O xoves 8 de maio asistimos á Mesa Sectorial de Negociación do Persoal Funcionario (MSF) onde discutimos a proposta de convocatoria de proceso selectivo para a escala de gardacostas-C1, especialidades de patrón/patroa e mecánico/a.

A CIG comezou a súa intervención queixándose das formas: é inaceptable que nos enviaran a convocatoria para a MSF aínda en prazo de alegacións, de xeito que o prazo de alegar rematou o día anterior á MSF, polo que cuestionamos que lles dese sequera tempo a ler o que quixemos manifestar. A resposta, como non, foi dicir que si lles deu tempo (só recibiron alegacións da CIG e doutro sindicato).

As alegacións que presentamos constan de catro páxinas nas que facemos un relatorio polo miúdo de moitas cuestións que teñen que corrixir. Por centrar a información aquí exposta, poñemos aquí as ideas principais. Se queres información polo miúdo contacta coa CIG:

• Forma de acceso: convocan mediante oposición. A CIG considera que o sistema selectivo idóneo é o concurso-oposición, coa fase de concurso do 40%, recoñecendo así tamén o principio constitucional de mérito. E hai que ter en conta que nestas escalas hai moitas persoas interinas que non van ver recoñecido o seu esforzo e adicación nos últimos anos.
  
  
• Requisitos das persoas aspirantes: a Lei do Emprego Público de Galiza (LEPG), esixe un título profesional determinado. Pero nesta convocatoria engaden un título de técnico superior no previsto na LEPG. A maiores, esixen o permiso de conducir B, caderno marítimo e certificados varios que non están previstos nin na LEPG, nin na Lei 2/2004, nin no Decreto 136/2017. Hai requisitos previstos no RD 269/2022, polo que se regulan os títulos profesionais e de competencia da Mariña Mercante, pero a DXEP non adaptou a LEPG. A xente debe coñecer as esixencias para presentarse ao proceso. A DXEP finalmente di que van a poñer o que di a LEPG. Pero ollo, que para a obtención dos títulos profesionais, as esixencias son as do RD 269/2022.
  
  
• Tempo para a realización do primeiro exercicio: as persoas candidatas teñen o dereito a organizar a súa vida tendo unha previsión de cando serán os exames, así que non nos vale coa redacción de que o primeiro exercicio non será antes dos 6 meses, pois sobran exemplos de procesos que despois pasan a 12 meses. Así que queremos que tamén poñan un máximo, non só un mínimo. A DXEP di que a data xa está publicada por unha información do Consello da Xunta. Pero: 1) unha información do Consello da Xunta non é normas, e 2) xa ten pasado que tentaron mover as datas doutros procesos que tamén estaban informados. Así que mantemos a nosa petición de que poñan un máximo de tempo.
  
  
• Promoción interna: como en todos os procesos defendemos que sexa do 50% do total da oferta, horizontal dende o mesmo subgrupo e vertical dende o subgrupo inferior, reciprocamente en todas as escalas.
  
  
• Exercicio de duas partes: non concordamos que as dúas partes do mesmo exercicio teñan cortes diferentes. Iso é, en realidade, o mesmo que ter dous exercicios con cortes separados. Queremos por tanto que o corte sexa único para todo o exercicio, non por partes.
  
  
• Nota de corte: queremos recuperar a posibilidade de rebaixar o corte ao 40% caso de que co 50% de acertos non se chegue á proporción de 4 aprobados por praza. Así foi nos últimos procesos.
  
  
• Exercicio de aptitude física: do mesmo xeito que defendemos adaptar a proba ao sexo, tamén queremos adaptala á idade, porque non buscamos atletas senón persoas aptas para facer o traballo.
  
  
• Exercicio de lingua galega: na liña de defender a obxectividade das probas, defendemos que este exame sexa tamén tipo test (cos contidos relacionados cos niveis funcionais da lingua en léxico, sintáctica e gramática).
  
  
• Criterios de desempata: xa sabemos a resposta, pero queremos que nos indiquen se non hai infrarrepresentación feminina nestas especialidade para telo en conta.
  
  

Agora falta que nos convoquen á Comisión de Persoal, onde se emitirá o informe para a aprobación da convocatoria por parte do Consello da Xunta.