A pesar da palabrería enganosa, da falta de transparencia ao non facilitar nin o texto aprobado no Consello da Xunta da nefasta e LEPG, nin de explicar onde se recolle nos Orzamentos Xerais o que supostamente nos van devolver (que non é máis que o que gañamos nos tribunais), o que realmente se desprende das declaracións deste feirante acuciado polas urxencias electorais é o seguinte:

1. Que o Goberno confirma que no 2015 seguiremos sen cobrar as extras, a diferencia do persoal do resto de Administracións.
2. Que nos anos 2016 e 2017 tamén nos recortarán unha porcentaxe importante das nosas extras.
3. Que se negan a devolvernos o detraído nos anos 2013 e 2014.

E como intentan vender isto? Pois dicindo que nos van devolver a extra do 2012, debido a cantidade de sentencia perdidas nos tribunais, pero e as extras do 2013 e do 2014 van devolvelas? NON.

E tamén nos contan que nos van restituír homeopáticamente a integridade das extras ata chegar ao 100% no 2018. Un xeito cínico de dicir, que a diferenza do que aconteza na Administración do Estado e noutras, aquí, imos permanecer coas extras recortadas tres anos máis mentras o resto de empregados/as públicos/as cobra a totalidade.

Un xeito moi bo de presentar a botella medio chea, cando a realidade é un trienio de recortes.

Pero este xeito cínico de presentar os recortes como algo atenuado non é casual. SABEN QUE TEÑEN PERDIDO O VOTO DAS/OS EMPREGADAS/OS PÚBLICAS/OS e queren recuperalo.
Para eles é moi importante pois as enquisas tanto para as eleccións locais de maio de 2015, onde perden en todas as grandes cidades, retrocedendo moito onde hai unha maior proporción de empregadas/os públicas/os, como para as Xerais do 2015 e as Autonómicas do 2016 os colocan fora dos ámbitos de poder.

As mobilizacións destes anos VALERON para contribuír a formar un polo contra as políticas de recortes, para que ningún empregado/a público/a asuma xa pasivamente os recortes, para axudar a saber que non contan co respaldo dun sector importante da poboación galega e que non lles vai ser fácil recuperar, nin sequera nos votantes tradicionais.

Agora perciben que a mobilización dos empregados/as públicos/as contribuíu a modelar un cambio político emerxente na sociedade. Por iso é importante que non nos creamos as súas mentiras, que revelemos os seus eufemismos. Non nos van pisar.