Para a súa elección de destino, que será provisional, retira prazas aplicando uns criteriois que a CIG non comparte. Función Pública non chegou a dar resposta ás últimas alegacións presentadas pola CIG.

As persoas que superaron os procesos selectivos de camareiro/a-limpador (acceso libre e promoción interna), e auxiliar de enfermaría (promoción interna), están convocadas a escoller destino. A Dirección Xeral de Función Pública publicou no DOG do martes 2 de marzo o listado de prazas que van a estar dispoñíbeis para a elección.

A Xunta xa nos ten acostumados/as a actuar con criterios que varían segundo lle conveña, e unha vez máis tivemos que dar a paliza para coñecelos. Finalmente os criterios comunicados deixan postos fora da elección:

• Prazas ocupadas por persoas indefinidas non fixas que aprobaron o proceso selectivo: non entendemos as razóns para excluír estas prazas, xa que van a quedar vacantes e sen ocupación.
  
  
• Prazas ocupadas en adscrición provisional: son postos vacantes, e as persoas que as ocupan son titulares doutros postos.
  
  
• Prazas de fin de semana ou fixas-descontinuas: probablemente non sexan do interese da maioría do persoal, pero nunca se sabe. A xente é maiorciña para decidir.
  
  
• Prazas propostas a amortizar: se existen en RPT, que as oferten.
  
  

Por se non chovera abondo dende que se ofertaron as prazas fai seis anos (2016), o destino ten que ser provisional por mor da negativa da Xunta a non convocar máis concursos de traslados de persoal laboral, coa complicidade de CCOO e UGT.

Quedan moitas dúbidas non resoltas: cando será o destino definitivo? Porque se non teñen interese de convocar concurso de traslados, tememos que a cousa vai ir para moi longo, unha vez resolto o futuro proceso de funcionarización. Evidentemente a CIG defende que se convoque un concurso de traslados previo como persoal laboral. Pero nin Xunta, nin CCOO nin UGT pensan igual.

A ineptitude de Educación impide ofertar prazas

Existen numerosos postos vacantes de camareiro/a-limpador/a na Consellería de Cultura, Educación e Universidade que, por estar fora da RPT, non poden ser ofertados.

Non é algo novo que Educación poña en marcha un centro coa dotación de recursos humanos que considera necesario, ou simplemente incremente o cadro de persoal dun centro xa existente, pero esquece o trámite de negociar, aprobar e publicar os postos na súa Relación de Postos de Traballo, ata pasados varios anos (a última RPT é do ano 2015).

Xa vivimos esto nalgún caso con postos do persoal funcionario. Así foi, por exemplo, no IES o Barral ou o IES de Soutomaior. Houbo algún concurso de traslados no que non puideron ser ofertados os postos deses centros, porque non existían en RPT. Só os meteron despois de que a CIG presentara escritos que contiñan advertencias xudiciais, pero para os seguintes concursos.

O día 26/09/2019, representantes da CIG asistiron a unha xuntanza con responsábeis de Educación para tratar unha modificación da súa RPT de persoal funcionario. Nesa xuntanza advertimos da necesidade de modificar a RPT de persoal laboral para incluir os postos creados  a partir do ano 2015 pero non incluídos na RPT. O representante da consellería comprometeuse a comezar a traballar na RPT do persoal laboral co fin de regularizar a situación dos postos ficticios. Así o testemuña a acta da xuntanza.

Este actuar neglixente e reiterado da consellería causa prexuízo aos lexítimos intereses e dereitos das empregadas e empregados públicos que, neste caso, non poden optar a eses postos vacantes.

A CIG solicitou por escrito a tramitación urxente dunha modificación da RPT de Cultura, Educación e Universidade para incluír a os postos existentes e dotados que están fora da RPT, para poder ofertar os mesmos na oferta de destino. Educación non fixo nada, así que esiximos o cese das persoas responsábeis.