A CIG-Autonómica vén de presentar un conxunto de propostas para a mellora da xestión da extinción de incendios forestais na Galiza e das condicións laborais do seu persoal, logo da vaga de lumes de 2025 e ante a inacción da Xunta, que continúa sen convocar ningunha mesa de negociación.
O documento, que xa foi remitido aos grupos parlamentarios do Parlamento de Galiza, recolle medidas básicas urxentes e estruturais que abranguen desde o planeamento preventivo e o dimensionamento do persoal, ata a seguridade laboral, a estabilidade e o cumprimento da normativa vixente.
As principais propostas:
1. Planeamento
• Negociación anual do PLADIGA e dun plan de formación.
• Actualización dos plans de prevención e defensa dos distritos forestais, abandonados desde 2009.
• Reforzo da coordinación institucional e recuperación de brigadas de bombeiros/as nos espazos naturais protexidos.
• Desdobramento de brigadas (coa contratación dos XB necesarios) con xornadas de 10 horas e presenza durante todo o ano.
• Análise dos ratios por provincia e superficie de monte e co fin de ter un dimensionamento adecuado do cadro persoal do SPIF e apertura das casetas de vixilancia pechadas.
• Avanzar cara a un servizo público 100%, eliminando contratas privadas.
• Posta en marcha dun plan de educación ambiental e dun plan de recuperación dos montes queimados.
2. Xestión do persoal
• Contratación anticipada e con transparencia, recuperando a comunicación sindical dos chamamentos.
• Formación inicial obrigatoria e retribuída.
• Procesos selectivos anuais e adaptados aos períodos de risco de incendios. Concurso-oposición 40/60.
• Dignidade e igualdade salarial e pagamento dos complemento a mes vencido.
• Activación da segunda actividade por idade.
• Eliminación de convenios con concellos e empresas privadas para a extinción
• Creación dun concurso de traslados permanente.
3. Condicións laborais
• Estender o Acordo do SPIF ao persoal laboral.
• Transformar o persoal fixo-descontinuo en fixo, ampliando a 12 meses.
• Elaboración dun protocolo de mobilidade e pernocta e compensacións.
• Revisión dos niveis profesionais e convocatoria periódica das comisións de seguimento.
4. Xubilación anticipada
• Aplicación de coeficientes redutores e aboamento de cotizacións adicionais se for preciso.
• Axilización dos trámites, acompañamento e guía informativa para o persoal.
• Inclusión do persoal técnico e vixiante-emisorista no recoñecemento de coeficientes.
5. Seguridade e saúde laboral
• Seguimento das enfermidades profesionais e riscos derivados do traballo nos lumes no especial os derivados dos tóxicos carcinoxénicos, musculoesqueléticos e respiratorios.
• Control e transparencia nos accidentes laborais.
• Probas previas dos EPIs e materiais antes da súa distribución. Limpeza e desinfección áxiles.
• Avaliación e atención dos riscos psicosociais e das secuelas emocionais dos incendios.
Compre diálogo e un servizo público real
A falta de negociación e planificación por parte da Xunta é unha grave irresponsabilidade, especialmente despois da vaga de incendios de 2025. O persoal reclama unha revisión integral do modelo de extinción, con medios e persoal propios, condicións laborais dignas e garantías de seguridade.
👉 Podes consultar o documento completo das propostas aquí:
Estas son unhas propostas básicas que xuntamos con todas as cuestións pendentes máis se queres facer algunha achega contacta coa CIG.