A CIG obtivo unha nova sentenza favorábel sobre a obriga da Xunta de Galiza de aboar a parte devengada da eliminación das pagas extras do ano 2013. Despois doutra sentenza no mesmo senso que llo recoñeceu ao persoal docente esta nova sentenza recoñece para o persoal da administración xeral a obriga da Xunta de pagar a parte devengada no ano 2013 e que foi , como se demostra, ilegalmente retida pola administración galega.
Esta nova sentenza ven sumarse a outras que gañara tamén a asesoría da CIG sobre a paga extra do ano 2012 que sumadas a outras obtidas no resto do estado obrigaron tanto ao goberno central como á Xunta a rectificar e pagar o diñeiro do que se apoderaran no ano 2012, aínda que no caso galego é a prazos.
Esta sentenza demostra que a Xunta de Galiza actúa co seu persoa cun comportamento absolutamente antidemocrático e nada respectuoso, xa que o goberno galego era plenamente consciente de que a xustiza, que xa recoñecera en varias ocasións o dereito á percepción da paga do ano 2012, ía recoñecer o mesmo dereito para a correspondente ao ano 2013.
A CIG xa reclamou na Mesa Xeral de negociación á xunta para que pagase a parte da extra de xuño do ano 2013, á vista das sentenzas que houbera polo caso, exactamente igual, da extra do 2012, porén o goberno galego xa desde que se coñeceron as primeiras sentenzas fixo caso omiso e non fai máis que mirar para outro lado presentando recursos de casación para paralisar o maior tempo posíbel o pagamento, aínda que saben perfectamente que ao final terán que facer o pagamento.
A actitude negativa e obstrucionista ás sentenzas da Xunta o que fai é encarecer máis para as arcas públicas o resultado da súa pésima xestión deste asunto, xa que a condea ao pagamento do diñeiro que lles deben aos traballadores vai ligada ao pagamento dos xuros desde o momento en que debeu ser pagada até o momento do pagamento final co que a factura total será moito maior para as arcas públicas.
Desde a CIG instamos á Consellaría de Facenda e ao presidente da Xunta para que fagan frente ás súas obrigas e lles paguen a todos os seus traballadores esta débeda que unha vez máis é recoñecida polos tribunais de xustiza.