Novas por contido

A CIG denuncia que a Administración segue sen implementar melloras na prevención e na seguridade do persoal de extinción

O xulgado do Social número 3 de Lugo vén de emitir sentenza pola que condena a Consellaría do Medio Rural pola ausencia de medidas de prevención na extinción dun incendio no Concello de Guntín no ano 2015 que lle custou a vida ao axente forestal Enrique Casanova.

O xulgado considera que a Consellaría non actuou de forma dilixente na protección da saúde deste traballador que faleceu dun infarto cando acudía ao aviso dun lume. Cómpre lembrar que os e as axentes forestais traballan en solitario o que impide, tal e como se subliña na sentenza, unha asistencia inmediata "que é vital en casos como os dun infarto". A resolución destaca tamén o feito de que Enrique Casanova xa sufrira anos atrás unha cardiopatía, polo que tiña solicitado á Administración pasar a unha segunda actividade, atendendo ás recomendacións médicas e dado o estrés e as situacións de risco ás que se ven expostos estes traballadores e traballadoras.

Porén, a Consellaría do Medio Rural nin atendeu a súa petición nin lle fixo tampouco os recoñecementos médicos periódicos obrigatorios -e específicos na súa condición de especial sensibilidade-, malia telos solicitado o propio axente. Agora o xulgado recoñece a responsabilidade da Xunta neste accidente, incidindo en que "non se pode considerar que a Consellaría actuara de forma dilixente na protección da saúde do traballador".

A raíz deste suceso, a CIG demandou unha investigación para aclarar os feitos e presentou denuncia na Inspección de Traballo, que emitiu varios requirimentos e advertencias a Medio Rural para a mellora das medidas preventivas na extinción dos incendios forestais e a salvagarda da seguridade e a saúde dos traballadores/as que participan nestas tarefas.

Medio Rural segue sen mellorar as medidas de prevención e de seguridade

Disto hai xa case catro ano e, non obstante, neste tempo a Consellaría non adoptou ningún tipo de medida para garantir a seguridade do seu persoal. A día de hoxe non temos plan de prevención, nin protocolos adecuados de evacuación nos incendios. Neste senso, o pasado venres houbo un accidente no lume do Boiro, pero como a ambulancia non conseguiu chegar até o lugar, houbo que improvisar no momento como trasladar a persoa ferida.

A CIG leva anos demandando da Consellaría do Medio Rural a implantación de plans e protocolos para afrontar este tipo de situacións de risco, que no caso de Enrique Casanova foi especialmente relevante ante a evacuación desastrosa (así cualifica o informe da Inspección) que se produciu. De igual xeito, a central sindical reclama que se evite o illamento do persoal que participa nos incendios e que, como mínimo, se traballe en parella e non en soidade como ocorre cos/as axentes forestais, condutores/as de motobomba ou persoal técnico.

Doutra banda, a CIG pide que se dispoña de servizos sanitarios desprazados nos incendios forestais para garantir unha rápida e eficaz asistencia médica. E por suposto, que se cumpra coa avaliación de riscos e se teña en conta a saúde do persoal en relación co posto que desempeña, contemplando unha segunda actividade para aqueles traballadores e traballadoras con antecedentes de saúde incompatíbeis cos labores de extinción.

Desde a CIG levaremos este sentenza e os puntos que se resaltan nela aos comités de seguridade e saúde de Medio Rural e Extinción de Incendios para que se melloren as medidas preventivas na extinción e se eviten situacións futuras como as acontecidas no accidente do compañeiro Quique Casanova.

Outras novas recentes

Venres, 22 Marzo 2024

Prazas para elección de destino Agrupación profesional-Subalterno (22/03/24)

A Dirección Xeral de Función Pública achega un listado de prazas que ofertará para a elección de destino do proceso selectivo da agrupación profesional - subalterno. A localidade dos postos pode verse no código que vai nas posicións 11 a 15 do código (XX.XXX.XX.XXX.XXXXX.XXX) No mesmo arquivo que poñemos a túa disposición para descargar, vai tamén a RPT íntegra con todos os...
Mércores, 20 Marzo 2024

Procedemento de acreditación dos méritos do concurso-oposición de estabilización dos subgrupos A1, A2, C1 e C2 e grupos I, III e IV

No DOG do 20/03/2024 publican: - RESOLUCIÓN do 13 de marzo de 2024, da Dirección Xeral da Función Pública, pola que se fai público o procedemento para a acreditación dos méritos de determinados procesos selectivos extraordinarios de estabilización derivados da Lei 20/2021, do 28 de decembro, para o ingreso, pola quenda de acceso libre e mediante o sistema de...
Xoves, 21 Marzo 2024

Reunión do Comité de Seguridade e Saúde Laboral de Política Social

Riscos para a saúde moi elevados nas escolas infantís O venres tivo lugar unha nova xuntanza do Comité de Seguridade e Saúde Laboral de Política Social, no que estaban presentes os representantes das consellería de política social, servizo de prevención propio da Xunta, servizo de prevención alleo (Qualtis), representantes do Consorcio e delegadas e delegados de prevención...