén xerado pola negativa da Xunta a ter cubertos os teitos dos andares do edificio administrativo.