O martes día 8 de setembro de 2020 a Dirección Xeral de Defensa do Monte informounos da situación de contaxios no SPIF e da súa proposta de melloras a engadir aos actuais protocolos Covid.
A valoración xeral por parte da Consellería é que as cousas van “razoablemente ben”, xa que ata o de agora non houbo casos de transmisións no ámbito laboral e non consideraron necesario convocar os CSSL.
Dende a CIG achegamos diversas cuestións. A primeira delas é que esta xuntanza tiña que vir necesariamente precedida pola convocatoria dos CSSL laboral de Medio Rural e de incendios (os delegados de prevención destes comités tiñan que ter sido informados de todas as incidencias e actuacións que foron xurdindo), e coma non foi así, agora teñen que ser convocados inmediatamente. Ademais, trasladamos outras achegas para a mellora da seguridade do persoal (a maioría das cales xa solicitaramos por escrito con anterioridade):
- Implantar as quendas de 10 horas de cara á reducir a presenza simultánea de persoal nos puntos de encontro.
- Organizar grupos de traballo o máis estancos posibles. Para isto é básico o binomio brigada-motobomba.
- Establecer unha hixienización exhaustiva unha vez por día(a maiores das medidas de limpeza e desinfección establecidas nos protocolos).
- Implantar un procedemento de actuación no caso de contaxio ou sospeita único, igual e fiable para tódolos casos(independientemente da actuación preceptiva por parte do SERGAS).
- Artellar un sistema de limpeza dos EPIs para que o persoal non os teña que levar á sua casa.
- Subministro de máscaras reutilizables de FFP2 para todo o persoal.
- Minimizar a presenza de efectivos nos centros de coordinación.
- Eliminar as entregas masivas de material individualizado que se produce nalgún distrito.
- Establecer un sistema de ventilación natural axeitada tanto nas instalacións coma nos vehículos(neste caso a nosa proposta é a apertura dunha xanela dos asentos dianteiros e a contraria dos traseiros)que favoreza a óptima circulación do aire.
- Aplicacións dos protocolos para todo o persoal que intervén na extinción (Concellos , GES , etc).
Por parte da Dirección Xeral de Defensa do Monte trasladaronsenos as seguintes cuestións:
- Queren implantar protocolos de aireación nas instalacións.
- Van corrixir as eivas e entregarlle máscaras a todas as categorías do SPIF.
- Están a procurar algunha alternativa de suministro de mascarillas reutilizables FPP2 debidamente homologadas.
- Queren poñer en marcha un sistema de desinfección exhaustiva a maiores das xa establecidas nas instalacións do SPIF( dando formación a persoal propio).
- Están colocando módulos de instalación nos puntos de encontro onde se use a instalación común de descanso por máis de 5 brigadas en total(ou 3 de xeito simultáneo).
Dende a CIG alegrámonos de que non haxa contaxios no ámbito laboral e compartimos as medidas que se van a adoitar. Porén, considerámolas insuficientes, xa que ignoran moitas das alternativas para evitar contaxios ou minimizar o número de corentenas preventivas que poden afectar á operatividade e efectividade do SPIF.