A CIG-Autonómica denuncia a decisión política consciente da Xunta de perpetuar as comisións de servizos establecendo unha ocupación provisional estrutural e “a dedo” dos postos de funcionarios/as con responsabilidade.

Na CIG-Autonómica denunciamos o bloqueo da Xunta de Galiza ao non convocar os concursos específicos. Entrado xa o ano 2026, supérase amplamente a década de parálise administrativa, unha situación que afecta, cando menos, a 790 postos de traballo das distintas consellarías e órganos da Administración autonómica.

O concurso específico é un procedemento de provisión de postos previsto na Lei 2/2015 do Persoal Empregado Público da Xunta de  Galiza para aqueles postos que “requiren unha valoración detallada de méritos e capacidades”. Porén, tal e como vimos advertindo dende o inicio, o modelo deseñado pola Xunta introduce un elevado compoñente subxectivo —como a entrevista persoal— convertendo na práctica o concurso específico nunha libre designación encuberta, personalizable e estable durante cinco anos.

Sen concursos específicos bloquéanse os postos para os concursos ordinarios

Aínda así, e malia a oposición expresa da CIG a esta forma de provisión, o feito de que estes postos figuren nas relacións de postos de traballo e non se convoquen os correspondentes concursos específicos, provoca un mecanismo estrutural de retención de postos, ao manterse unha ocupación prolongada mediante comisións de servizos, moitas delas de duración inxustificable e claramente contraria ao carácter excepcional que lles atribúe a normativa. 

Esta situación xera un grave efecto de bloqueo en cadea, xa que moitas das persoas que ocupan actualmente estes postos de concurso específico teñen outro destino en propiedade, que permanece reservado mentres desempeñan o posto provisional. Isto supón que un único nomeamento, pode estar bloqueando dous postos simultaneamente. 

“Esta realidade xa a vimos, por exemplo, nas tomas de posesión dos procesos selectivos de enxeñarías, onde non chegaban as prazas ao existir postos bloqueados, así como na perversión dos concursos de traslados de escalas especiais (enxeñarías, ciencias, arquitecturas..), nos que se “gardaban” numerosas prazas, como se existisen funcionarios e funcionarias de primeira e de segunda”

Escoller entre o menos malo ou o pior

Cómpre lembrar que, unha vez que xa existe un modelo de bases, a convocatoria dos concursos específicos depende exclusivamente das consellerías. Aínda que este modelo non conta co noso aval, é preferible o concurso específico ao bloqueo e á perpetuación “sine die” de comisións de servizos a dedo. Non existe, xa que logo, ningunha escusa técnica nin legal para manter este bloqueo: trátase dunha decisión política consciente.

Ou que convoquen XA ou que pasen os postos a concurso ordinario.

Por este motivo, vimos de rexistrar escritos en todas as consellerías e órganos afectados, solicitando formalmente a convocatoria inmediata de todos os postos que deben ser provistos mediante concurso específico. Ou iso, ou que muden as relacións de postos de traballo e que eses postos de concurso específico pasen a concurso ordinario. 

Dende a CIG-Autonómica non imos permitir que o concurso específico se consolide como unha ferramenta discrecional, nin que se siga utilizando a provisionalidade como norma xeral. Esiximos transparencia, a convocatoria inmediata dos concursos e o respecto aos dereitos do persoal empregado público.