O pasado xoves, 27 de marzo fomos convocados para a Comisión de Persoal onde se tratou a modificación da RPT de Política Social e a do consorcio.
Dende a CIG votamos en contra, así como tamén o fixeron o resto de organizacións sindicais con excepción de CSIF que se abstivo, fundamentalmente debido a :
- Non se tiveron en conta as nosas alegacións presentadas.
- Créase un posto de secretario/a A2, opoñémonos á apertura ao grupo A2 do posto de Secretario/a do/a Conselleiro/a.
- Seguen a abrir postos a outras administracións (e sen que teñamos constancia da existencia de reciprocidade) co argumento de que non se dan cuberto, en lugar de abordar e poñer as solucións para que os postos sexan atractivos.
- Estamos en contra de amortizacións de postos, para crear outros, cando todos son necesarios.
- Respecto ao Consorcio, tráense modificacións de requisitos de coordinación Escolas Infantís...pero non se trae unha proposta que iguale os postos ao resto da Consellería.
- Non se aborda un estudio rigoroso da RPT na sua totalidade.
Na rolda de intervencións abordáronse os seguintes asuntos:
1) Postos desaparecidos do concurso de traslados de corpos xerais: 4 persoas de cultura de AP que participaron e os seus postos non aparecen en resultas. Están admitidos? Van a amortizar as prazas? Non sacar o listado de admitidos primeiro xera inseguridade. A directora di que consultarán o asunto.
2) Postos que no concurso de traslados de administración xeral aparecen cunha observación ZZM. Deducimos que non ten relevancia e que é un código interno que non afecta ás condicións dos postos, pero queremos saber de que se trata porque non aparece na lapela explicativa de códigos de observacións, e hai que aportar seguridade ao persoal que concursa. e que se trata. A administración volve a dicir que consultarán.
3) Dende a CIG comentamos que deberían sacar un listado de escalas ás que cando se abra o prazo para a entrega de documentación dos aprobados se lles vaia a esixir o certificado de delitos sexuais. Porque se non o que ocorre é que se presenta a documentación e logo se volve a pedir o certificado, o cal ralentiza os procesos. Din que toman nota.
4) Trienios de persoal laboral que adquire a condición de persoal funcionario: vai a administración a actuar de oficio para que se poidan cobrar os trienios na contía que corresponda á data do seu perfeccionamento? Se non o fai, vai haber algún procedemento para facelo? Vale cun PR004A ou hai outro modo? Esiximos que se abonen a diferenza dende que se adquiriu a condición de funcionario e non dende que ditaron a resolución.
A directora di que non será de oficio porque haberá persoal ao que lles interese a situación contraria (grupos I e II de persoal laboral), polo tanto terá que ser a instancia de parte e a través do PR004. Evidentemente falábamos do persoal dos subgrupos onde a contía do trienio é menor no caso de ser persoal funcionario.
5) Teletraballo: temos constancia de ordes verbais e correos electrónicos de xefes de servizo tratando de restrinxir o teletraballo e alegando que eran ordes “de arriba”. Consideramos que non se poden tolerar comportamentos arbitrarios, sen motivación, que non se ateñan aos protocolos fixados no acordo. Facemos constar que xa solicitamos a reunión da comisión de seguimento para tratar este asunto.
Segundo a DXEP non hai ningunha instrución enviada por parte deles sobre o asunto do teletraballo. Valorarán a nosa solicitude de convocatoria da comisión. Non lles consta que haxa ningún cambio extraordinario na aplicación do teletraballo e intentan xustificar que o que lles comentamos se debe simplemente a que hai cada vez un maior número de solicitudes de teletraballo e que se trata de axustar en cada unidade administrativa as xornadas de teletraballo aos límites do acordo (fundamentalmente ao día da semana de presenza obrigatoria, ao de garantir a presenza do 40% do persoal, ou ao de garantir que non se exceda do 50% dos días mensuais de teletraballo). Queren transmitir que non hai ningún cambio e que o que hai é froito da xestión ordinaria do teletraballo.
