CCOO e UGT levan dende marzo anunciando un “inminente acordo” sobre melloras na xubilación do persoal funcionario que ao final quedou nun bluf
Incluso recentemente mandaron un aviso a navegantes: “todos e todas pendentes que está ao caer un acordo sobre xubilación parcial”. E resulta que o tan cacarexado acordo non é máis que o enésimo anuncio de que acordaron que “se tramitarán” polo goberno unhas modificacións normativas para permitir a xubilación parcial SEN EXPLICAR EN QUE CONSISTEN .
De entrada hai que saber que a xubilación parcial xa existe na Lei Xeral da Seguridade Social para o persoal traballador por conta allea, e que xa é de aplicación ao persoal laboral das administracións públicas. O que non nos din é que para poder aplicala ten que EXISTIR un acordo entre as organizacións sindicais e, no noso caso, a Xunta. Isto, o acordo Xunta-sindicatos, é algo que xa intentamos en varias ocasións e a Xunta non o aceptou, polo que tememos que se non lle interesa para persoal laboral, todo parece indicar que tampouco vai querer para persoal funcionario.
Non sabemos que máis nos van a seguir contando e a cambio de que pactaron isto, porque na Mesa Xeral de Empregados das Administracións Públicas en Madrid, onde a CIG ten presencia, NON se negociou, pero si o fixeron por detrás para ocultar non sabemos que.
Tamén son salientábeis os silenzos e que non haxa, tampouco, referencias á xubilación anticipada. Ao igual que sucede agora coa xubilación parcial, no caso da anticipada estiveron meses xogando a crear expectativas en diversos colectivos que nin sequera estiveron realmente na súa axenda. Por non falar das eivas da posta en marcha no caso dos axentes ambientais. E hai que lembrar que dende a CIG esiximos a inclusión no sistema de xubilación anticipada, que é independente da parcial, dos Gardacostas de Galiza e demais persoas empregadas públicas que traballan na mar e do sector sociosanitario.
Nós imos seguir loitando para ter un sistema que garanta o dereito á xubilación parcial e anticipada DE XEITO REAL.