A CIG vai comezar unha campaña de concienciación entre o persoal laboral e funcionario non docente que traballa nos centros educativos, paso previo á nosa intención de abrir unha negociación coa consellería motivada polo incremento da conflictividade nos centros.
Para todos, funcionarios non docentes e laborais:
- A campaña de control da saúde do persoal de administración e servizos comeza demasiados meses despois de rematar a dos docentes, como se a nosa vida valese menos.
- Posta en marcha de métodos de control horario e cambios organizativos sen dar conta aos órganos de representación do persoal (a CIG exerce a presidencia e secretaría do Comité de Empresa e da Xunta de Persoal).
- Inadecuada inspección e corrección das deficiencias detectadas nas instalacións pola nula vontade de facer funcionar o comité de prevención de riscos laborais.
- Ausencia de persoal directivo en horarios lectivos.
- Utilización da Inspección de Educación para presionar ao persoal de administración e servizos.
- Non se cubren as baixas co que esto supón en servizos atendidos por unha ou poucas persoas. Non se cubre nin un só posto de media xornada.
O persoal laboral necesita discutir:
- A ratio de metros de limpeza ten circunstancias a considerar (taller, follaxe, lama ..).
- O cambio de categoría profesional do persoal oficial 2ª de cociña, pois gañamos todas as sentenzas.
- Nalgúns centros a directiva ten a tentación de crer que o persoal coidador son criados para todo, esquecendo que teñen asignados alumnos e alumnas concretas con necesidades especiais.
- Aplicación ao persoal laboral que ocupa postos de ordenanza ou auxiliar administrativo das melloras retributivas dos funcionarios do acordo conquerido no ano 2008.
O persoal funcionario ten que solucionar:
- Deficiente formación nos métodos de traballo. Nula planificación (prazos axustados, novas axudas para libros, LOMCE..).
- Horarios ao libre albedrío da dirección con criterios diferentes en centros idénticos. Ata abrir o centro os subalternos os domingos. Atrancos á constitución da comisión de seguimento do acordo do 2008 para solucionar conflitos de horarios.
- Falta de respecto polo preaviso regulado no acordo do 2008 para os casos de cambios de horarios.
- Indefinición de funcións, chegando ao absurdo de que a mesma tarefa fana docentes, subalternos ou auxiliares, segundo o centro.
- Utilización do persoal administrativo para a xestión dos comedores escolares cando os directores cobran por esa tarefa.
Se tes algunha queixa ou suxestión que consideres debamos incorporar, contacta coa CIG.