Novas por contido

Constituíndo un xesto de desprezo cara aos miles de traballadores/as non docentes que prestan servizos en centros de ensino, a Consellaría de Educación e OU négase a recibir aos representantes dos traballadores para coñecer a problemática e as demandas do sector.

No pasado mes de xuño as organizacións sindicais CIG, CSI-F e UGT, unha vez que o novo goberno tomou posesión, invitamos á Consellaría a sentarse e establecer un cauce de diálogo permanente co fin de analizar, detectar e resolver as necesidades deste sector cara a prestar un mellor servizo aos cidadáns dignificándoo e valorándoo como parte esencial dun servizo público.


A Consellería, practicando un autismo social impropio do século XXI, declinou a invitación cun silenzo.

Queremos lembrar que a Administración adquiriu o compromiso de establecer vías de diálogo para tratar diversas materias pendentes e que os compromisos están para cumprirse.

Salientamos tamén a desafección de CCOO, que racha á unidade sindical alegando que os problemas dos centros de ensino son propios dos funcionarios e non do persoal laboral. CCOO propuxo unha táboa reivindicativa única e exclusivamente para persoal funcionario.

CIG, CSI-F e UGT, esixímoslle á Consellaría de Educación e OU a apertura inmediata de negociacións porque así o reclaman os/as traballadores/as non docentes, porque a negativa faría perigar a prestación dun servizo público, e porque a negociación é un imperativo moral.


PLATAFORMA REIVINDICATIVA PARA OS CENTROS DE ENSINO


1. Protocolización de procedementos e funcións do persoal dos centros. Esiximos a inmediata negociación, como primeiro paso, dun 'protocolo de apertura e funcionamento ordinario dos centros’ que debe recoller inescusablemente a obrigatoria presenza dun responsable sempre que os centros estean funcionando así como os criterios para a aplicación dos servizos mínimos en caso ausencia masiva de asistidos (art. 20 do V Convenio), para as xornadas con horario diferente ao habitual do centro e para a aplicación do horario de verán.
2. Integración dos actuais efectivos do grupo E no C2 e estabelecemento dun maior nivel para os subalternos dos centros de ensino en tanto que queden nos centros de ensino.
3. Xeneralización do incremento retributivo no complemento específico para os postos con horario especial; actualización e aumento progresivo desta compensación até alcanzar os 244,80 €/mes; aplicación da mesma compensación ao persoal laboral. Queremos facer extensivo este punto a todos os traballadores da Xunta con horario especial a través dunha negociación global.
4. Revisión das ratios de limpeza e do persoal de cociña dos centros.
5. Estabelecemento dun complemento de itinerancia e apertura dunha negociación sobre os mecanismos para a adxudicación de novos destinos en itinerancia.
6. Recoñecemento do complemento de perigosidade ao persoal laboral de cociña.
7. Recoñecemento do complemento de penosidade ao persoal laboral de limpeza.
8. Definición dos criterios para o estabelecemento de xefaturas de secretaría e para a fixación dos cadros de persoal (especialmente no caso dos subalternos).
9. Acordo en materia de seguridade e saúde laboral nos centros de ensino.
10. Acordo sobre dereito á formación (recoñecemento dun crédito horario anual mínimo para a formación en horario laboral e, en paralelo, estabelecemento dun dereito de compensación horaria cando a formación sexa en horario non laboral). Se ben un acordo desta clase debería ser para toda a Administración, a consellaría pode e debe aprobar instrucións neste sentido de aplicación nos centros.

Descarga aquí a folla informativa.

CIG         CSI-F          UGT

Outras novas recentes

Venres, 24 Outubro 2025

A CIG reclama unha suba do 5% para o persoal empregado público e unha cláusula de garantía salarial vinculada ao IPC

A Área Pública da CIG (Administración, Ensino e Saúde) vén de iniciar a recollida de sinaturas da Proposición Non de Lei (PNL) para blindar por lei a revalorización salarial na administración xeral, o ensino e a sanidade  A Área Pública da CIG  compareceu en rolda de prensa este luns para reiterar as demandas para garantir a recuperación da capacidade adquisitiva do...
Luns, 27 Outubro 2025

Fondo de Acción Social do ano 2024: listaxe definitiva de axudas aprobadas e denegadas

No DOG do 27/10/2025 publican a RESOLUCIÓN do 17 de outubro de 2025, da Dirección Xeral de Emprego Público e Administración de Persoal, pola que se anuncia a exposición das listaxes definitivas de axudas aprobadas e denegadas dos criterios de repartición do Fondo de Acción Social do exercicio económico 2024, relativos á axuda para a atención de persoas con discapacidade....
Xoves, 23 Outubro 2025

Resumo da Comisión de Seguridade e Saúde Laboral da Consellaría do Mar

Na xuntanza da Comisión de Seguridade e Saúde laboral da Consellaría do Mar, celebrada o pasado 16 de outubro tratouse a problemática do radón, os resultados das avaliacións de risco (AR) de varios servizos, a necesidade de formación en condución segura así como aspectos relacionados coa roupa de traballo. Medicións de Radón. Das medicións levadas a cabo nos centros da...