Novas por contido

Un ano tras outro algunhas directivas de centros de ensino poñen dos nervos a compañeiras e compañeiros que se ven sometidos a caprichos, chantaxes ou caramelos para que abran o centro e atendan oposicións de docentes, cursos de CEFORE, probas de CELGA, xornadas da consellaría de traballo e xornadas de votacións políticas.

Atopámonos moitas veces estas preguntas de “se teño a obriga de atendelos, porque me dí o dire que o teño que facer por ser no centro onde traballo…”.

Pois non, non tes obriga. Son traballos voluntarios, non poden impoñelos. De feito está regulado o seu cobro en dietas se te ofreces voluntario. E se alguén cho quere impoñer, esixe a orde por escrito. Se se negan a dar a orde por escrito e non hai testemuñas da orde verbal, a orde non existe. Si hai testemuñas, fai constar ti por escrito que recibiches a orde (indica por escrito quen é a testemuña e rexistra o escrito). Todo por se hai que actuar diante do xulgado (primeiramente podemos tentar falar coa Xefatura Territorial).

A consellería ten regulado o cobro por prestar servizos "extraordinarios" salvo nos procesos electorais que debería correr á conta da Xunta Eleitoral; o sentido común xa nos di que estamos a falar de colaboracións voluntarias. Se non hai ninguén do centro que o queira facer, terán que buscar a colaboración en xente de fóra do centro. Ti podes negarte.

Temos visto de todo: bautizos masivos de relixións diversas, coidado do gando do señor director, abrir os domingos para botar un partido, gravacións de películas, cursos dos concellos. Case sempre contarán coa complicidade do director/a que endosará a apertura do centro ao persoal subalterno, e a limpeza ao persoal propio. Unhas veces cobrando, outras non. Eles cómense o marrón; o director ou directora aparecerá cando lle pete, se é que aparece.

Todos eses "servizos extraordinarios", incluída a apertura e limpeza dun centro para cursos, oposicións ou xornadas de votación, son engadidos que nada teñen que ver co traballo polo que che paga a consellería. O director ou directora acepta pola súa conta e risco que se celebre o evento no centro, seguramente recibindo a cambio algún tipo de emolumento (ás veces tamén llo impoñen dende a xefatura territorial), e logo endosa o chollo a outros/as. Con frecuencia xerando un conflito entre compañeiros/as.

Tanto ten, estamos na mesma: dende a voluntariedade para facelo ou non, cada quen terá que valorar se o que lle pagan compensa o traballo.

No caso do persoal subalterno, recomendamos botar unha lectura á Resolución da Secretaría Xeral da Consellería de Educación publicada no DOG do 06/02/2009, pola que se lle dá publicidade ao acordo entre esta consellería e as organizacións sindicais sobre a xornada de traballo do persoal subalterno e sobre as retribucións do persoal subalterno e auxiliar administrativo que presta servizos nos centros educativos dependentes da Consellería de Educación e Ordenación Universitaria. Por subliñar algunha idea:

  • O teu horario de traballo forma parte do DOC. Tes dereito a coñecelo.
  • A túa xornada semanal máxima é de 37:30 horas de luns á venres. Non vale o conto de que tés que abrir un sábado ou domingo ou que o fagas de menos queda a deber (e xa a dirección che dirá cando o fas). Tampouco vale que che asignen traballar un día máis de 7,5 horas.
  • Tes dereito a descansar un mínimo de 12 horas entre quendas.
  • A xornada de traballo ten que ser negociada co persoal afectado.
  • Poden cambiarte a xornada un máximo de dez dias por curso académico, avisandote con sete días naturais de antelación. Ten que ser por unha causa xustificada como celebración de claustros, probas ou avaliacións.
  • Co curso académico comezado, non poden modificarte a xornada e horarios.

Se a cousa se torce, podemos tentar falar coa dirección ou coa xefatura territorial. Ti decides. Contacta coa CIG.

Outras novas recentes

Venres, 20 Xuño 2025

Caótica xestión da Xunta de Galiza na residencia de Taboadela: diñeiro público malgastado e atención precaria

Dende a Confederación Intersindical Galega (CIG) erguemos a voz unha vez máis para denunciar a situación crítica do Centro de Maiores de Taboadela, do Consorcio Galego de Servizos de Igualdade e Benestar e a "actitude irresponsable e despilfarradora" da Xunta de Galiza. A Administración Autonómica mantén a persoal na casa cobrando sen traballar, mentres que nas instalacións...
Luns, 16 Xuño 2025

É a Xunta de Galiza un espazo seguro para as mulleres?

Despois da denuncia por presunta agresión sexual do conselleiro Alfonso Villares, descubrimos varias cousas.     A primeira é que o seu homónimo, Alfonso Rueda, sabía dende hai meses da existencia da denuncia sobre o seu home de confianza. A segunda, que o presidente de todas as galegas prefire darlle unha aperta a un presunto agresor (os tribunais determinarán se o é ou...
Venres, 13 Xuño 2025

A CIG mobilizarase se o persoal fixo procedente do Consorcio queda fóra do concurso de traslados das escalas sociais

A CIG ESIXE QUE EMPREGO PÚBLICO RECÚE E QUE O PERSOAL FIXO DO CONSORCIO POIDA PARTICIPAR NO CONCURSO DE TRASLADOS DAS ESCALAS SOCIAIS  A uns días de celebrarse a funcionarización do personal laboral fixo procedente do Consorcio, o vindeiro 5 de xullo, a Dirección Xeral de Emprego Público rompe os compromisos acadados e decide deixar fóra do Concurso das escalas sociais a...