Novas por contido

A consellaría de Economía e Industria puxo enriba da mesa unha proposta de modificación da relación de postos de traballo (RPT) da Axencia Galega de Innovación (GAIN) na que propón a creación de 2 novos postos de persoal directivo (Director/a da Área de Servizos e Director/a da Área de Centros) e a conversión dun posto de persoal funcionario noutro posto de directivo adicional (Director/a da Área de Programas).

Con estes dous novos postos de persoal directivo, a Xunta vai detraer do orzamento dedicado ao I+D+I ao redor de 200.000 euros anuais*. Por outra banda, a opacidade do financiamento deste gasto é total e absoluta xa que a consellaría se nega a facilitarnos a memoria económica.

Dende a CIG temos sospeitas fundadas de que a creación destes dous novos postos de persoal directivo é froito da “necesidade” de colocar a parte do ex-persoal directivo próximo ao Partido Popular que provén da extinta Fundación para o Fomento da Calidade Industrial e Desenvolvemento Tecnolóxico de Galicia, un dos cales xa traballou no pasado no Gabinete de Industria do goberno Fraga.

A figura do persoal directivo resulta polémica non só polo seu custo senón polo feito da súa escasa regulación (art. 79 da LOFAXGA) que permite poder engordar a Administración de xeito discrecional sen mecanismos obxectivos que garantan o coñecemento da materia e o funcionamento da Administración pública.

A creación deste tipo de postos cuestiona a manida austeridade da que o goberno do PP fai gala continuamente. Mentres máis de 1.200 mozas e mozos investigadores do noso país emigraron nos últimos dous anos, non lle importa a Xunta detraer cartos do exiguo orzamento do I+D+i galego para crear postos de designación política. Ao tempo, con esta proposta tamén pon en dúbida a capacidade das traballadoras e traballadores públicos dispoñibles que semella que non están cualificados para asumir tarefas de responsabilidade e dirección.

Este é o modelo de administración que propugna e defende o goberno da Xunta de Galiza , unha administración corrupta, non ao servizo da cidadanía, senón ao servizo dos intereses dos amigos.

*Custo persoal directivo nivel 2 dun ente do grupo 3: 49.455,82 € /ano (sen antigüidade)+30% custos sociais =64.292,57 € * 3 persoal directivo = 192.877,70 € /ano

Outras novas recentes

Xoves, 19 Novembro 2026

O sector dos coidados e a atención ás persoas en loita!

As traballadoras do sector de coidados e atención denuncian a precariedade da súa situación laboral e dos servizos que se prestan desde a Consellería de Política Social e a Consellería de Educación. Centos de manifestantes marcharon en Santiago de Compostela o sábado 14 de novembro, reclamando a creación dun Servizo Público Galego de Atención ás Persoas que garanta servizos...
Venres, 13 Novembro 2026

RPT Emprego, Comercio e Emigración (11/11/26)

A Consellería de Emprego, Comercio e Emigración, convocou aos sindicatos a unha xuntanza para falar da súa proposta de modificación da Relación de Postos de Traballo da consellería. Descargar Contactamos coa consellería para pedir explicacións polo feito de que nos convocasen con menos de 48 horas de antelación (restando a xornada de Folga Xeral), o que imposibilita estudar...
Venres, 13 Novembro 2026

Agacal, Gain e Intecmar quedan para a seguinte OEP de funcionarización

A directora xeral de Emprego Público comunicounos na Mesa Xeral do 10 de novembro de 2026 que o persoal de AGACAL, GAIN e INTECMAR quedará para a seguinte OEP de funcionarización (para a cal non teñen data) porque aínda non está integrado. A integración é un requisito previo para que o persoal que o desexe poida funcionarizarse. Sen convocatoria á CIG para as negociacións...